قازىر مەديتسينالىق پويىز تۇركىستان وبلىسىندا جۇمىسىن جالعاستىرىپ جاتىر.
دارىگەرلەر قازاقستاننىڭ ءار ايماعىندا ەكولوگياعا جانە ايماقتىق ەرەكشەلىكتەرگە بايلانىستى سپەتسيفيكالىق پروبلەمالى جاعدايلاردى انىقتاۋدا. بالالار مەن ەرەسەكتەردىڭ اراسىندا انىقتالعان اۋرۋلار سان جاعىنان دا اۋرۋ دارەجەسىنىڭ كۇردەلىلىك دەڭگەيى جاعىنان دا وسكەنى بايقالادى. ءجيى كەزدەسكەن اۋرۋلار قاتارىندا قانت ديابەتى, گيپەرتەنزيا, رەۆماتويدتى ارتريت جانە ونكولوگتىڭ قابىلداۋىندا پاتسيەنتتەردىڭ بارلىعىندا دەرلىك ماستوپاتيا بەلگىلەرى انىقتالدى.
قىزىلوردا وبلىسىنداعى مەديتسينالىق تەكسەرۋ بارىسىندا دارىگەرلەر بارلىعى 10 393 ناۋقاستى قابىلداسا, ولاردىڭ ىشىندە 554 بالا بار.
مەديتسينالىق پويىز كىشىگىرىم حيرۋرگيالىق وپەراتسيالار مەن سكرينينگتەر جاساۋ ءۇشىن قاجەتتى قۇرالدارمەن جابدىقتالعان. وسىلايشا, پويىزدا 312 شاعىن حيرۋرگيالىق وتا جاسالدى, 610 ەكگ پروتسەدۋراسى, 617 ۋدز جانە 199 فليۋروگرافيا جاسالدى.
قىزىلوردا وبلىسىندا تۇرعىندار ەڭ كوپ بارعان وفتالمولوگ 805 ادام قابىلداسا, ستوماتولوگ 705 تۇرعىندى تەكسەردى. سونداي-اق 610 ادام كارديولوگتىڭ, 705 تۇرعىن لور دارىگەردىڭ جانە 668 تۇرعىن ۋرولوگ دارىگەردىڭ قابىلداۋىندا بولعان.
«ۇزدىكسىز قايتالاناتىن ەپيلەپسيا اۋرۋى بار ءبىر بالا «اقساي» رەسپۋبليكالىق بالالار اۋرۋحاناسىنا جاتقىزىلدى. ەڭ كوپ تارالعان پاتولوگيا – تەمىر تاپشىلىعى انەمياسى, بالالاردىڭ 80%-ىندا ءتىس جەگىسى بار, بالالاردا عانا ەمەس, ەرەسەكتەردە دە كەزدەسەدى», دەيدى پەدياتر, مەديتسينا عىلىمدارىنىڭ دوكتورى, قازاق ۇلتتىق مەديتسينا ۋنيۆەرسيتەتىنىڭ بالالار اۋرۋلارى كافەدراسىنىڭ پروفەسسورى تاتيانا يمامباەۆا.
مەديتسينالىق پويىز مامانداردىڭ كەڭ سپەكترىمەن جۇمىس ىستەيتىن كلينيكالارى جوق ەلدىڭ شالعاي اۋداندارىندا تەگىن مەديتسينالىق كومەك كورسەتەدى. تۇرعىندار پويىز دارىگەرلەرىنە ەمدەلۋگە, تەكسەرۋدەن ءوتىپ, دەنساۋلىقتى ساقتاۋ بويىنشا كەڭەستەرى ءۇشىن شىنايى ريزاشىلىقتارىن ءبىلدىرىپ جاتىر. كوپتەگەن پاتسيەنتتەر اقىسىز جانە ساپالى مەديتسينالىق كومەك الۋ ءۇشىن مەديتسينالىق پويىزدى اسىعا كۇتەتىندەرىن ايتادى.
«دەنساۋلىق» پويىزى ءبىزدىڭ بەكباۋىل بەكەتىنە كەلدى. مەن بارلىق دارىگەرلەردىڭ قابىلداۋىندا بولدىم. دارىگەرلەردىڭ قابىلداۋى مەن تەكسەرۋى وتە جوعارى دەڭگەيدە. قىسقاشا ايتقاندا, دارىگەرلەردىڭ كومەگىنە وتە ريزامىن. ولارعا الداعى جۇمىستارىنا تابىس تىلەگىم كەلەدى», دەدى بەكباۋىل بەكەتىنىڭ تۇرعىنى توعجان ءجۇسىپوۆا.
ەستەرىڭىزگە سالا كەتسەك, جوبا 29 ساۋىردەن باستاپ جۇزەگە اسىرىلىپ كەلەدى جانە ونىڭ باستى ماقساتى – ەلىمىزدىڭ شالعاي اۋدان تۇرعىندارىن تەگىن مەديتسينالىق قىزمەتپەن قامتۋ. جوبانى «سامۇرىق-قازىنا» اق كومپانيالار توبىنىڭ اتىنان «Samruk-Kazyna Trust» الەۋمەتتىك جوبالاردى دامىتۋ قورى دەنساۋلىق ساقتاۋ مينيسترلىگىنىڭ اتسالىسۋىمەن جۇزەگە اسىرىپ جاتىر.
2019 جىلدىڭ 20 تامىزىندا «جاردەم» مامانداندىرىلعان مەديتسينالىق پويىزى ىسكە قوسىلعان بولاتىن. ول «دەنساۋلىق» پويىزى سياقتى مەديتسينالىق كومەككە قولى جەتپەيتىن شالعايداعى ستانسالار مەن جاقىن ورنالاسقان اۋىلداردىڭ تۇرعىندارىنا العاشقى مەديتسينالىق-سانيتارلىق جانە كونسۋلتاتيۆتىك-دياگنوستيكالىق كومەك كورسەتەدى. ەكى پويىزدىڭ ىسكە قوسىلۋ ۋاقىتىنان باستاپ بارلىعى 50 مىڭنان استام ادام تەكسەرىستەن وتكەن.
پويىز ۆاگوندارى نەمىس جانە جاپون ءوندىرىسىنىڭ الدىڭعى قاتارلى فيرمالارىنىڭ زاماناۋي دياگنوستيكالىق قۇرال-جابدىقتارىمەن جابدىقتالعان. اپپاراتۋرالار پاتسيەنتتەرگە قاجەت بولعان جاعدايدا تولىق جالپى جانە بيوحيميالىق تالداۋلار جاساۋعا, رەنتگەنوگرافيا جانە فليۋوروگرافيادان وتۋگە, ىشكى ورگاندارعا جانە قان تامىرلارىنا ۋدز-زەرتتەۋلەر جۇرگىزۋگە, ەلەكتروكارديوگرامما, گاستروفيبروسكوپيا جاساۋعا جانە باسقا دا دياگنوستيكالىق زەرتتەۋلەر جۇرگىزۋگە مۇمكىندىك بەرەدى.
پويىز كەستەسىمەن www.medpoezd.kz جانە www.sk-trust.kz/ru رەسمي سايتتارىندا تانىسا الاسىزدار.
