گۇلميرا يسيمباەۆا اتاپ وتكەندەي, ەلباسى نۇرسۇلتان ءابىش ۇلى نازارباەۆتىڭ ساياساتىنا سايكەس قازاقستان الەۋمەتتىك باعدارلانعان مەملەكەت. مۇگەدەكتەردى, كوپبالالى جانە تابىسى از وتباسىلاردى الەۋمەتتىك قولداۋ - ۇنەمى مەملەكەتتىڭ ماڭىزدى مىندەتى بولىپ تابىلادى. تاۋەلسىزدىكتىڭ العاشقى كۇندەرىنەن باستاپ نەعۇرلىم ءتيىمدى الەۋمەتتىك ساياساتتى ازىرلەۋ ءۇشىن ءبىراز جۇمىس اتقارىلدى.
زاڭناما جەتىلدىرىلىپ, الەۋمەتتىك كومەك كورسەتۋ ادىستەمەسى وزگەرۋدە, مەملەكەتتىك مەنەدجمەنت تاسىلدەرى جاڭارتىلۋدا جانە حالىققا اتاۋلى الەۋمەتتىك كومەكتى تاعايىنداۋ كەزىندە ادىلدىك پەن وبەكتيۆتىلىكتى قامتاماسىز ەتۋگە باعىتتالعان مەملەكەتتىك باعدارلامالار قابىلدانىپ جاتىر. سوڭعى 14 جىل ىشىندە الەۋمەتتىك سالاعا جۇمسالاتىن شىعىستار ءۇش ەسە ءوستى. 1,5 ميلليوننان استام ازامات تۇراقتى تۇردە جاردەماقىلار مەن تولەمدەردى الىپ تۇردى. جالپى العاندا, الەۋمەتتىك سالاعا جۇمسالاتىن قاراجات - بيۋدجەتتىڭ 45 پايىزىن قۇرادى.
تاقىرىپ توڭىرەگىندە بايانداما جاساعان قازاقستان رەسپۋبليكاسىنىڭ ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ اعىمداعى جىلعى 27 اقپاندا مەملەكەت باسشىسىنىڭ «نۇر وتان» پارتياسىنىڭ XVIII سەزىندە بەرگەن تاپسىرماسىن جۇزەگە اسىرۋ ماقساتىندا ااك تاعايىنداۋ تەتىگى وزگەرتىلگەنىن ايتتى. مىسالى, 1 ساۋىردەن باستاپ كەدەيلىك شەگى 50% - دان 70% - عا دەيىن ءوستى (14 849-دان 20 789 تەڭگەگە دەيىن).
سونداي-اق تابىسى از وتباسىنان شىققان ءاربىر بالاعا ااك مولشەرى 20 789 تەڭگە نەمەسە 70% ەڭ تومەن كۇنكورىس دەڭگەيى كولەمىندە بەلگىلەنگەن. سونىمەن قاتار شارتسىز اقشالاي كومەك كورسەتۋ مەرزىمى 3 ايدان 6 ايعا دەيىن, شارتتى اقشالاي كومەك 6 ايدان 12 ايعا دەيىن ۇزارتىلدى.
ناتيجەسىندە, اعىمداعى جىلعى قاراشا ايىنىڭ باسىنا شامامەن 456,5 مىڭ وتباسى نەمەسە 2,1 ملن-عا جۋىق ادام مەملەكەتتەن ناقتى قولداۋ الدى, ونىڭ ىشىندە 53% - ى - كوپ بالالى. العاشقى رەت بيۋدجەتتە ااك تولەۋگە 245 ملرد تەڭگە كوزدەلگەن, 10 اي ىشىندە ونىڭ 66,5% نەمەسە 163 ملرد تەڭگەدەن استام قاراجات جۇمسالدى.
ماجىلىستەگى الەۋمەتتىك-مادەني دامۋ كوميتەتىنىڭ ءتورايىمى گۇلشارا ابدىقالىقوۆا ءوز سوزىندە پارلامەنت ءماجىلىسى ااك بەرۋدىڭ قولدانىستاعى جۇيەسىن وزگەرتەتىن زاڭ جوباسىن ماقۇلدادى, ەڭ باستى باعىت ەڭبەككە ىنتالاندىرۋ, تابىسى از ازاماتتاردىڭ تابىسى مەن مەملەكەتتىك قولداۋ مولشەرىنە قاتىستى اشىقتىق پەن ادىلدىكتى قامتاماسىز ەتۋ ەكەنىن اتاپ ءوتتى. ۇسىنىلىپ وتىرعان شارالار كوپبالالى انالاردى قولداۋ, جاڭعىرتىلعان اتاۋلى الەۋمەتتىك كومەك, كەپىلدەندىرىلگەن الەۋمەتتىك كومەكتى قامتيدى.
ءبىرىنشى تابىسى از بالالاردىڭ 56 % - دان استامى كوپبالالى وتباسىلاردىڭ بالالارى. وسىعان بايلانىستى كوپبالالى وتباسىلارعا جەكە مەملەكەتتىك جاردەماقى ەنگىزۋ كوزدەلگەن. ول تابىسىنا قاراماستان, كوپبالالى انالاردىڭ بەدەلىن تانۋ, ولاردىڭ وتباسىلارىنداعى ماتەريالدىق ءال-اۋقاتىن ارتتىرۋ, ەلدە بالا تۋدى ىنتالاندىرۋ رەتىندە بەرىلەتىن بولادى.
وسىلايشا, 4 جانە ودان دا كوپ كامەلەتكە تولماعان بالالارى بار 340 مىڭنان استام كوپبالالى وتباسىلار ءۇشىن وتباسىنىڭ بالالار سانىنا بايلانىستى 2020 جىلى 42 496 تەڭگەدەن 74 388 تەڭگەگە دەيىن سارالانعان مولشەردە جاڭا مەملەكەتتىك جاردەماقى بەلگىلەنەتىن بولادى. بۇل جاڭا نورما ااك تاعايىنداۋ كەزىندە بالالارعا بەلگىلەنگەن تولەمدى ءبىر مەزگىلدە الىپ تاستاۋمەن ەنگىزىلەدى.
ەكىنشى ااك شىن مانىندە وعان مۇقتاج, قيىن ومىرلىك جاعدايعا تاپ بولعان جانە ءوز بەتىنشە شىعا المايتىن ادامدارعا تاعايىندالادى. 2020 جىلعى 1 قاڭتاردان باستاپ, ااك-ءنىڭ توقسان سايىنعى تاعايىندالۋىن قايتارۋ جانە تيىسىنشە كەلىسىلگەن, سونداي-اق شارتتى جانە شارتسىز كومەكتى ءۇش ايعا تاعايىنداۋ قولعا الىنادى.
سونداي-اق ااك مولشەرى وتباسىنىڭ بارلىق مۇشەلەرى ءۇشىن كەدەيلىك شەگى مەن جان باسىنا شاققانداعى ورتاشا تابىس اراسىنداعى ايىرماشىلىق رەتىندە بەلگىلەنەتىن بولادى. جانە جۇمىسپەن قامتۋعا جاردەمدەسۋ شارالارىنا قاتىسۋدان باس تارتقان جاعدايدا ااك الۋ شارتتارىن كۇشەيتۋ. ەگەر وتباسىنىڭ ەڭبەككە قابىلەتتى مۇشەسى ۇسىنىلعان بەلسەندى شارالاردان باس تارتسا, وندا ول جانە ونىڭ وتباسىنىڭ بارلىق مۇشەلەرى ااك الۋ قۇقىعىنان ايىرىلادى. سونداي-اق, بالا كۇتىمىمەن اينالىساتىن انالارعا بالا ءۇش جاسقا تولۋىمەن جۇمىسپەن قامتۋدىڭ بەلسەندى شارالارىنا قاتىسۋ قۇقىعى بەرىلەدى.
ۇكىمەت ساعاتى قورىتىندىسى بويىنشا ارنايى ۇسىنىم ازىرلەندى
