قازىرگى تاڭدا سەناتتىڭ قاراۋىنا جىبەرىلگەن «تۇرعىن ءۇي قاتىناستارى تۋرالى» زاڭعا ەنگىزىلگەن تۇزەتۋلەردە پاتەر يەلەرى كووپەراتيۆتەرىن تاراتۋ, ۇيلەردى قالىپتى جاعدايدا ۇستاپ تۇرۋ ءۇشىن جيناق شوتتارىن اشۋ, سونداي-اق قالالىق جانە وبلىستىق بيۋدجەت ەسەبىنەن كوپقاباتتى ۇيلەردىڭ قاسبەتتەرىن جوندەۋدى قارجىلاندىرۋ قاراستىرىلعانى بەلگىلى. وسى جايتتى ەسكەرگەن وبلىس باسشىسى كەلەسى جىلدان باستاپ شاھارلاردىڭ پروبلەمالىق نەگىزگى كوشەلەرىندە جۇمىستى باستاپ كەتۋدىڭ جوسپارلانعانىن ايتتى.
– بۇل بىزگە عيمارات قاسبەتتەرى بويىنشا بەلسەندى جۇمىس ىستەۋگە مۇمكىندىك بەرەدى, جيناق شوتتارىن اشۋدى جانە جوندەۋ جۇمىستارىنا بيۋدجەتتەن قارجى ءبولۋدى قاراستىرادى. بۇرىن بۇل جۇمىستاردى اتقارۋ ءۇشىن دەمەۋشىلەردى ىزدەستىرۋشى ەدىك, ال قازىر مۇنى قالا نەمەسە وبلىس ەسەبىنەن ىسكە اسىرا الاتىن بولدىق, – دەگەن جەڭىس قاسىمبەك قالا باسشىلارىنا ون كۇن ىشىندە ءۇي قاسبەتتەرىن ءبىرىنشى كەزەكتە جوندەۋدى قاجەت ەتەتىن پروبلەمالىق كوشەلەردىڭ ءتىزىمىن بەرۋدى تاپسىردى.
شىنىندا دا قاراعاندىداعى جانە وبلىستىڭ باسقا دا قالالارىنداعى ۇيلەردىڭ سۇيكىمسىز سۇرعىلت ءتۇسى ادامنىڭ ەڭسەسىن باسىپ تۇرۋشى ەدى. ەندى ولار ءتۇرلى-ءتۇستى, كوز قۋانتاتىن تۇستەرگە بويالىپ, سىرلاناتىن بولعانى بورىكتى اسپانعا اتىپ شاتتاندىرماسا دا, قۋانارلىق جاڭالىق. ارينە بۇدان قاراپايىم تۇرعىنداردىڭ تىرلىگى وڭالىپ, جاعدايى جاقسارىپ كەتپەسى بەلگىلى. دەگەنمەن اينالاڭداعى, ءوزىڭ تۇرىپ جاتقان قالانىڭ كوشەلەرىندەگى كەمپىرقوساقتىڭ تۇسىندەي كوڭىلگە قۋانىش سىيلار بوياۋلاردىڭ بولعانى قانداي جاقسى!
جالپى, ەكونوميكاسى دامىعان ەلدەردە تۇرعىزىلعانىنا جارتى عاسىردان اسىپ كەتكەن تۇرعىن ۇيلەر تىپ-تيپىل بولىپ سىرىلىپ, ولاردىڭ ورنىنا جاڭاسى سالىناتىنىن ءبىز جاقسى بىلەمىز. ءبىزدىڭ دە وسى كۇندەرگە ءتۇبى جەتەتىنىمىز انىق. ازىرگە جاۋىردى جابا توقىپ, ەڭسەنى تۇسىرەتىن ەڭ ءبىر سۇرقاي ءتۇس – سۇر بوياۋلاردىڭ كوزىن جويساق, مۇنىڭ ءوزى ۇلكەن جەڭىس بولار ەدى.
ستاتيستيكالىق دەرەكتەرگە سۇيەنسەك, وبلىستاعى 5815 كوپقاباتتى تۇرعىن ءۇيدىڭ قاسبەتى جوندەۋدى قاجەت ەتەتىن كورىنەدى. بۇلاردىڭ باسىم كوپشىلىگى ەل اراسىندا «حرۋششەۆكا» اتالىپ كەتكەن قاراسۇر ءتۇستى ۇيلەر بولار دەپ باتىل جورامال جاساۋعا بولادى. سونداي-اق بۇل تىزىمگە ستالين زامانىندا سالىنىپ, سىرتى ساتپاق-ساتپاق بولىپ تۇرعان ەسكى ۇيلەرىڭ كىرۋى دە ابدەن مۇمكىن...
قاسبەتى ارلەنىپ-سىرلانىپ, ادەمى كەيىپكە ەنگەن ۇيلەردىڭ تۋ سىرتىن دا, ياعني اۋلا جاققا قارايتىن بەتىن دە جاعداي جاقسارعان كەزدە كوڭىلدى تۇستەرگە بوياپ قويۋدى ۇمىتپاۋ كەرەك. سوندا عانا وبلىستاعى قالالاردى كەلگەن قوناقتارعا ۇيالماي كورسەتۋگە بولادى. ياعني تاياقتىڭ ەكى ۇشى بارىن ۇمىتپاعان ءجون.
قاراعاندى وبلىسى
