بۇل بازالت تاسى – مينەرالدىق ماقتانىڭ شيكىزاتى. ازىرگە تەمىر جول ارقىلى رەسەيدەن تاسىمالدانىپ جاتىر. بولاشاقتا ەلىمىزدە كەن ورنىن اشۋ جوسپاردا بار. وسىلايشا, اتالمىش كاسىپورىن 100 پروتسەنت وتاندىق ءونىم شىعارادى. زاۋىتتا ونىمدىلىگى جوعارى يتالياندىق قوندىرعىلار ورناتىلعان. دومنا پەشىندە 1600 گرادۋسقا دەيىنگى جوعارى تەمپەراتۋرادا بازالت تاسى ەرىتىلىپ, كەيىن ارنايى قوسىندىلار ارقىلى ءونىم دايىندالادى.
–الدىمەن شيكىزاتتى بۋنكەرگە تولتىرامىز. سوسىن ەرىتكىش پەشتەن وتكىزىپ, وعان جەلىم, ىلعال وتكىزبەيتىن ماتەريالدار سياقتى قوسىندىلاردى ارالاستىرامىز. قالىڭدىعى مەن تىعىزدىعىن قاجەتتىلىگىنە وراي بەلگىلەپ, ارنايى قوندىرعىلاردىڭ كومەگىمەن مينەرالدى ماقتا دايىندالادى. وسىعان دەيىن سامارا قالاسىندا جۇمىس ىستەدىم, تاجىريبەم سول كەزدە قالىپتاسقان. قازىر ءوز بىلگەنىمدى ۇيرەتىپ جاتىرمىن,–دەيدى تسەح باستىعى انتون لاۆرەنتەۆ.
قۇرىلىسى قارقىندى دامىپ جاتقان ەلوردا وسى كۇنگە دەيىن جىلۋ ساقتاعىش ماتەريالداردى رەسەيدەن تاسىمالداپ كەلدى. ەندى قۇرىلىسقا قاجەتتى زات ىرگەدەگى بۇلاندىدا دايىندالادى. ىلگەرىدە تاپشىلىقتىڭ كەسىرىنەن قۇرىلىس ماتەريالدارىنىڭ 80 پروتسەنتى شەت ەلدەن جەتكىزىلەتىن. قايتا وڭدەۋ ونەركاسىبىن جانداردىرۋدىڭ ارقاسىندا بۇل سالادا وتاندىق ءونىمنىڭ سالماعى ارتا تۇسپەك.
–جوبا قۇنى 8 ميلليارد تەڭگە شاماسىندا. «بايتەرەك ۆۋەنچەر فاند» اكتسيونەرلىك قوعامىنىڭ قولداۋىمەن زاۋىت تولىقتاي ىسكە قوسىلدى. ونىمگە دەگەن سۇرانىس جوعارى. قازىر قۇرىلىس ماتەريالدارىن قىرعىزستان مەن وزبەكستانعا دا جونەلتىپ جاتىرمىز. جۇمىسقا 150 ادام جۇمىلدىرىلعان. ءتورت اۋىسىم جاساقتالدى,–دەيدى زاۋىتتىڭ باس ديرەكتورى قاناتبەك سادىقوۆ.
بولاشاقتا ءوندىرىس ايماعىندا سەندۆيچ-پانەل مەن گاز بلوكتارىن شىعارۋ دا جوسپارلانۋدا.
بۇلاندى اۋدانى
اقمولا وبىلسى
