فراكتسيا دەپۋتاتتارى ۇكىمەتكە دە بىرنەشە دەپۋتاتتىق ساۋال جولداپ, وسى جۇيەنى قالىپقا كەلتىرۋدى سۇراعان. دەپۋتاتتار ءتىپتى ونىڭ جۇمىسىن بارلىق مەكتەپتەر كەڭ جولاقتى ينتەرنەتكە قول جەتكىزگەنشە توقتاتا تۇرۋدى دا وتىنگەن. سونىمەن بىرگە ونىڭ كوپتەگەن قىزمەتتەرىنىڭ اقىلى بولعانىنا دا دەپۋتاتتار نارازىلىق بىلدىرگەن. بار گاپ وسى جەردە سياقتى. «كۇندەلىكتىڭ» ارقاسىندا وڭاي تابىس تابۋدى كوزدەگەندەر ونى قالاي دا جاپپاي ەنگىزۋ تۋرالى شەشىمدى وتكىزىپ جىبەرگەنگە ۇقسايدى.
«اقجولدىقتاردىڭ» دەپۋتاتتىق ساۋالىنا جۋىردا پرەمەر-ءمينيستردىڭ ورىنباسارى بەردىبەك ساپارباەۆتان جاۋاپ كەلىپ, وندا مينيسترلىككە تەگىن كورسەتىلەتىن قىزمەتتەردى كوبەيتۋ مۇمكىندىگىن قاراستىرۋ تاپسىرىلعانى جەتكىزىلدى. سونىمەن بىرگە ينتەرنەتى جوق اۋىلداردىڭ مەكتەبىندە «كۇندەلىك» ااج وشىرىلەتىندىگى ايتىلعان.
كەشە سولتۇستىك قازاقستان وبلىسى اكىمدىگىنىڭ وتىرىسىندا دا وسى ماسەلە تالقىلاندى. جيىن بارىسىندا وبلىس اكىمى قۇمار اقساقالوۆ ينتەرنەت جەلىسى جوق اۋىلداردا مۇعالىمدەردى ەلەكتروندى كۇندەلىكتى تولتىرۋعا ماجبۇرلەۋ فاكتىلەرى بار ەكەنىن ايتتى. «ينتەرنەت جوق اۋىلداردا ەلەكتروندى كۇندەلىكتى تولتىرۋ قيسىنعا كەلمەيدى. مۇعالىمدەردى ماجبۇرلەمەڭىزدەر. ينتەرنەتتىڭ جىلدامدىعى تومەن بولعاسىن, مەكتەپتە تۇندە جۇمىس ىستەۋگە تۋرا كەلەدى. ءتىپتى كەيبىر مۇعالىمدەر كورشى اۋىلعا بارىپ, تولتىرادى دەگەندى ەستىدىم. مۇنداي باسسىزدىققا جول بەرىلمەسىن», - دەدى قۇمار اقساقالوۆ.
الدىمىزداعى جىلى ءوڭىردىڭ 236 ەلدىمەكەنى كەڭ جولاققا قوسىلادى. ودان ارعى, 2021 جىلى تاعى 196 اۋىل ساپالى ينتەرنەتكە قول جەتكىزبەك. تەك 2022 جىلى عانا وبلىس اۋىل-سەلولارىنىڭ 86% كەڭ جولاقتى ينتەرنەتكە قول جەتكىزەدى الادى ەكەن. دەمەك, ءجۇز پايىزدىڭ اۋىلى ءالى الىس. وسىنداي جاعدايدا «كۇندەلىكتى» جاپپاي ەنگىزۋ قيسىنعا كەلمەيتىنى كورىنىپ تۇر.
سولتۇستىك قازاقستان وبلىسى
