بايقاۋدا قازاقستان رەسپۋبليكاسىنىڭ تۇڭعىش پرەزيدەنتى – ەلباسى ن.ءا. نازارباەۆتىڭ 2019 جىل جاستار جىلى دەپ جاريالانۋىنا جانە سۇگىر جىراۋ بەگەندىك ۇلىنىڭ 125 جىلدىق مەرەيتويىنا وراي تاقىرىپتىق باعىتتارداعى شىعارمالاردى ەلىمىزدىڭ 14 وبلىسىنان جانە نۇر-سۇلتان, الماتى, شىمكەنت قالالارىنان ءبىر-ءبىر ۇمىتكەرلەر ورىنداپ, ءوز باقتارىن سىنايدى.
ۇيىمداستىرۋشىلاردىڭ ايتۋىنشا, ۇلتتىق تاربيە مەن حالىقتىق ونەردى ناسيحاتتاۋعا باعىتتالعان بۇل بايقاۋدىڭ باستى ماقساتى جاڭا جىر-تەرمەلەردى تۋدىرۋ ارقىلى جىرشىلىق, تەرمەشىلىك ونەرگە جاڭاشا سەرپىن بەرۋ جانە ادەبي ءتىلدى دامىتۋعا, ءتىل مادەنيەتىن جەتىلدىرۋگە ۇلەس قوسۋ.
ءىس-شاراعا ونەرتانۋشىلار, جىرشى-تەرمەشىلەر, قوعام قايراتكەرلەرى, زيالى قاۋىم وكىلدەرى قاتىسادى.
جىرشى-تەرمەشىلەرمەن بىرگە تانىمال انشىلەر ونەر كورسەتەتىن بايقاۋ 9 قاراشا كۇنى قىزىلوردا قالاسى ا.توقماعامبەتوۆ اتىنداعى مادەنيەت ۇيىندە وتەدى.
