سىزدەردى حالىقتىڭ رۋحاني ءومىرىن تولىقتىراتىن تاعىلىمدى مەرەكە – قازاقستان رەسپۋبليكاسىنىڭ تۇڭعىش پرەزيدەنتى كۇنىمەن قۇتتىقتايمىز!
ءبىزدىڭ ەلىمىز بەن حالقىمىزدىڭ تاريحى نۇرسۇلتان ءابىش ۇلى نازارباەۆتىڭ ءومىر جولىمەن ءبىرتۇتاس. تاۋەلسىز قازاقستاننىڭ قالىپتاسۋىنان باستاپ مەملەكەتتىك دامۋدىڭ داڭعىلعا ءتۇسۋى جولىنداعى جۇمىستاردىڭ باسىمى ن.ءا.نازارباەۆتىڭ ەسىمىمەن بايلانىستى, ەرلىگىمەن ۇشتاسقان دۇنيەلەر ەكەنى داۋسىز.
تۇڭعىش پرەزيدەنت ن.ءا.نازارباەۆ مەملەكەتتىك ساياساتتىڭ نەگىزگى باسىمدىقتارىنىڭ ءبىرى – ەتنوسارالىق كەلىسىم مەن بىرلىكتىڭ ساقتالۋىن ايقىندادى. وسىنىڭ ارقاسىندا كوپەتنوستى حالقىمىز باسەكەگە قابىلەتتى ەلگە اينالدى.
ەلباسى اتا-بابالارىمىزدىڭ ارمانىن جۇزەگە اسىرىپ, انا ءتىلى مەن مادەنيەتىن دامىتىپ, ەركىن ويلاۋعا جانە العا قاراي نىق قادام باسۋعا مۇمكىندىك اشتى.
بۇگىن قازاقستان حالقى تۇڭعىش پرەزيدەنت كۇنىن ەرەكشە ىقىلاسپەن جانە زور ريزاشىلىقپەن اتاپ وتەدى. قازاقستاننىڭ تۇڭعىش پرەزيدەنتى ءوز وكىلەتتىلىگىن مەرزىمىنەن بۇرىن اياقتاپ, ەلدىڭ نەگىزگى زاڭىنا سايكەس بەيبىت تۇردە لاۋازىمنىڭ بەرىلۋىن قامتاماسىز ەتتى.
بۇل تۇڭعىش پرەزيدەنتتىڭ ەرەن ەڭبەگى.
تۇڭعىش پرەزيدەنتىمىزدىڭ ساياسي ەرىك-جىگەرى مەن كورەگەندىگىنىڭ ارقاسىندا قازاقستان قوعامدىق تۇراقتىلىقتىڭ, ءتۇرلى ەتنوستار مەن كونفەسسيالار وكىلدەرىنىڭ بەيبىت ءومىرىنىڭ الەمدىك قىرىنا اينالدى.
قۇرمەتتى وتانداستار!
1 جەلتوقسان – قازاقستان تاريحى ءۇشىن ەلەۋلى كۇن. ءدال وسى كۇنى ۇلت كوشباسشىسى ەل تىزگىنىن ۇستاپ, ەلىمىزدە تاۋەلسىزدىك تۇعىرىن قوندىردى.
ناعىز حالىق كوشباسشىسى رەتىندە ەلباسى بارلىعىمىزعا ءوز ەلىن قالاي ءسۇيۋ كەرەكتىگىن, ونىڭ دامۋ جولىن كورسەتتى. بۇل كۇن ۇرپاق ەسىندە جاڭعىرۋدىڭ, جاڭاشىلدىقتىڭ بەلگىسى رەتىندە عانا ەمەس, وتكەننىڭ ونەگەسى, ۇلىنىڭ ۇلاعاتى رەتىندە ساقتالماق.
وسىنداي حالقىمىزدىڭ بەرەكەسىن ۇلىقتاپ, مەملەكەت مەرەيىن اسىراتىن مەرەكە كۇنى وتباسىلارىڭىزعا اماندىق, باق-بەرەكە, شاڭىراقتارىڭىزعا شاتتىق, ەلىمىزگە تىنىشتىق تىلەيمىز!
قۇرمەتپەن,
قازاقستان حالقى اسسامبلەياسى
