وتكەن تۋردا «بارىس ارەنادا» «يوكەريت» كومانداسىنان 2:4 ەسەبىمەن جەڭىلىپ, قازاقستاندىق كورەرمەندەردىڭ كوڭىلىن قۇلازىتقان جەرلەستەرىمىز بۇل جولى كوزدەگەن ماقساتىنا قول جەتكىزدى. قوس كوماندا ويىنشىلارى ءبىرىنشى كەزەڭدە قاقپا ساڭىلاۋىن تابا الماي, ۇزىلىسكە تەڭ ەسەپپەن تارقاستى. ەكىنشى كەزەڭدە جەرلەستەرىمىز باسىمدىققا يە بولىپ, ەكى بىردەي شايبا سوقتى. العاش داررەن ديتس ەسەپتى اشسا, رومان ستارچەنكو «بارىستىڭ» ەكىنشى شايباسىن سوقتى. بىراق كەزەڭ سوڭىندا «سوچي» ويىنشىلارى ەسەپتى قىسقارتۋعا مۇمكىندىك الدى. شايبا اۆتورى – پاۆەل ماكارەنكو.
ءۇشىنشى كەزەڭدە رومان ستارچەنكو دۋبل اۆتورى اتانىپ, دجەسسي بلەكەر ويىننىڭ نۇكتەسىن قويدى. قورىتىندى ەسەپ – 1:4. بۇل جەڭىستەن كەيىن «بارىس» كومانداسى 44 ۇپايمەن «شىعىس» كونفەرەنتسياسىنداعى تۋرنير كەستەسىندە ءۇشىنشى ورىنعا كوتەرىلدى.
