كونفەرەنتسيا اياسىندا قازاقستانداعى ماي ءوندىرىسىن دامىتۋدىڭ جاعدايى مەن پەرسپەكتيۆالارى, الەمدىك نارىقتاعى سۇرانىسى سياقتى ماسەلەلەر قارالدى. جيىن بارىسىندا اۋىل شارۋاشىلىعى ءمينيسترى ساپارحان وماروۆ بايانداما جاساپ, سوڭعى 10 جىلدا مايلى داقىلدار القابىنىڭ كولەمى 2,5 ەسەگە وسكەنىن جەتكىزدى.
«سوڭعى 10 جىلدا مايلى داقىلدار القابىنىڭ كولەمى 2,5 ەسەگە وسكەن. وسىمگە زىعىر القاپتارىن 5 ەسەگە, سويا القاپتارىن 2 ەسەگە, ماقسارى مايىن 39 پايىزعا كەڭەيتۋ ناتيجەسىندە قول جەتكىزىلدى. تۇراقتى سۇرانىس ارقىلى مايلى داقىلداردىڭ ەكسپورتى جىل سايىن ارتىپ كەلەدى. بۇگىندە ءبىز مايلى داقىلداردىڭ 40 پايىزىن شيكىزات تۇرىندە ەكسپورتتايمىز. 2018 جىلى شيكىزات ەكسپورتىنىڭ كولەمى 2017 جىلمەن سالىستىرعاندا 21,6 پايىزعا, 2016 جىلمەن سالىستىرعاندا 73,4 پايىزعا ءوسىپ, 1 ملن توننانى قۇرادى», دەدى س.وماروۆ.
مينيسترلىكتىڭ مالىمەتىنشە, بۇگىندە رەسپۋبليكادا جالپى قۋاتى جىلىنا 2 ملن توننا مايلى داقىلداردى وڭدەيتىن 52 كاسىپورىن بار ەكەن. اعىمداعى جىلدىڭ 9 ايىندا تازارتىلعان جانە تازارتىلماعان مايلاردىڭ ءوندىرىسى وتكەن جىلدىڭ وسى كەزەڭىمەن سالىستىرعاندا 32,4 پايىزعا ارتىپ, 343,5 مىڭ توننانى قۇراعان. سوڭعى 5 جىلدا تازارتىلماعان زىعىر مايىن ءوندىرۋ 34 ەسەگە ارتقان. اۋىل شارۋاشىلىعى ءمينيسترى الداعى ۋاقىتتا دايىن ونىمدەردى ەكسپورتتاۋ مىندەتى تۇرعانىن, وسى ماسەلەنى شەشۋ ءۇشىن تىڭايتقىشتارعا, تۇقىمدار مەن گەربيتسيدتەرگە جەڭىلدەتىلگەن كرەديت بەرىپ, سونداي-اق, سۋبسيديالاردى قارجىلاندىرۋ ارقىلى اتالعان سالانى قولداۋ جالعاساتىنىن ايتتى.
كونفەرەنتسيا باعدارلاماسى ءۇش نەگىزگى سەسسيادان تۇردى. ءبىرىنشىسى, «قازاقستاننىڭ ماي سالاسىن دامىتۋدىڭ قازىرگى جاعدايى جانە بولاشاقتاعى دامىتۋ ستراتەگياسى», ەكىنشىسى, «ماي جانە قايتا وڭدەۋ نارىعىنىڭ 2019/2020 جىلعى پەرسپەكتيۆالارى» جانە «ماي داقىلدارى ءوندىرىسىنىڭ بولاشاعى». سونداي-اق «قازاقستان الەمدىك ماي داقىلدارى نارىعىنىڭ نەگىزگى ۇردىستەرى, تۇتىنۋ نارىقتارى» اتتى پىكىرتالاس الاڭى جۇمىس ىستەدى. باسقوسۋ بارىسىندا ماي نارىعى باعىتىنىڭ وزەكتى ماسەلەلەرىن تالقىلاۋ ءۇشىن بىرقاتار تانىمال قازاقستاندىق جانە شەتەلدىك ساراپشىلار ءسوز سويلەدى.
سولاردىڭ ىشىندە «قازاقستان ماي-توڭماي وداعى» قاۋىمداستىعى» زتب پرەزيدەنتى كونستانتين نەۆزوروۆ مايلى داقىلدار سالاسىن دامىتۋ قارقىنى تۋرالى باياندادى.
«اۋىل شارۋاشىلىعى مينيسترلىگىمەن 2030 جىلعا دەيىن ماي-توڭماي سالاسىن دامىتۋ باعدارلاماسىن ازىرلەۋ بويىنشا بىرلەسكەن جۇمىس باستالدى. مينيسترلىك بازاسىندا جۇمىس توبى قۇرىلدى. وعان ءىرى زاۋىتتار دا قاتىسىپ جاتىر. جالپى, بۇل باعىتتا سالاداعى جاعدايعا اۋقىمدى تالداۋ جاساپ, پروبلەمالاردى ايقىندادىق», دەدى ك.نەۆزوروۆ. ونىڭ سوزىنە قاراعاندا, مايلى داقىلدارعا ارنالعان ەگىستىڭ اۋماعى ايتارلىقتاي ارتادى. «سالانى دامىتۋ باعدارلاماسىندا 2019-2021 جىلدار ءبىرىنشى كەزەڭ, 2022-2025 جىلدار – ەكىنشى كەزەڭ, 2026-2030 جىلدار – ءۇشىنشى كەزەڭ رەتىندە بەلگىلەندى. وسى ورايدا ءبىز ءوزىمىزدى مايلى داقىلدارمەن, وسىمدىك مايىمەن تولىقتاي قامتاماسىز ەتىپ, دايىن ءونىم ەكسپورتىنا جان-جاقتى شىعامىز. 2030 جىلعا قاراي مايلى داقىلداردىڭ ەگىستەرى 5 ميلليون گەكتارعا دەيىن ارتادى دەپ جوسپارلانۋدا», دەدى قازاقستان ماي-توڭماي وداعى» قاۋىمداستىعى» زتب پرەزيدەنتى.
