شارا بارىسىندا سپيكەرلەر مەملەكەت باسشىسىنىڭ «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» اتتى قازاقستان حالقىنا جولداۋىندا ايتىلعان تاپسىرمالارى بويىنشا جۇرگىزىلىپ جاتقان جۇمىستار تۋرالى باياندادى. سونىمەن قاتار جانۋارلار دۇنيەسىن قورعاۋ سالاسىنداعى قالىپتاسقان جاعداي, براكونەرلىككە قارسى كۇرەستە كەشەندى شارالار قابىلداۋ قاجەتتىگى تۋرالى ءسوز قوزعادى.
مەملەكەت باسشىسى براكونەرلىك ءۇشىن جاۋاپكەرشىلىكتى كۇشەيتۋ جونىندە شۇعىل شارالار قابىلداۋدى تاپسىرعان بولاتىن. تاپسىرمانى ىسكە اسىرۋ شەڭبەرىندە ىشكى ىستەر مينيسترلىگى ەكولوگيا, گەولوگيا جانە تابيعي رەسۋرستار مينيسترلىگىمەن, باس پروكۋراتۋرامەن بىرلەسە وتىرىپ, براكونەرلىك ءۇشىن جازانى قاتاڭداتۋعا قاتىستى زاڭناماعا بىرقاتار تۇزەتۋ ەنگىزگەن.
«زاڭسىز بالىق اۋلاعانى, زاڭسىز اڭ اۋلاعانى, جانۋارلار مەن وسىمدىكتەر دۇنيەسى وبەكتىلەرىمەن زاڭسىز اينالىسقانى, اعاش كەسكەنى ءۇشىن سانكتسيا ۇلعايتىلدى», دەدى اكىمشىلىك پوليتسيا كوميتەتىنىڭ توراعاسى ماقسات بايبولوۆ.
بۇگىنگى كۇنى ءىىم ورمانداردى جانە جانۋارلار دۇنيەسىن قورعاۋ جونىندەگى مەملەكەتتىك ينسپەكتورلاردىڭ قىزمەتتىك اۆتوكولىكتەرىن جارىق جانە دىبىس سيگنالدارىمەن جابدىقتاۋ جانە ءبىر ءتۇستى گرافيكالىق سحەمالار بويىنشا قۇقىق قورعاۋ جانە ارنايى ورگانداردىڭ ارنايى اۆتوكولىكتەرىمەن تەڭ دارەجەدە بوياۋ قۇقىعىن بەرۋ ماسەلەسى كەلىسىلدى.
جانۋارلار مەن وسىمدىكتەر دۇنيەسىن قورعاۋ جونىندەگى مەملەكەتتىك ينسپەكتورلارعا قىزمەتتىك قارۋمەن ءجۇرۋ قۇقىعى بەرىلگەن. مەملەكەتتىك ينسپەكتورلاردىڭ قىزمەتتىك قارۋدى قولدانۋ ءتارتىبى ۇكىمەتتىڭ 2012 جىلعى 24 مامىرداعى № 670 قاۋلىسىمەن بەكىتىلگەن.
ءىىم وكىلى جانۋارلار مەن وسىمدىكتەر دۇنيەسىن مەملەكەتتىك قورعاۋ قىزمەتكەرلەرىنىڭ بىلىكتىلىگىن ارتتىرۋ ءۇشىن «براكونەرلىكپەن كۇرەس جونىندەگى شارالاردى زاڭنامالىق قامتاماسىز ەتۋ» وقۋ باعدارلاماسى ازىرلەنگەنىن مالىمدەدى.
مينيسترلىك وكىلىنىڭ اقپاراتىنا سۇيەنسەك, قازان ايىندا ەل اۋماعىندا تابيعات قورعاۋ زاڭناماسىن بۇزۋ فاكتىلەرىن انىقتاۋعا جانە جولىن كەسۋگە باعىتتالعان «براكونەر» ءىس-شاراسى وتكىزىلگەن. جالپى, ءىس-شارا ناتيجەسى بويىنشا 2 مىڭنان استام (2442) زاڭ بۇزۋشىلىق انىقتالعان. اتاپ ايتار بولساق, زاڭسىز اڭ اۋلاۋ, اعاشتار مەن بۇتالاردى زاڭسىز كەسۋ, زاڭسىز بالىق اۋلاۋ, بيولوگيالىق رەسۋرستار وبەكتىلەرىن جانە ولاردىڭ ونىمدەرىن زاڭسىز ساتىپ الۋ سىندى فاكتىلەر تىركەلگەن.
«انىقتالعان فاكتىلەر بويىنشا 192 ادامعا قاتىستى 177 سوتقا دەيىنگى قىلمىستىق تەرگەۋ باستالدى, سونىڭ ىشىندە جەدەل-ىزدەستىرۋ شارالارى كەزىندە 51 ادامعا قاتىستى 47 ءىس سوتقا جىبەرىلدى. قۇقىق قورعاۋ ورگاندارى رەسپۋبليكا بويىنشا 10 مىڭنان استام (10746) تابيعات قورعاۋ زاڭناماسىن بۇزۋشىلىقتى انىقتادى», دەيدى مارلەن اينابەكوۆ.
2018 جىلى اتالعان زاڭ بۇزۋشىلىق فاكتىلەرى بويىنشا 85,1 ملن تەڭگە كولەمىندە ايىپپۇل سالىنىپ, 72,1 ملن تەڭگە وندىرىلگەن بولاتىن.
