سەناتورلار ماكسين قۇس فابريكاسىنا, «KazBeef Processing», «AgrimerAstyk» سەرىكتەستىكتەرىندە بولدى جانە اۋىل شارۋاشىلىعى ونىمدەرىن قايتا وڭدەۋ ماسەلەلەرى بويىنشا كەڭەس وتكىزدى.
شاراعا اۋىل شارۋاشىلىعى, يندۋستريا جانە ينفراقۇرىلىمدىق دامۋ, دەنساۋلىق ساقتاۋ, ساۋدا جانە ينتەگراتسيا مينيسترلىكتەرىنىڭ باسشىلارى, ۇەۇ وكىلدەرى, اۋىل شارۋاشىلىعى ونىمدەرىن وندىرۋشىلەر قاتىستى.
سەناتتىڭ اگرارلىق ماسەلەلەر, تابيعاتتى پايدالانۋ جانە اۋىلدىق اۋماقتاردى دامىتۋ كوميتەتىنىڭ توراعاسى ءالي بەكتاەۆ ەۋرازيالىق ەكونوميكالىق وداق پەن دۇنيەجۇزىلىك ساۋدا ۇيىمىنا قازاقستان رەسپۋبليكاسىنىڭ مۇشە بولۋى ىشكى جانە سىرتقى نارىقتاردا جاڭا مۇمكىندىكتەرمەن قاتار باسەكەگە قابىلەتتىلىككە جوعارى تالاپتار قوياتىنىن اتاپ ءوتتى. ءا.بەكتاەۆ وسىعان بايلانىستى اگروونەركاسىپ كەشەنىن مەملەكەتتىك رەتتەۋدىڭ ءرولى وتە ماڭىزدى دەپ سانايدى. ول 28 قازاندا مەملەكەت باسشىسى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە اگروونەركاسىپتىك كەشەندى رەتتەۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا قول قويعانىن, ول قۇجاتتىڭ ماقساتى اگروونەركاسىپتىك كەشەندەگى مەملەكەتتىك ساياساتتىڭ تيىمدىلىگىن ارتتىرۋ جانە 2017-2021 جىلدارعا ارنالعان اوك دامىتۋ مەملەكەتتىك باعدارلاماسىنىڭ نەگىزگى ەرەجەلەرىن ىسكە اسىرۋدى قامتاماسىز ەتۋ ەكەنىن حاباردار ەتتى.
«مەملەكەت باسشىسى ق.توقاەۆ اعىمداعى جىلدىڭ 2 قىركۇيەگىندەگى قازاقستان حالقىنا جولداۋىندا اۋىل شارۋاشىلىعى ونىمدەرى ەكسپورتىنىڭ شيكىزات باعىتىنىڭ 70%-عا جەتكەنىن, ال قايتا وڭدەۋ كاسىپورىندارى بارلىعى 40%-عا ارتقانىن ەرەكشە اتاپ ءوتتى», دەدى سەنات كوميتەتىنىڭ توراعاسى.
ستاتيستيكالىق دەرەكتەرگە سايكەس, 2018 جىلى ەت ونىمدەرىن جانە ءسۇت ونىمدەرىن قايتا وڭدەۋ سالاسىندا وندىرىستىك قۋاتتاردىڭ جۇكتەلۋى 64%-عا جۋىق; ۇن تارتۋ ونەركاسىبىندە - 35-38 %; جارما وندىرىسىندە - 43 %; ماكارون وندىرىسىندە - 51% بولىپ وتىر.
كورسەتىلگەن سالالارداعى نەگىزگى پروبلەمالاردىڭ قاتارىنا: شيكىزات ەكسپورتىنىڭ جوعارى ۇلەسى; شيكىزات ساتىپ الۋعا اينالىم قاراجاتىنىڭ جەتكىلىكسىزدىگى; تەحنولوگيالىق جابدىقتىڭ توزۋى; دايىن ءونىمدى ەكسپورتتاۋ كەزىندە تەمىرجولدىڭ جوعارى ءتاريفى; گمو جانە باسقا دا ونىمدەردى اكەلۋگە باقىلاۋدىڭ بولماۋى جاتادى.
«وسى جانە باسقا دا وبەكتيۆتى سەبەپتەر اۋىل شارۋاشىلىعىندا قايتا وڭدەۋ سالاسىنىڭ دامۋىنا ءوز اسەرىن تيگىزەدى», دەپ اتاپ ءوتتى ءا.بەكتاەۆ.
كەزدەسۋ بارىسىندا وسى سالانىڭ وزەكتى ماسەلەلەرىن تالقىلاۋ بويىنشا قىزۋ پىكىرتالاس ءوتتى. سەناتورلار مەن اۋىل شارۋاشىلىعى ونىمدەرىن وندىرۋشىلەر وزدەرىنىڭ ەسكەرتۋلەرى مەن ۇسىنىستارىن ايتتى جانە ول بۇدان بىلايعى جۇمىس بارىسىندا پىسىقتالىپ, ەسكەرىلەتىن بولادى.
