س.وتەباەۆ اتىنداعى اتىراۋ مۇناي جانە گاز ۋنيۆەرسيتەتىنىڭ جانىنان اشىلعان ءۇش قاباتتى وقۋ ورتالىعى زاماناۋي يگىلىكتەرمەن, اقپاراتتىق رەسۋرستارمەن جابدىقتالعان جانە ستۋدەنتتەردى مۇناي-گاز سالاسىنداعى تاجىريبەدەن وتكىزۋگە باعىتتالعان.
اشىلۋ سالتاناتىندا ءداستۇرلى قىزىل لەنتانى نۇرلان بالعىمباەۆتىڭ جۇبايى ناعيما بالعىمباەۆا, اتىراۋ وبلىسىنىڭ اكىمى نۇرلان نوعاەۆ, KAZENERGY قاۋىمداستىعى توراعاسىنىڭ ورىنباسارى ۇزاقباي قارابالين, ەنەرگەتيكا مينيسترلىگىنىڭ ءبىرىنشى ۆيتسە-ءمينيسترى ماحامبەت دوسمۇحامبەتوۆ قيدى.
-بيىل ءبىز قازاقستان مۇنايىنىڭ 120 جىلدىعىن اتاپ وتتىك. بۇل مۇنايشىلاردىڭ وراسان ەڭبەگى. تاۋەلسىزدىك العاننان كەيىن قازاقستان ەكونوميكا سالاسىن جەدەل دامىتا باستادى. وسى قيىن-قىستاۋ كەزەڭدە ازاماتتارىمىزدىڭ باستان وتكەرگەندەرىنىڭ العاشقىسى - ايقىن پەرسپەكتيۆالاردىڭ جوقتىعى, ەكونوميكا مەن ساياسي جۇيەنىڭ كۇيرەۋى ەدى. ەلگە ينۆەستيتسيالار, جاڭا تەحنولوگيالار تارتۋ قاجەت بولدى. قازاقستاننىڭ تۇڭعىش پرەزيدەنتى, ەلباسى نۇرسۇلتان نازارباەۆتىڭ ىنتا-جىگەرىنىڭ ارقاسىندا ەلدىڭ ەكونوميكاسى الەمدەگى ەڭ قارقىندى دامىپ كەلە جاتقان ەكونوميكالاردىڭ ءبىرى مارتەبەسىنە كوتەرىلدى, دەدى نۇرلان نوعاەۆ.
-ەلباسى ەل ەكونوميكاسىنا ينۆەستيتسيا سالا باستاعان ءىرى كومپانيالاردىڭ كەپىلى بولدى. مۇناي-گاز سالاسىنداعى ەلگە كەلگەن العاشقى كومپانيالاردىڭ ءبىرى - وسى كۇنگە دەيىن الەمدەگى ەڭ ءىرى تەڭىز كەن ورىندارىنىڭ ءبىرىن يگەرىپ كەلە جاتقان «شەۆرون» كومپانياسى. سول جىلدارى ەلباسىنىڭ جانىندا سەنىمدى كومەكشىلەرى بولدى. سونىڭ ءبىرى - بالعىمباەۆ نۇرلان وتەپ ۇلى. ونىڭ ءبىلىمى, بىلىكتىلىگى, ىسكەرلىگى ينۆەستورلاردى مۇناي-گاز سالاسىنىڭ كەمەل بولاشاعىنا سەندىرە الدى.
مەملەكەتتىك باسقارۋ جانە ەكونوميكا سالاسىندا ءىرى تۇلعا رەتىندە قالىپتاسقان نۇرلان بالعىمباەۆ بارلىق ءبىلىمى مەن تاجىريبەسىن ەلدىڭ وركەندەۋىنە ارناعان. ەڭبەك جولىن مۇناي سالاسىنداعى قاراپايىم جۇمىسشى رەتىندە باستاپ, بىلىكتىلىگى مەن جوعارى ۇيىمداستىرۋشىلىق قابىلەتتەرىن ۇنەمى جەتىلدىرۋدىڭ ارقاسىندا مانسابىندا ايتارلىقتاي بيىكتەرگە جەتتى. ول پرەمەر-ءمينيستردىڭ لاۋازىمىندا دا اسقان جاۋاپكەرشىلىكپەن قىزمەت اتقاردى.
-مەن نۇرلان وتەپ ۇلىنىڭ وتباسىنا ونىڭ ەستەلىكتەرىن ساقتاپ, ءىسىن ءارى قاراي جالعاستىرىپ قانا قويماي, كەلەشەكتە مۇناي جانە گاز سالاسىندا ەڭبەك ەتەتىن جاس بۋىن مامانداردى قولدايتىن جوبالاردى جۇزەگە اسىرىپ جاتقاندارى ءۇشىن العىس ايتقىم كەلەدى. بايلانىس ورتالىعى ناعىز كاسىبي مامانداردى دايارلايتىن وقىتۋ ورتالىعىنا اينالادى دەپ سەنەمىن. اتىراۋ وبلىسىندا مۇناي-گاز سالاسىنداعى ەڭ ءىرى جوبالار جۇزەگە اسىرىلۋدا. اتىراۋ مۇناي جانە گاز ۋنيۆەرسيتەتىنەن ءبىلىم الىپ, وسى جوبالاردا ەڭبەكتەنەتىن جاس كادرلار جوعارى باعالانادى, دەدى ن. نوعاەۆ.
-مۇنداي زاماناۋي تەحنولوگيامەن جابدىقتالعان ورتالىقتىڭ اشىلۋى ۋنيۆەرسيتەت ءۇشىن ۇلكەن كومەك. سونىمەن قاتار بۇل ۋنيۆەرسيتەت باسشىلىعى مەن وقىتۋشىلارعا ەرەكشە جاۋاپكەرشىلىك جۇكتەيدى.
س.وتەباەۆ اتىنداعى اتىراۋ ۋنيۆەرسيتەتىنىڭ ديرەكتورلار كەڭەسىنىڭ توراعاسى, KAZENERGY قاۋىمداستىعى توراعاسىنىڭ ورىنباسارى ۇزاقباي قارابالين نۇرلان بالعىمباەۆتىڭ قازاقستانداعى مۇناي-گاز سالاسىن دامىتۋعا قوسقان ۇلەسى تۋرالى ايتتى.
-ول ومىرىندە قيىن كەزەڭدەردى باستان كەشىردى. سوعان قاراماستان ءوزىنىڭ ەڭبەكتەرىمەن جانە بىلىمىمەن تاۋەلسىز قازاقستاننىڭ دامۋىنا ۇلكەن ۇلەس قوستى. ونىڭ ەسىمى ءاردايىم جۇرەگىمىزدە ساقتالاتىن بولادى. بۇگىنگى ءىس-شارا, مۇناي جانە گاز ۋنيۆەرسيتەتىندە كوممۋنيكاتسيالىق ورتالىقتىڭ اشىلۋى - سونىڭ ايقىن دالەلى. بۇل زاماناۋي وقۋ ورتالىعى قازىرگى جاس ۇرپاقتارعا قاجەت كاسىبي ءبىلىم الۋعا جانە ەلىمىزدىڭ يگىلىگى ءۇشىن جۇمىس ىستەۋگە مۇمكىندىك بەرەدى, دەدى ۇ.قارابالين.
سونداي-اق اتالعان شارادا ەنەرگەتيكا مينيسترلىگىنىڭ ءبىرىنشى ۆيتسە-ءمينيسترى, «اتامەكەن» ۇكپ مۇناي جانە گاز ونەركاسىبى كوميتەتىنىڭ توراعاسى, «قازمۇنايگاز», تشو, نكوك وكىلدەرى مەن مۇناي سالاسىنىڭ ارداگەرلەرى ءسوز سويلەدى.
اشىلۋ سالتاناتى سوڭىندا شاقىرىلعان قوناقتار عيماراتتى ارالاپ, ورتالىقتىڭ مۇمكىندىكتەرىمەن جەتە تانىستى. مۇندا ستۋدەنتتەرگە ارنالعان ينتەراكتيۆتى كىتاپحانا جانە وقۋ زالى بار. ورتالىقتىڭ ينتەراكتيۆتى كىتاپحاناسىن پايدالانۋشىلار گۋبكين اتىنداعى رەسەي مۇناي جانە گاز ۋنيۆەرسيتەتىنىڭ ەلەكتروندى رەسۋرستارىنا قول جەتكىزە الادى. سونىمەن قاتار اتىراۋ ۋنيۆەرسيتەتىنىڭ ستۋدەنتتەرى سۋ استىنداعى قۇبىرلاردى دانەكەرلەۋ ءۇشىن ۆيرتۋالدى رەجيمدە تاجىريبەدەن وتە الادى. بۇدان بۇرىن قاشاعان جوباسىندا سۋ استىنداعى قۇبىرلاردى دانەكەرلەۋدى شەتەلدىك ماماندار جۇزەگە اسىرسا, ەندىگىدە ورتالىق اتالعان ماماندىقتى اتىراۋلىق جاستارعا ۇيرەتەتىن بولادى.
جوبا اۆتورلارى اتاپ وتكەندەي, مۇنداي ورتالىقتار تمد ەلدەرىندە تەك گۋبكين اتىنداعى رەسەي مەملەكەتتىك مۇناي جانە گاز ۋنيۆەرسيتەتى مەن «يننوپوليس» ۋنيۆەرسيتەتىندە ورنالاسقان. بىراق اتىراۋداعى ورتالىق زاماناۋي تەحنولوگيالارمەن جابدىقتالۋ تۇرعىسىنان الدەقايدا باسىم تۇسەدى.
