پارلامەنت • 09 جەلتوقسان، 2019

سەناتتا مۇگەدەكتىگى بار ازاماتتاردىڭ قۇقىقتارىن قامتاماسىز ەتۋ ماسەلەسى تالقىلاندى

36 رەتكورسەتىلدى

سەناتتا مۇگەدەكتىگى بار ازاماتتاردىڭ قۇقىقتارىن قامتاماسىز ەتۋ جانە ءومىر ساپاسىن جاقسارتۋ جونىندەگى ۇسىنىستار ازىرلەۋگە بايلانىستى جۇمىس توبىنىڭ قورىتىندى وتىرىسى ءوتتى. بۇل تۋرالى پارلامەنت سەناتىنىڭ ءباسپاسوز قىزمەتى حابارلادى.

سەناتور ناريمان تورەعاليەۆتىڭ توراعالىق ەتۋىمەن 2،5 ايدىڭ ىشىندە توپتىڭ 6 وتىرىسى مەن 2 تىڭداۋى ءوتتى. وسى كەزەڭدە بارلىعى 80 ۇسىنىس ايتىلدى. سارالاۋ بارىسىندا كەيبىر ۇسىنىستار الىنىپ تاستالىپ، كەيبىرى پىسىقتاۋدى قاجەت ەتەتىنى ايتىلدى. ۋاكىلەتتى ورگاندار قالعان ۇسىنىستاردى 2020 جىلى زاڭ شىعارۋ قىزمەتى اياسىندا قارايتىن بولادى.

جۇمىس قورىتىندىسى بويىنشا ەلىمىزدە وڭالتۋ ورتالىقتارى جەتىسپەيتىنى جانە ەرەكشە قاجەتتىلىكتەرى بار بالالاردى دياگنوستيكادان ەرتە وتكىزۋ ءتارتىبى تولىق ەنگىزىلمەگەنى انىقتالدى. مۇگەدەك بالالاردىڭ قورشاعان ورتادا كەدەرگىسىز ءجۇرىپ-تۇرۋى جانە ءبىلىم الۋعا قول جەتكىزۋ مۇمكىندىكتەرى وزەكتى ماسەلەلەردىڭ ءبىرى بولىپ وتىر.

«تالقىلاۋ قورىتىندىسى بويىنشا ورتالىق جانە جەرگىلىكتى مەملەكەتتىك ورگاندار اراسىنداعى مەكەمەارالىق ءوزارا بايلانىستىڭ  بولماۋىنان جۇيەلى سيپاتتاعى كۇردەلى ماسەلەلەردىڭ ورىن العانى انىقتالدى. جۇمىس توبى زاڭ شىعارۋ باستامالارىن ىلگەرىلەتۋ جونىندەگى ۇنقاتىسۋ الاڭىنا اينالدى. مۇگەدەك جانداردىڭ قۇقىقتارىن قورعاۋ جونىندەگى بىرىڭعاي ۇلتتىق ۇيلەستىرۋشى جانە كەڭەسشى ورگان قۇرۋدى ۇسىنامىز»، دەدى ن.تورەعاليەۆ.

توپ قۇرامىندا پارلامەنت سەناتىنىڭ دەپۋتاتتارى، ورتالىق جانە جەرگىلىكتى اتقارۋشى ورگانداردىڭ وكىلدەرى، الەۋمەتتىك جانە ءبىلىم بەرۋ سالاسىنداعى مەملەكەتتىك مەكەمەلەردىڭ باسشىلارى، سونىمەن قاتار مەملەكەتتىك ەمەس ۇيىمداردىڭ وكىلدەرى مەن مۇمكىندىگى شەكتەۋلى ادامدار بار.

سوڭعى جاڭالىقتار

ۇقساس جاڭالىقتار