گليۆيتسە – پولشانىڭ وڭتۇستىك-باتىس بولىگىندە ورنالاسقان, جەرگىلىكتى اسەم تابيعات پەن وزىنە ءتان ساۋلەتتى ۇيلەستىرگەن قالا. وتكەن اپتانىڭ ءون بويىندا الەمدىك قاۋىمداستىقتىڭ نازارى وسى ءبىر شاھارعا اۋدى دەسەك, ارتىق ايتپاسپىز. ونىڭ باستى سەبەبى ءۇش قۇرلىقتىڭ 19 مەملەكەتىنەن جۇزدەن جۇيرىك, مىڭنان تۇلپار ونەرپازدار قاتىسقان «بالالار ەۆروۆيدەنيەسى-2019» بايقاۋى ەدى. اتالعان بايقاۋعا ەلىمىزدىڭ ۇكىلى ءۇمىتىن ارقالاعان وتانداسىمىز ەرجان ماكسيم دە قاتىسقانى بەلگىلى. سونىمەن جىلىنا ءبىر رەت تۋىن كوتەرەتىن ءانشى بالالاردىڭ باستى ونەر دوداسى قالاي ءوتتى؟ ءبىز دە ءان ونەرىنىڭ كورىگىن قىزدىرعان وسى ايتۋلى شارانىڭ ورتاسىنان تابىلىپ, الاماننىڭ دۇبىرىندەي بولعان بويداعى قاندى قىزدىرار جارىستىڭ اۋانىن سەزىنگەن ەدىك.
بالالار بايقاۋى گليۆيتسە قالاسىنداعى قۇرىلىسى 2018 جىلى اياقتالعان, زاماناۋي ساۋلەتتى Arena Gliwice سپورتتىق – كوڭىل كوتەرۋ كەشەنىندە ءوتتى. حالىقارالىق ءان بايقاۋىنىڭ فينالدىق كۇنى اتالعان كەشەننىڭ ماڭى جارىسقا قاتىسۋشى مەملەكەتتەردىڭ ءتۇرلى-ءتۇستى بوياۋداعى تۋلارىن قولىنا ۇستاعان قاراقۇرىم حالىققا تولى بولدى. بەينەبىر الىپ وزەن سىقىلدى ادام لەكتەرىنىڭ اراسىندا اسىرەسە اتا-اجەلەرىمەن, اكە-شەشەلەرىمەن ەرە كەلگەن جاس جەتكىنشەكتەردىڭ قاتارى كوپ ەدى. اۋماقتاعى تىنىشتىقتى قامتاماسىز ەتۋشى پوليتسيا قىزمەتكەرلەرى, ونداعان كامەرا الدىندا حابار تاراتىپ جاتقان تەلەۆيزيا جۋرناليستەرى شارانىڭ ماڭىزدىلىعىنان حاباردار ەتكەنىمەن, كەشەنگە كىرەر جولدا ۇزىن-cونار كەزەكتە تۇرعان ادامداردىڭ جۇزدەرىندەگى كۇلكى, كوتەرىڭكى كوڭىل كۇي ءان بايقاۋىنا جالپى مەرەكەلى سيپات بەرىپ تۇردى.
ءان دوداسىنا كەلۋشىلەر اراسىنان اسپان تۇستەس كوك تۋلارىمىزدى كوتەرگەن, ەرجاندى قولداۋ ماقساتىندا ارنايى كەلگەن وتانداستارىمىزدى دا كوپتەپ كەزىكتىردىك.
بايقاۋ ۆارشاۆا ۋاقىتىمەن 16.00 باستالدى. ءان سالۋ رەتى بىرنەشە كۇن بۇرىن جەرەبە بارىسىندا انىقتالعان رەتپەن جۇرگىزىلدى. فينالدىق بايقاۋ كەزەڭىنىڭ شىمىلدىعىن اۆستريالىق جاس ءانشى – دجوردان ەنتوني ءوزىنىڭ «We Will Rise» انىمەن اشتى.
اۆستراليالىقتىڭ سوڭىن الا ساحناعا كوتەرىلگەن فرانتسيا ءۇمىتى – كارلا ءوزىنىڭ انا تىلىندە العاشقى سەزىم تۋرالى ءانىن ورىنداپ, ءاننىڭ ويناقى يىرىمدەرى جينالعان قاۋىمعا تىڭ ەنەرگيا بەرگەندەي بولدى. تريبۋنالاردان مەن مۇندالاعان «فرانتسۋز ۇشجولاقتارىن» كوتەرگەن تىڭدارماننىڭ قاراسى كوپ ەكەندىگى بايقالدى.
«A Time For Us» ءانىن شىرقاعان رەسەيلىك دۋەت تاتيانا مەجەنتسەۆا مەن دەنبەرەل وورجاك عالامشاردىڭ قورعاۋدى قاجەت ەتەندىگىن كوپشىلىككە جەتكىزۋگە تىرىسقان بولسا, سولتۇستىك ماكەدونيالىق ميلا موسكوۆ ءوزى ورىنداعان تۋىندىدا ارماننىڭ ماڭىزىنا ءمان بەردى.
بارلىق قاتىسۋشىلار باسىم كوپشىلىگىن پولياكتار قۇراعان تىڭدارماننان قىزۋ قولداۋ الىپ وتىردى. سونداي قولداۋدى سەزىنگەن انشىلەردىڭ قاتارىنا يسپانيالىق مەلاني گارسيانى قوسۋعا بولادى. جاس ءانشى «Marte» اتالاتىن ءانىن شىرقاۋ بارىسىندا ءوزىنىڭ ۆوكالدىق مۇمكىندىكتەرىمەن قالىڭ كوپشىلىكتى ءتانتى ەتتى.
يسپانيالىق قىزدان كەيىن: گرۋزيا, بەلارۋس, مالتا جانە ۋەلس ەلدەرىنىڭ وكىلدەرى ءوز ونەرلەرىن كورسەتتى.
جارىستا باعىن سىنايتىن ۇمىتكەرلەر ساحناعا قارسى جايعاسقان ارنايى ورىندا ارىپتەستەرىنىڭ ونەرىن تاماشالاپ وتىردى. «پولشا», «فرانتسيا» دەپ ۇرانداعان كوپشىلىك داۋىستارىنىڭ اراسىنان ءبىزدىڭ جانكۇيەرلەردىڭ اراگىدىك «قازاقستان» جانە «ەرجان» دەگەن داۋىستارى قۇلاققا الىستان جەتىپ جاتتى. ەرجان بولسا, وتانداستارىنىڭ داۋسىن ەستىپ وتىرعانىن اڭعارتىپ, ك ۇلىمسىرەپ, كوك تۋىمىزدى بۇلعاۋمەن بولدى.
ەرجاننىڭ ونەر كورسەتۋ رەتى كەزەك بويىنشا 10 – شى بولعاندىقتان قازاقستان وكىلىنىڭ شىعۋىمەن بايقاۋ ءوزىنىڭ بەل ورتاسىنا دا جاقىنداعان –دى. كەلەسى ءانشى قازاقستاننىڭ اتىنان شىعاتىندىعى جاريا ەتىلگەندە توڭىرەگىمىز: «ەرجان العا», «قازاقستان العا» دەگەن داۋىستارعا تولىپ كەتتى. قازاقستاندىق جانكۇيەرلەردى قورشاي وتىرعان شەتەلدىك جانكۇيەرلەر دە قازاقستاندىق ۇلاننىڭ اتىن اتاپ, قىزۋ قولداۋ ءبىلدىرىسىپ جاتتى. وسىنداي جاعدايدا ەرجاننىڭ ورىنداۋىنداعى حاميت شاڭعاليەۆ پەن دانيار الدابەرگەنوۆتىڭ اۆتورلىعىنداعى «ارمانىڭنان قالما» ءانىنىڭ نازىك يىرىمدەرى قۇلاققا جەتتى. ءانشىمىزدى قولداي شۋلاعان داۋىستار ءبىر ساتكە ساپ تىيىلدى. ءانشى كومەيىنەن شىققان: «كەي – كەزدە بولماي, سىناۋعا جاندى –اي, ساتسىزدىك ەرەر قالماي. ارمانىڭ سەنىڭ جارق ەتەر اتقان تاڭداي» دەگەن سوزدەر قۇلاقتان كىرىپ, بويدى الىپ جاتقانداي بولدى.
ەرجاننىڭ ءانى ونىڭ تۋ سىرتىندا كورسەتىلىپ جاتقان تاقىرىپتىق نازىك انيماتسيامەن شەبەر ۇيلەسىمدىلىكتە شىرقالدى. جاس ءانشىمىزدىڭ ءتورت مينۋتقا جەتپەس ءاننىڭ ىشىندە كيىمىن اۋىستىرىپ ساحناعا قايتا ورالۋى دا ۇتىمدى شىقتى.
جاس دارىنىمىز ءانىن اياقتاعاننان كەيىنگى توقتاۋسىز دۋ قول شاپالاقتاۋ ەداۋىر ۋاقىتقا سوزىلىپ, بالالار بايقاۋىن وتكىزۋشى ەلدىڭ وكىلىنىڭ شىعۋىمەن جالعاسىپ كەتتى. پولشالىق 12 جاستاعى ۆيكي گابوردىڭ «Superhero» اتتى انىندە تۇتاس الەمنىڭ ءبىزدىڭ ورتاق ءۇيىمىز ەكەندىگىنە باسىمدىق بەردى. ءان اعىلشىن جانە پولياك تىلىندە شىرقالدى.
پولشا انشىسىنەن كەيىن يرلانديا, ۋكراينا, نيدەرلاندى, ارمەنيا, پورتۋگاليا, يتاليا جانە البانيا ەلدەرىنىڭ وكىلدەرى ءوز ونەرىن كوپشىلىك الدىندا پاش ەتتى. ال «بالالار ەۆروۆيدەنيەسى 2019» ءان بايقاۋىن سەربيالىق جاس ءانشى – داريا ۆراچەۆيچ ءتامامدادى.
وسىلايشا, كونكۋرسانتتاردىڭ ءان شىرقاۋ كەزەڭى دە اياقتالىپ, كەزەك ەڭ تولعانىسقا تولى داۋىس بەرۋگە دە كەلىپ جەتتى. اتالعان كەزەڭنىڭ قازىلاردىڭ داۋىس بەرۋى مەن جالپىلاما داۋىس بەرۋ كەزەڭىنەن قۇرالعاندىعىن ايتۋىمىز كەرەك. دەگەنمەن, ءۇش قۇرلىقتىڭ كىل مىقتىلارىن جيناعان ونەر بايقاۋىندا جەڭىمپاز بەن جۇلدەلى ورىن يەلەرىن انىقتاۋ وڭاي سوقپاعاندىعىن ايتۋعا ءتيىسپىز. وسى ورايدا, كىم جەڭىسكە جەتەدى؟ دەگەن ساۋالدىڭ داۋىس بەرۋدىڭ سوڭىنا دەيىن ساقتالىپ, قوبالجۋ سەزىمى بايقاۋ بىتكەنشە ساقتالدى.
سونىمەن, قازىلاردىڭ داۋىس بەرۋى بويىنشا ءا دەگەننەن ەلىمىز ءۇمىتىن ارقالاعان ەرجان ماكسيم سۋىرىلىپ العا شىقتى. كاسىبي مۋزىكا ماماندارىنان تۇراتىن قازىلاردىڭ كوپشىلىگى ەرجاندى قولداعان ەكەن. الايدا, جالپى داۋىس بەرۋدىڭ قورىتىندىسى بويىنشا وتانداسىمىز ەكىنشى ورىنعا يە بولىپ, ءوزىنىڭ جارىس الدىنداعى جۇلدەلى ۇشتىككە ەنۋ مەجەسىن اسىرا ورىندادى.
داۋىس بەرۋ ءساتىنىڭ ەرجانعا وڭاي تيمەگەندىگى انىق, ونى ءار قاتىسۋشىنىڭ رەاكتسياسىن باقىلاعان پولياك وپەراتورلارىنىڭ كامەراسى كورسەتىپ تۇردى.
بايقاۋ قورىتىندىسىندا ءبىرىنشى ورىندى پولشا, ەكىنشى ورىندى قازاقستان يەمدەنگەن بولسا, ءۇشىنشى ورىن يسپانياعا بۇيىردى.
وسىلايشا, جاس دارىن ەرجان ماكسيم بالالاردىڭ الەمدەگى ەڭ ۇزدىك ءان بايقاۋىندا ەلىمىزدىڭ نامىسىن ابىرويمەن قورعاپ, ديماش اعاسى سىندى تۋعان جەرىن, قازاق حالقىن الەمگە پاش ەتتى. قوسىمشا, ءانشىمىزدىڭ تۇتاس تۇركى تىلدەس ەلدەردەن قاتىسقان بىردەن ءبىر ۇمىتكەر بولعاندىعىن ايتۋمىز كەرەك.
داۋىس بەرۋ ناتيجەلەرى بەلگىلى بولعاسىن بويىمىزدى قۋانىش كەرنەپ, جاپپاي قۇتتى بولسىن ايتىپ جاتىرمىز...جاس ءانشىمىزدىڭ ونەرىنە ءتانتى بولعان شەتەلدىك جانكۇيەرلەر دە وتانداستارىمىزعا كەلىپ وزدەرىنىڭ ىستىق لەبىزدەرىن ءبىلدىرىسىپ جاتتى.
وسىنداي ەيفوريا جاعدايىندا سەزىمدەرىن ءبىلۋ ماقساتىندا ەرجاندى جانە ونىڭ اتا –اناسىن ىزدەدىك. ولارمەن قاتىسۋشىلاردىڭ پرەسس – كونفەرەنتسياسى الدىندا سويلەسۋ مۇمكىن بولدى. بويلارىن قۋانىشتى تولعانىس تەربەگەن جانۇيا مۇشەلەرىمەن قىسقاشا سۇحباتتاستىق:
ەرجان ماكسيم, «بالالار ەۆروۆيدەنيەسى 2019» ءان بايقاۋىنىڭ ءىى ورىن يەگەرى: ەكىنشى ورىن دەگەن جاقسى....قۋانىشتىمىن! جۋىردا مەن پولشادا, لوندون مەن ماسكەۋدە كونتسەرت بەرەتىن بولامىن. جاڭالىق كۇتىڭىزدەر.
گۇلميرا الىبەك, ەرجاننىڭ اناسى: ەرجان ءۇشىن تاقىمىن قىسىپ, قولداۋ كورسەتكەن, داۋسىن بەرىپ قولداۋ بىلدىرگەن حالقىمىزعا ۇلكەن جۇرەكجاردى العىسىمىزدى ايتامىز. ارينە, وتباسى مۇشەلەرى, بۇكىل ماماندار, ۆوكاليستەر كۇن – ءتۇن دەمەي جۇمىس جاسادىق. قيىنشىلىقتار دا بولدى... سول كەزدەردە جانىمىزدان تابىلىپ, ەلىمىز اتىنان ونەر كورسەتكەن ەرجانىمىزعا جاعداي جاساعان بارشا كاسىبي ماماندارعا العىسىمىزدى بىلدىرەمىز. ەرجاندى ۇكىلەپ قوسقان تۇلپارداي باپتاۋعا كومەكتەسكەن سىزدەرگە راقمەت! بۇل ورتاق جەڭىس, بۇل ەلدىڭ جەڭىسى! ءبىز سىزدەردى جاقسى كورەمىز!
ەربول ماكسيم ۇلى, ەرجاننىڭ اكەسى: كوڭىل كۇيىمىز وتە كەرەمەت! تۇتاس ەلىمىز قۋانىپ جاتىر! ايتارىم, ۇلىمىزدىڭ ەل ءۇمىتىن اقتاعانىنا اتا – اناسى رەتىندە ەرەكشە قۋانىشتىمىز! ارينە وسى الاماننىڭ ءدۇبىرى الىستان ەستىلگەننەن جاسىرمايمىن ۋايىمدادىق. ەلدىڭ سەنىمىنىڭ اۋىر ەكەندىگىن سەزىندىك...كەلەشەكتە دە ۇلىمىزدىڭ ءوز ونەرىن تالاي بايقاۋلاردا كورسەتىپ, ەلىمىزدىڭ نامىسىن قورعاي بەرەدى, حالقىمىزدىڭ اتىن ءالى تالاي پاش ەتەدى دەپ سەنەمىز. ەرجاننىڭ كاسىبي ءبىلىم ارتتىرا ءتۇسۋ ماقساتىندا ماسكەۋدە ەڭبەكتەنىپ جاتقانىمىزدى بىلەسىزدەر. باستىسى قازاق ەلىنىڭ جاقسى ازاماتى رەتىندە قالىپتاسسىن دەپ تىلەيمىز.
وسىلايشا, پولشانىڭ گليۆيتسە قالاسىنداعى «بالالار ەۆروۆيدەنيەسى 2019» حالىقارالىق ءان بايقاۋى دا ءوز مارەسىنە جەتتى. تالاي جاس دارىندارعا جول اشقان دودادا 2020 جىلى قايتا جۇزدەسكەنشە دەيىك!
جاندوس اۋەلبەك ۇلى,
ارنايى «Egemen Qazaqstan» ءۇشىن
گليۆيتسە (پولشا)
