ۇكىمەت • 16 قاراشا، 2019

اسقار مامين جۇمىس ساپارىمەن پاۆلودار وبلىسىنا باردى

16 رەتكورسەتىلدى

قر پرەمەر-ءمينيسترى اسقار مامين ەلباسى نۇرسۇلتان نازارباەۆ باستاماشى بولعان يندۋستريالىق-يننوۆاتسيالىق دامۋ مەملەكەتتىك باعدارلاماسىنىڭ، سونداي-اق، مەملەكەت باسشىسى قاسىم-جومارت توقاەۆتىڭ پاۆلودار وبلىسىنىڭ ونەركاسىپتىك الەۋەتىن دامىتۋ جونىندەگى تاپسىرماسىنىڭ ىسكە اسىرىلۋىن باقىلاۋ اياسىندا وڭىرگە جۇمىس ساپارىمەن باردى.

پاۆلودار قالاسىندا ۇكىمەت باسشىسى ەلىمىزدەگى بىردەن ءبىر مەتيل-ترەت-بۋتيل ەفير جانە پوليپروپيلەن ءوندىرىسى – «كومپانيا نەفتەحيم LTD» جشس-نا، سونداي-اق، «قازاقتەلەكوم» اق-نىڭ دەرەكتەردى وڭدەۋگە جانە ساقتاۋعا ارنالعان سەرۆەرلەرمەن جابدىقتالعان وزىق دەرەكتەردى وڭدەۋ ورتالىعىنا ء(دوو) باردى. مۇندا «سامۇرىق-قازىنا» ۇاق» اق، «قازاتومونەركاسىپ» ۇاك»، «قازمۇنايگاز» ۇك»، «قازپوشتا»، ء«ساتتى جۇلدىز» جانە «Google»، «Wargaming»، «Genesis Mining» حالىقارالىق كورپوراتسيالارى ەلەكتروندى دەرەكتەرىن ورنالاستىرىپ، جۇيەلەپ، رەزەرۆكە قويادى.

پرەمەر-مينيستر پاۆلودار قالاسىنداعى دەنساۋلىق ساقتاۋ جانە سپورت نىساندارىنىڭ سالىنۋ بارىسىمەن تانىستى، ونىڭ ىشىندە بيىل 1 جەلتوقساندا پايدالانۋعا بەرۋ كوزدەلگەن 200 توسەك-ورىندىق وبلىستىق ونكولوگيالىق ديسپانسەر مەن تاۋلىگىنە 100 كەلۋگە ارنالعان ەمحانا، سونداي-اق، مۇز ارەناسىن، فۋتبول جانە جابىق جەڭىل اتلەتيكا مانەجدەرىن، وليمپيادالىق رەزەرۆكە دايىنداۋ ورتالىعىن قامتيتىن «سپورت-سيتي» سپورت قالاشىعى بار.

«ينۆەستورلار ۇيىندە» ا. مامينگە پاۆلودار وبلىسىنا ينۆەستيتسيالار تارتۋ جۇمىستارى تانىستىرىلدى. مۇندا كەز كەلگەن بيزنەسمەن ء«بىر تەرەزە» قاعيداتى بويىنشا قىزمەتتەر مەن كونسۋلتاتسيالار الا الادى — «Kazakh Invest»، «پاۆلودار» اەا» باسقارۋشى كومپانياسىنىڭ، «اتامەكەن» وڭىرلىك كاسىپكەرلەر پالاتاسىنىڭ، «قازاگروقارجى» اق، «اگرارلىق نەسيە كورپوراتسياسى»، «اۋىل شارۋاشىلىعىن قارجىلاي قولداۋ قورى» جانە «دامۋ» كاسىپكەرلىكتى دامىتۋ قورىنىڭ» كەڭسەلەرى ءبىر الاڭدا جۇمىس ىستەيدى.

ۇكىمەت باسشىسىنا ەكىباستۇز قالاسىنىڭ يندۋستريالىق ايماعىندا قۋاتتىلىعى جىلىنا 35 مىڭ توننانى قۇرايتىن تەحنيكالىق كرەمني ءوندىرۋ زاۋىتىنىڭ سالىنۋ بارىسى تۋرالى باياندالدى، سونداي-اق، سۋارۋ ءۇشىن اسا اۋقىمدى جابدىقتار شىعاراتىن زاۋىت قۇرىلىسىنىڭ جوباسى تانىستىرىلدى.

اقسۋ قالاسىندا پرەمەر-مينيستر كاسىپكەرلىكتى قولداۋ كارتاسى اياسىندا وڭىردەگى بيىلعى اسا ءىرى جوبا — «ەۋرازيالىق ەنەرگەتيكا كورپوراتسياسى» اق اقسۋ ەلەكتر ستانتسياسىنىڭ رەكونسترۋكتسيالانعان №5 ەنەرگوبلوگىمەن تانىستى، ونى بيىل جەلتوقسان ايىندا پايدالانۋعا بەرۋ جوسپارلانعان.

ا. مامين پاۆلودار وبلىسىنداعى اسا ءىرى جانە جۇيە قۇراۋشى كاسىپورىنداردىڭ ءبىرى — «قازحروم» تۇك» اق فيليالى اقسۋ فەرروقورىتپا زاۋىتىن ارالاپ، وندا بالقىتۋ پەشتەرىنىڭ رەنوۆاتسياسى بارىسىمەن تانىستى، بۇل 2024 جىلعا قاراي فەرروحروم ءوندىرىسىنىڭ كولەمىن 2018 جىلعى كورسەتكىشتەرمەن سالىستىرعاندا 87%-عا ارتتىرۋعا مۇمكىندىك بەرەدى. بۇل ورايدا ەلەكتر ەنەرگياسىن تۇتىنۋ 20%-عا تومەندەيدى.

ۇكىمەت باسشىسى اقسۋ قالاسىنداعى تىرشىلىكتى قامتاماسىز ەتۋ جانە الەۋمەتتىك ينفراقۇرىلىم نىساندارىن — سالىنىپ جاتقان قالالىق جىلۋ قازاندىعى مەن بالالار ەكو-تەحنو ورتالىعىن تەكسەردى.

جىل باسىنان بەرى پاۆلودار وبلىسىندا ونەركاسىپتىك ءونىم ءوندىرىسىنىڭ كولەمى 1،6 ترلن تەڭگەنى قۇرادى، بۇل وتكەن جىلعى كەزەڭنەن 19 ملرد تەڭگەگە نەمەسە 1،8%-عا ارتىق. رەسپۋبليكالىق وڭدەۋ كولەمىنىڭ 12%-عا جۋىعىن قامتاماسىز ەتىپ وتىرعان وڭدەۋ سەكتورىنىڭ كاسىپورىندارى دا تۇراقتى ءوسىم كورسەتتى. مۇناي وڭدەۋ ونىمدەرىنىڭ ءوندىرىسى 3،1%-عا، مەتاللۋرگيا ءوندىرىسى 2،1%-عا، حيميا ءوندىرىسى 8،9%-عا، ماشينا جاساۋ ءوندىرىسى 5،3%-عا وسۋدە.

 

سوڭعى جاڭالىقتار

اۋىر اتلەتتەر كاتارعا اتتانادى

اۋىر اتلەتيكا • كەشە

كوپبالالىلارعا كومەك

ايماقتار • كەشە

كۇلكى كەرۋەنى № 22

رۋحانيات • كەشە

فاريزا اقىننىڭ ۇستازى

رۋحانيات • كەشە

ۇقساس جاڭالىقتار