توكيوعا بۇل جولعى ساپارىندا ديماش قۇدايبەرگەن جاپونيانىڭ NHK ۇلتتىق ارناسىندا قوناقتا بولىپ, سۇحبات بەردى. بۇل – ديماشتىڭ جاپونياعا العاش كەلۋى. جاپونيالىقتاردىڭ ونى قۋانا قارسى العانىن الەۋمەتتىك جەلىدەگى جازبالارىنان, اۋەجايداعى فوتولارىنان بايقاۋعا بولادى.
جاپونيا اقپاراتتىق پورتالدارىنىڭ بىرقاتارى ديماشتى كۇتىپ الۋعا مىڭعا جۋىق ادامنىڭ جينالعانىن جازادى. «ولار قازاقستاننىڭ تۋىن ۇستاپ, پلاكاتتار جازىپ, دايىندالىپ كەلگەن» دەلىنگەن باسىلىم حابارلامالارىندا.
Billboard Japan پورتالى ديماشتىڭ جاپونيالىقتاردىڭ دا سۇيىكتى انشىسىنە اينالعانىن ايتىپ, ول ءۇشىن ءداستۇرلى فەستيۆالدىڭ ەرەجەسىنە العاش رەت وزگەرىس ەنگىزىلگەنىن حابارلايدى. فەستيۆال زاڭىنا سايكەس, ءار قاتىسۋشى ءوز انا تىلىندە ءان شىرقاۋى كەرەك. دەگەنمەن بايقاۋدىڭ ۇيىمداستىرۋشىلارى ديماشقا ءوزىن كوپتىڭ كوزايىمىنا اينالدىرعان S.O.S d'un terrien en détresse اتتى فرانتسۋز تىلىندەگى ءاندى ورىنداۋىنا رۇقسات بەردى. پورتال حابارلاماسىندا ديماشقا ەرەكشە ءىلتيپات كورسەتىلگەنى, كورەرمەندەردىڭ كوبى ديماشتى كورۋ ءۇشىن جينالعانى جازىلعان.
Stalkfest الەۋمەتتىك جەلىسىندە ديماشقا قاتىستى بىرنەشە جازبا جارىق كورگەن. وندا جاپون حالقىنىڭ ديماشقا ىستىق ىقىلاسى مەن قۇرمەتى تۋرالى جىلى لەبىزدەرىن كورۋگە بولادى. ءبىرى قازاقستاندىق انشىگە شىعارماشىلىق تابىس تىلەسە, ەندى ءبىرى جاپونيادا كونتسەرت وتكىزۋىن سۇراپتى. جەلى قولدانۋشىلارى ءوز جازبالارىندا ديماشتى ۇزاق كۇتكەنىن, سىيلىقتارىن بەرۋگە اسىققانىن جازادى.
ال فەستيۆالدىڭ رەسمي پاراقشاسى Asia-Pacific Broadcasting Union-دا ديماشتىڭ الەمنىڭ 12 تىلىندە ءان سالاتىنىن جازىپتى. سونىمەن قاتار بۇل جەردە كونتسەرتكە قاتىسقان باسقا دا ونەرپازدار تۋرالى اقپارات جاريالانعان. بىزگە تانىستارىنىڭ ىشىندە تۇرىك ءانشىسى مۇستافا ساندال بار. تۇركيا ەسترادا جۇلدىزىنىڭ كونتسەرت سوڭىندا ديماشپەن تۇسىرگەن Instagram جەلىسىندەگى بەينەروليگى كوپتىڭ نازارىن اۋدارىپ, تالقىعا ءتۇستى. مۇستافا ساندال ديماش قۇدايبەرگەندى تۇركياعا شاقىراتىنىن ايتىپ, ىستانبۇلدا كونتسەرت بەرىپ, باۋىرلاس حالىقتى دا قۋانتۋىن سۇرايدى.
ۋكراينالىق ينتەرنەت-پورتال Gorlovka جاپونيالىق ونەرسۇيەر قاۋىمنىڭ ءانشىنى قارسى الۋعا ساقاداي ساي كەلگەنىن حابارلاپ جازادى. اقپاراتقا سۇيەنسەك, ولار اۋەجايعا ونەرپازدىڭ اندەرىن شىرقاپ, سوزدەرىن ارنايى پلاكاتتارعا جازىپ كەلگەن. ال ەڭ باستىسى, توكيو اۋەجايى ءانشى كەلگەن ساتتە حابارلامانى ديماش ءۇشىن ارنايى قازاق تىلىندە جاساعان. مۇنى ەستىگەن تىڭدارماندار ديماشتىڭ «قازاق ءتىلىن الەمگە تانىتسام» دەگەن ارمانىنىڭ ورىندالىپ جاتقانىنا قۋانىشتى.
ديماشتىڭ NHK جاپونيا ۇلتتىق ارناسىنا انا تىلىندە بەرگەن سۇحباتىنا ورالاتىن بولساق, ءانشى جاپونيالىقتارعا العىس ايتىپ, العاشقى ساپارى ۇناپ جاتقانىن جەتكىزەدى. ارنا جۋرناليستەرى تالايدى تامساندىرعان داۋىسىنىڭ قۇپياسىن, ۇستازدارى تۋرالى سۇرايدى. ودان كەيىن الەمنىڭ تالاي ەلىندە ونەر كورسەتىپ, ميلليونداعان تىڭدارماننىڭ سۇيىكتى انشىسىنە اينالعان ءانشىنىڭ ەلىنە دەگەن ەرەكشە قۇرمەتى مەن سۇيىسپەنشىلىگىنە ءتانتى ەكەندەرىن جاسىرمايدى. جاس ءانشى قازاقستاندا تۋىپ, قازاقتىڭ ونەر مەكتەبىنەن ءتالىم العانىنا ماقتاناتىنىن ايتادى. وسى جەردە دومبىرا تۋرالى اڭگىمە ءوربىپ, ديماش اسپاپتىڭ شىعۋ تاريحى تۋرالى اڭگىمەلەپ بەرەدى. سۇحبات سوڭىندا ديماش قۇدايبەرگەن الداعى ۋاقىتتا جاپونيادا دا ۇلكەن كونتسەرت بەرىپ, جاپون حالقىنا دومبىرانىڭ سيقىرلى ءۇنىن ەستىرتكىسى كەلەتىنىن جەتكىزدى.
ديماشتىڭ بۇل ساپارى دا كوپتىڭ كوڭىلىنەن شىققانى انىق. ونىڭ الەمنىڭ تۇكپىر-تۇكپىردەگى جانكۇيەرلەرىنىڭ سانى تاعى بىرنەشە ميلليونعا ارتقانى ءسوزسىز.
