Brand Financ كومپانياسى ساراپشىلارىنىڭ ايتۋىنشا, ەلدىڭ برەندى ونىڭ حالىقارالىق ابىروي-بەدەلىنە ىقپال ەتەدى, بۇگىنى مەن بولاشاعىن كورسەتەدى. سول مەملەكەتتىڭ الەۋمەتتىك-ەكونوميكالىق جاعدايىن, الەمدىك ەكونوميكادا باسەكەگە قانشالىقتى قابىلەتتى ەكەنىن دە بىلۋگە بولادى.
سونىمەن, بيىل دامۋشى ەلدەردىڭ ۇلتتىق برەندىنىڭ ءوسىم قارقىنى دامىعان ەلدەردەن جوعارى ەكەنى بايقالادى. دامۋشى ەلدەردە بۇل كورسەتكىش 13,9 پايىز بولسا, دامىعان ەلدەردە بار-جوعى 0,4 پايىز شاماسىندا.
رەيتينگتىڭ كوش باسىندا جىلداعىداي اقش, قىتاي, گەرمانيا ۇشتىگى تۇر. اقش برەندىنىڭ قۇنى 27,8 ترلن دوللار بولسا, قىتاي برەندى 19,5 ترلن دوللارعا باعالاندى. گەرمانيا برەندىنىڭ باعاسى – 4,9 ترلن دوللار. ۇزدىك بەستىكتى جاپونيا (4,5 ترلن دوللار) مەن ۇلىبريتانيا (3,9 ترلن دوللار) تۇيىندەيدى. توپ-10 ۇلتتىق برەند تىزىمىنە فرانتسيا, ءۇندىستان, كانادا, وڭتۇستىك كورەيا جانە يتاليا ەنگەنىن ايتا كەتۋ كەرەك.
قازاقستان بيىل الەمدەگى ەڭ قىمبات ۇلتتىق برەندتەردىڭ تىزىمىندە بىلتىرعى 51-ورىننان 7 ساتىعا كوتەرىلىپ, 44-ورىنعا تۇراقتادى. بۇعان دەيىن ءبىزدىڭ ەل بۇل رەيتينگتە مۇنشالىقتى كوتەرىلىپ كورمەگەن. پورتۋگاليا, رۋمىنيا, ۆەنگريا, سلوۆاكيا سىندى ەۋروپانىڭ بىرقاتار ەلى بىزدەن تومەنگى ساتىعا ورنالاسىپتى. ۇلتتىق برەند قۇنىنىڭ كوتەرىلۋ قارقىنى بويىنشا دا ەلىمىز 8-ورىندا تۇر.
ۇلتتىق برەندتەردى ەسەپتەۋدە نەگىزىنەن ەكونوميكالىق, دەموگرافيالىق جانە ساياسي فاكتورلارعا باسىمدىق بەرىلەدى. ينۆەستيتسيا كورسەتكىشتەرى, تۋريستەرگە تارتىمدىلىعى دا نازارعا الىنادى.
