ءبىرىنشى كۇنى ق.ءمامي يندونەزيا رەسپۋبليكاسى كونستيتۋتسيالىق سوتىنىڭ توراعاسى انۆار ۋسمان مىرزامەن ەكىجاقتى كەزدەسۋ وتكىزدى. تاراپتار كونستيتۋتسيالىق ادىلەت ورگاندارىنىڭ فۋنكتسيالارىن ىسكە اسىرۋ ماسەلەلەرى بويىنشا پىكىر الماستى. كەلىسسوزدەر قورىتىندىسى بويىنشا قازاقستان كونستيتۋتسيالىق كەڭەسى مەن يندونەزيا كونستيتۋتسيالىق سوتى اراسىندا ىنتىماقتاستىق تۋرالى مەموراندۋمعا قول قويىلدى. ول كونستيتۋتسيا ۇستەمدىگىن قامتاماسىز ەتۋ سالاسىنداعى ەكى ورگاننىڭ ءوزارا ءىس-قيمىلىن جاڭا دەڭگەيگە كوتەرۋگە باعىتتالعان.
3 قاراشادا ازيا كونستيتۋتسيالىق سوتتارى جانە بالاما ينستيتۋتتار قاۋىمداستىعىنىڭ (ااسس) مۇشەلەرى كوميتەتىنىڭ وتىرىسى ءوتتى. ۇيىمنىڭ قۇرامىنا جاڭا مۇشەلەر – ءۇندىستاننىڭ جانە مالديۆ رەسپۋبليكاسىنىڭ جوعارعى سوتتارى قابىلداندى.
ەلىمىزدىڭ كونستيتۋتسيالىق كەڭەسى الداعى ەكى جىلعا ازيا كونستيتۋتسيالىق سوتتارى مەن بالاما ينستيتۋتتار قاۋىمداستىعىنىڭ توراعاسى بولىپ ءبىراۋىزدان سايلاندى. وتىرىستا كەلەسى جىلى نۇر-سۇلتان قالاسىندا قاۋىمداستىقتىڭ 4-كونگرەسىن وتكىزۋ ماسەلەلەرى دە تالقىلاندى.
4 قاراشادا قازاقستان دەلەگاتسياسىنىڭ باسشىسى يندونەزيا كونستيتۋتسيالىق سوتىنىڭ «كونستيتۋتسيالىق سوت جانە الەۋمەتتىك-ەكونوميكالىق قۇقىقتاردى قورعاۋ» تاقىرىبىنداعى 3-ءشى حالىقارالىق سيمپوزيۋمىنىڭ اشىلۋ راسىمىنە قاتىستى. فورۋم قاتىسۋشىلارىنا يندونەزيانىڭ ۆيتسە-پرەزيدەنتى ماارۋف امين مىرزا قۇتتىقتاۋ ءسوز سويلەدى.
پانەلدىك سەسسيالاردا قازاقستان كونستيتۋتسيالىق كەڭەسىنىڭ توراعاسى بايانداما جاساپ, ازاماتتاردىڭ الەۋمەتتىك-ەكونوميكالىق قۇقىقتارىن قورعاۋ ماسەلەلەرىنە قاتىستى ەلىمىزدىڭ شەشىمدەرىمەن تانىستىردى.
كونستيتۋتسيانىڭ ءبىرىنشى بابىنا سايكەس قازاقستان ءوزىن الەۋمەتتىك مەملەكەت رەتىندە ورنىقتىرادى. بۇل نورما قازاقستان ءوز ازاماتتارىنىڭ لايىقتى ءومىر ءسۇرۋى جانە جەكە تۇلعانىڭ ەركىن دامۋى ءۇشىن مەملەكەتتىڭ مۇمكىندىكتەرىنە بارابار جاعداي جاساۋ مىندەتىن وزىنە الاتىن مەملەكەت رەتىندە دامۋعا نيەتتى ەكەنىن بىلدىرەدى. الەۋمەتتىك جانە ەكونوميكالىق قۇقىقتاردى قامتاماسىز ەتۋ مەملەكەتتىڭ تۇراقتى دامۋى جانە قوعامدىق سەنىم ءۇشىن ۇلكەن ماڭىزعا يە, دەدى ق.ءمامي.
