كەلگەن قوناقتار 28 پانفيلوۆشى باتىرلار ساياباعىنداعى «ماڭگىلىك الاۋعا» گۇل شوقتارىن قويىپ, قاھارماندار رۋحىنا تاعزىم ەتتى. ودان سوڭ اۋليە-ۆوزنەسەنسكي كافەدرالدىق شىركەۋىنە باردى. ءىزىن الا دەلەگاتسيا وكىلدەرى الماتىداعى يندۋستريالدى ايماققا اتتاندى. وندا كارتريدج شىعاراتىن وتاندىق زاۋىتتىڭ جۇمىسىمەن تانىستى. ال تۇستەن كەيىن شەتەلدىك مەيماندار الماتىداعى ۇلتتىق كىتاپحاناعا 10-نان استام سوعىس جىلدارىنداعى, قازاقستاندىقتاردىڭ ەرەڭ ەڭبەگىن سيپاتتايتىن تۋىندىلاردى تابىستادى.
«دەلەگاتسيا قۇرامىندا ىسكەرلىك قاۋىمداستىق وكىلدەرى, قالانىڭ باسشىلىق قۇرامى, مادەنيەت وكىلدەرى بار. ءبىز ءىسساپار اياسىندا قالا باسشىسىمەن كەزدەسىپ, بولاشاققا جوسپار قۇرىپ, كەيبىر ماسەلەلەردى تالقىلاۋعا كەلدىك. ەرتەڭ دە ءبىلىم بەرۋ سالاسى, مادەنيەت, قۇرىلىس, ونەركاسىپتى دامىتۋ, ينۆەستيتسيا تارتۋ سەكىلدى ماسەلەلەردى قاراۋ كۇندىك جوسپاردا تۇر. بىرقاتار كەلىسسوزدەرگە دە قول قويامىز», دەدى سانكت-پەتەربۋرگ قالاسى سىرتقى بايلانىس كوميتەتى توراعاسىنىڭ ورىنباسارى اندرەي حلۋتكوۆ.
ايتا كەتەيىك, قوناقتار ەرتەڭ دە ءبىلىم وشاقتارىنا, ءابىلحان قاستەەۆ اتىنداعى ونەر مۇراجايى مەن ىقىلاس اتىنداعى حالىق اسپاپتار مۋزەيىنە بارادى.
