جۋىردا Freedom Finance Insurance ساقتاندىرۋ كومپانياسىنىڭ ماماندارى جۇرگىزگەن زەرتتەۋ بارىسىندا ەلىمىزدىڭ قاي اۋماعىندا اۆتوكولىكتىڭ كوبىرەك ەكەنى جانە قازاقستاندىقتاردىڭ نەگىزىنەن قانداي كولەمدەگى قوزعالتقىشتى تاڭدايتىنى انىقتالدى.
ستاتيستيكا كوميتەتىنىڭ مالىمەتى بويىنشا, 2019 جىلدىڭ تامىز ايىندا قازاقستاندا 3 698 309 اۆتوكولىك تىركەلگەن. بۇل وتكەن جىلمەن سالىستىرعاندا, 5,5%-عا كەم. ەڭ كوپ اۆتوكولىك الماتى وبلىسىندا تىركەلدى. بۇگىندە جەتىسۋ جەرىندە 489 294 كولىك جۇيتكىپ ءجۇر. ال ەكىنشى ورىندا – الماتى قالاسى. الاتاۋدىڭ باۋرايىنداعى الىپ شاھار كوشەلەرىندە كۇندەلىكتى قالا تۇرعىندارىنا تيەسىلى 466 886 كولىك جولعا شىعادى. ۇزدىكتەر ۇشتىگىنىڭ سوڭىندا شىعىس قازاقستان وبلىسى تۇر. وندا 296 080 اۆتوماشينا تىركەلگەن.
نازار اۋداراتىن دۇنيە, ەلىمىزدەگى اۆتوماشينالاردىڭ شىعارىلعان مەرزىمى كوبىنەسە 10 جىلدان استام ۋاقىتتى قۇرايدى. بۇل – 64,8%-عا تەڭ. 3 جىل مەن 7 جىل ارالىعىندا شىققان ماشينالار سانى مۇلدەم از, تىركەلگەن كولىكتەردىڭ جالپى سانىنا شاققاندا بار بولعانى – 15,7%-دى قۇرايدى. ال شىعارىلعان جىلى 3 جىلدان اسپايتىن كولىكتەر سانى ەلىمىزدە ءتىپتى از – 10,4%.
كولىك قوزعالتقىشتارىنىڭ كولەمى ليترمەن نەمەسە تەكشە سانتيمەترمەن ولشەنەدى. Freedom Finance Insurance زەرتتەۋلەرى ناتيجەسىندە, قازاقستاندىق اۆتوكولىك يەلەرىنىڭ كوبىسى قوزعالتقىش كولەمى
1 500-2 مىڭ تەكشە سانتيمەتردى قۇرايتىن كولىكتەردى تاڭدايتىنى بەلگىلى بولدى. قازاقستاندا مۇنداي قوزعالتقىش كولەمى بار اۆتوكولىك سانى – 1 711 633, بۇل تىركەلگەن بارلىق ماشينالار سانىنىڭ جارتىسىن قۇرايدى (46,3%). اتالعان قوزعالتقىش كولەمى بار كولىكتىڭ كوبى اقمولا (217 459), اقتوبە (173 652) جانە اتىراۋ وبلىستارىندا (141 520 اۆتوماشينا) تىركەلگەن. سونداي-اق تانىمالدىلىعى بويىنشا ەكىنشى ورىندا – قوزعالتقىش كولەمى 1100-1500 تەكشە سانتيمەتردى قۇرايتىن اۆتوكولىكتەر ەكەنى انىقتالدى. ەلىمىزدە بۇل ساناتتاعى اۆتوكولىكتەر سانى – 667 951 (18,1%). وسى كولەمدەگى كولىكتەردى كوبىنەسە اقمولا (77 855), الماتى (72 989) جانە جامبىل (64 221) وبلىستارىنىڭ تۇرعىندارى يەلەنەدى. البەتتە, اتالعان قوزعالتقىش كولەمى بار اۆتوكولىكتەر قالا ىشىندە پايدالانۋعا وتە قولايلى. سەبەبى قالاداعى اۆتوكولىك يەلەرىنە ماشينانىڭ قۋاتى ەمەس, وتىن جاعۋ شىعىسى ماڭىزدى. تانىمالدىلىعى بويىنشا ءۇشىنشى ورىندا – قوزعالتقىش كولەمى 2 مىڭ – 2 500 تەكشە سانتيمەترگە دەيىنگى اۆتوكولىكتەر قۇرايدى. ستاتيستيكا كوميتەتىنىڭ مالىمەتى بويىنشا, اۆتوكولىك يەلەرىنىڭ 16,7%-ى اتالعان كولەمدەگى قوزعالتقىشقا يە ماشينالاردى تاڭدايدى. بۇل نەگىزىنەن اقمولا وبلىسىندا (104 066), اقتوبە وبلىسىندا (96 189) جانە باتىس قازاقستان وبلىسىندا (48 002) كەڭىنەن تارالعان. ەڭ از تارالعان قوزعالتقىش كولەمىنىڭ ءۇش ءتۇرى: 3 مىڭ – 4 مىڭ تەكشە سانتيمەتر (3,3%), 4 مىڭ – 10 مىڭ تەكشە سانتيمەتر (1,9%) جانە 1 100 تەكشە سانتيمەترگە دەيىنگى (1,3%) كولىكتەر. زەرتتەۋ بارىسىندا ورتا ستاتيستيكالىق قازاقستاندىق كولىك يەسى قوزعالتقىش كولەمى شامامەن 1 100 بەن 2 500 تەكشە سانتيمەتر ارالىعىنداعى ماشينانى تاڭدايتىنى انىقتالدى. مۇنداي قوزعالتقىش كولەمى بار ماشينالار قالادا جۇرۋگە جايلى جانە ۇنەمدى بولىپ شىقتى.
سونداي-اق قوزعالتقىش ۇلگىسى مەن كولەمى اۆتوكولىكتەردىڭ دارەجەسىن بايقاتاتىن سىنىبىنا دا اسەر ەتەتىنىن ايتۋعا بولادى. جەڭىل اۆتوكولىكتەر قوزعالتقىش كولەمىنە سايكەس بەس سىنىپقا بولىنەدى:
- ىقشامليتراجدى نەمەسە شاعىن-اۆتوموبيل (1 200 تەكشە سانتيمەترگە دەيىن).
- شاعىن سىنىپ (1 200 – 1 800 تەكشە سانتيمەترگە دەيىن).
- ورتاشا سىنىپ (1 800 – 3 500 تەكشە سانتيمەترگە دەيىن).
- سپورت اۆتوماشينالارى (3 500 تەكشە سانتيمەتردەن باستاپ).
- جوعارى سىنىپتى اۆتوماشينالار ء(ارتۇرلى كولەمدى).
«قوزعالتقىش كولەمى وتىن شىعىسىنا جانە اۆتوكولىك قۇنىنا اسەر ەتەدى. كولىكتىڭ قوزعالتقىشى نەعۇرلىم قۋاتتى بولسا باعاسى دا قۇندى. ودان باسقا, كەيبىر ەلدەردە, بۇل ساقتاندىرۋ قۇنىنا دا ىقپال ەتەدى. مىسالى, رەسەيدە مىندەتتى اۆتوساقتاندىرۋ ءپوليسىن رەسىمدەۋ كەزىندە قىمباتقا ءتۇسۋى ىقتيمال. قازاقستاندى الاتىن بولساق, وگپو ءپوليسىن رەسىمدەۋ بارىسىندا, قوزعالتقىش كولەمى ەسكەرىلمەيدى. دەمەك, كەيبىر ساقتاندىرۋ كومپانيالارى, كاسكو ەرىكتى اۆتوساقتاندىرۋ ءپوليسىن رەسىمدەۋ كەزىندە اتالعان فاكتوردى ەسكەرۋى مۇمكىن», دەپ تۇسىندىرەدى Freedom Finance Insurance ساقتاندىرۋ كومپانياسى.
