مەرەيلى كەزدەسۋدە باسىلىم باسشىسى دارحان قىدىرالى جيىنعا قاتىسقان گازەت ارداگەرلەرىنە «Egemen Qazaqstan» گازەتىنىڭ 100 جىلدىق مەرەكەلىك مەدالىن تابىس ەتتى.
مينيستر اقتوتى رايىمقۇلوۆا قۇتتىقتاۋ سوزىندە ۇلى وتان سوعىسىنىڭ ارداگەرى, جازۋشى, اكەسى راحمەتوللا رايىمقۇلوۆتى ەسىنە الىپ, جينالىپ وتىرعان ۇجىمنىڭ وزىنە تاڭسىق ەمەس ەكەنىنە, ءبىراز تۇلعالاردى تانيتىنىن اتاپ ءوتتى.
گازەتتە قىزمەت ەتىپ جۇرگەن بارشا قىزمەتكەردىڭ ەڭبەگىنە باس يەمىن, دەپ جىلى ەستەلىگىمەن بولىسكەن مينيستر ءسوزىن شىعارماشىلىق ۇجىمعا ارناعان رەسمي قۇتتىقتاۋ حاتپەن جالعادى.
«سىزدەردى ەل گازەتىنىڭ 100 جىلدىق مەرەيتويىمەن قۇتتىقتايمىن. سوناۋ «ۇشقىننان» جالىن لاۋلاپ, وقىرمانعا جول تارتا باستاعان كەزدەن بەرى ىرگەلى باسىلىم قازاق حالقىنىڭ وتكەنىن تۇگەندەپ, عاسىرلىق جىلناماسىن تىزبەكتەپ كەلەدى. ءبىر كەزدەرى ۇركەردەي شوعىرلانعان ۇلت زيالىلارىنىڭ ورەلى ويى مەن قاستەرلى ءسوزى, وزىندىك قولتاڭباسى قالعان ۇنجارعى قازىرگى تاڭداعى جالپىۇلتتىق باسىلىمعا اينالدى. ۇلى دالانىڭ تورىنەن ورىن العان ساليقالى باسىلىم الداعى ۋاقىتتا دا ماڭگىلىك ەلدىڭ بولمىسىن بۇكپەسىز بايانداپ, ويلى وقىرمانىنا قالقىسىز قىزمەت ەتە بەرەتىنىنە سەنىمدىمىن», دەلىنگەن قۇتتىقتاۋ حاتتا.
«Egemen Qazaqstan»-نىڭ ءبىرىنشى باسىلىمى شىققانىنان باستاپ ەلدە بولعان سان الۋان وقيعالاردى ءالى كۇنگە دەيىن بۇكپەسىز بايانداپ كەلە جاتقان, ورنى ەرەكشە باسىلىم ەكەنىن ارداگەر جۋرناليستەر ايتىپ, وزدەرى ەڭبەك ەتكەن گازەت تاريحىندا بولعان وقيعالارمەن ءبولىستى.
جيىن سوڭىندا سالتاناتتى مەرەيتويعا قاتىسۋشىلار ەستەلىك سۋرەتكە ءتۇسىپ, مەملەكەت تاراپىنان قولداۋعا ۇلكەن ريزاشىلىقتارىن ءبىلدىردى.
