كونفەرەنتسيانى اشقان ۋنيۆەرسيتەتتىڭ عىلىم جانە يننوۆاتسيالىق جوبالار جونىندەگى پرورەكتورى, تاريح عىلىمدارىنىڭ دوكتورى اقمارال ىبىراەۆا تۇڭعىش پرەزيدەنت – ەلباسى ن.نازارباەۆتىڭ « ۇلى دالانىڭ جەتى قىرى» اتتى باعدارلامالىق ماقالاسىنا تۋرا ءبىر جىل تولىپ وتىرعانىن ايتا كەلىپ, وسى ورايدا وڭىردە كوپتەگەن جۇمىستاردىڭ جۇرگىزىلىپ جاتقانىن تىلگە تيەك ەتتى. «وسى جۇمىستاردىڭ بارىنە دەرلىك ۋنيۆەرسيتەتتىڭ ۇستازدارى مەن ستۋدەنتتەرى بەلسەنە قاتىسىپ, باعدارلاما اياسىندا بەلسەندى جۇمىستار اتقارۋدا», دەدى ول.
كونفەرەنتسيا بارىسىندا «رۋحاني جاڭعىرۋ» باعدارلاماسىنىڭ شەڭبەرىندە اتقارىلعان جۇمىستار قاتارىندا «ابىلاي حاننىڭ اق ءۇيىنىڭ», «قۇلسارى باتىردىڭ», ابىلاي حاننىڭ باتىرلارى بولعان جانسۇگىر, قوساعالى, سۇيىندىك باتىرلاردىڭ قالاي زەرتتەلىپ, مۇراعات دەرەكتەرىنىڭ قالاي تابىلعانى جايىندا باياندامالار وقىلدى. سوڭعى ءۇش باتىردىڭ باسىنا كەسەنەلەردىڭ قالاي ورناتىلعانى دا ءسوز بولدى. سونداي-اق شال اقىننىڭ وسى كۇنگە دەيىنگى زەرتتەلۋ دەڭگەيى جانە سوڭعى ۋاقىتتاردا قوسىلعان جاڭالىقتار تۋرالى ايتىلدى.
كونفەرەنتسياعا قاتىسۋشىلاردى وبلىس اۋماعىندا وسىدان ءبىر اي بۇرىن عانا وبلىس اۋماعىنان تابىلعان «قىزىل وباداعى» ارحەولوگيالىق-قازبا جۇمىستارىنىڭ جايى دا قىزىقتىردى. وندا التىن وردا حاندارى داۋىرىندەگى ماۆزولەيدىڭ بولعاندىعى بەلگىلى بولىپ وتىر. جەرلەۋلەر مۇسىلمان داستۇرىمەن اتقارىلعانىمەن كەيبىر سۇيەكتەردەن التىن, كۇمىس القالار دا شىققانى ايتىلدى. بۇل تۋرالى باياندامانى قازبا جۇمىستارىنا قاتىسقان, ماگيسترانت ورال قۇسايىنوۆ جاسادى.
باياندامالاردا بۇگىنگى تاڭداعى كيەلى جەرلەر تىزىمىنە سولتۇستىك قازاقستاننان 25 نىساننىڭ ەنگىزىلگەنى, ونىڭ 8 رەسپۋبليكالىق ماڭىزى بار ورىندار ەكەندىگى دە ايتىلدى.
كونفەرەنتسيا جۇمىسىنا وبلىستىڭ تاريحشى عالىمدارى, ارحيۆ جانە مۋزەي باسشىلارى, ولكەتانۋشىلار, ۋنيۆەرسيتەت ۇستازدارى مەن ستۋدەنتتەرى, باق وكىلدەرى قاتىستى. وتىرىستى «رۋحاني جاڭعىرۋ» ورتالىعىنىڭ ديرەكتورى, تاريح عىلىمدارىنىڭ كانديداتى سابىر ىبىراەۆ جۇرگىزدى.
پەتروپاۆل
