تسيفرلىق دامۋ ءمينيسترى كەزدەسۋدە اتاپ وتكەندەي, تسيفرلىق كوميسسارلاردىڭ باسقا مەملەكەتتىك ورگانداردىڭ مەملەكەتتىك قىزمەتتەرىنە قاتىستى بەرگەن ۇسىنىستارىن ۆەدومستۆوارالىق كوميسسيالاردا قاراۋ جوسپارلانعان.
«كەيبىر ماسەلەلەردى ۆەدومستۆوارالىق كوميسسيانىڭ قاراۋىنا ەنگىزەمىز, ويتكەنى ولار باسقا مەملەكەتتىك ورگانداردىڭ قۇزىرىنا جاتادى. مىسالى, كەيبىر اتا-انالار شەت ەلدە تۋعان جانە تۋ تۋرالى كۋالىكتى شەت ەلدە العان بالالارى ءۇشىن مەملەكەتتىك قىزمەتتەردى الا المايدى. بۇل ماسەلەنى ۆاك شەڭبەرىندە شەشۋ قاجەت», دەپ اتاپ ءوتتى جۇماعاليەۆ.
مينيسترمەن كەزەكتى كەزدەسۋگە تسيفرلىق كوميسسارلار پروبلەمالىق ماسەلەلەر مەن ۇسىنىستارىن ازىرلەپ كەلگەن ەكەن. نەگىزىنەن, ولار اۆتوكولىكتى تىركەۋ, جۇرگىزۋشى كۋالىگىن ونلاين الۋ, ەمحانالارعا تىركەلۋ, كەيبىر ە-قىزمەتتەر مەن ينتەرفەيستەگى كەمشىلىكتەرگە قاتىستى بولدى. مينيستر بۇلاردىڭ ارقايسىسى بويىنشا جۇمىس جۇرگىزىلەتىنىن جەتكىزدى.
كەزدەسۋدە جۇماعاليەۆ سونداي-اق ازاماتتارعا ارنالعان ۇكىمەتپەن, ىشكى ىستەر مينيسترلىگىمەن, «قازپوشتا» اق جانە «ۇات» اق بىرلەسىپ, اۆتوكولىكتى تىركەۋ قىزمەتىن ونلاين الۋدا تەحنيكالىق پاسپورت پەن مەملەكەتتىك ءنومىردى مامانداندىرىلعان حقكو-عا بارماي, ۇيگە جەتكىزىپ بەرۋ مۇمكىندىگى قاراستىرىلىپ جاتقانىن ايتتى.
كەلەسى كەزدەسۋلەردە ناقتى سالالار بويىنشا شەشىمىن كۇتكەن ماسەلەلەردى ءتيىستى مينيسترلىكتەر مەن وكىلدەردى شاقىرا وتىرىپ, تالقىلاۋ تۋرالى شەشىم قابىلداندى.
2019 جىلعى قىركۇيەكتە قازاقستان رەسپۋبليكاسىنىڭ تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىندە قوعامنىڭ بەلسەندى ازاماتتارى, جۋرناليستەر مەن بلوگەرلەر قاتارىنان «تسيفرلىق كوميسسارلار» دەپ اتالاتىن ارنايى توپ قۇرىلعانىن ەستەرىڭىزگە سالىپ وتكىمىز كەلەدى. تسيفرلىق كوميسسارلار تاۋەلسىز باقىلاۋشى رەتىندە «تسيفرلىق قازاقستان» مەملەكەتتىك باعدارلاماسى اياسىندا ىسكە اسىرىلىپ جاتقان مەملەكەتتىك ورگانداردىڭ جوبالارى مەن باستامالارىنا قوعامدىق نەگىزدە مونيتورينگ جۇرگىزەدى.
