بۇل اكتسيانىڭ ماقساتى ۇلتتىق مادەني مۇرالاردىڭ جالپى حالىققا قولجەتىمدىلىگىن قامتاماسىز ەتۋگە باعىتتالعان. اسىرەسە, ول جاستار ساناسىنا ۇلتتىق تاريحتان تەرەڭ حابار بەرەدى. سونىمەن بىرگە ول مادەنيەت پەن ونەر سالاسىندا مەملەكەت تاراپىنان بولىپ جاتقان ءىس-شارالارعا قازاقستاندىقتاردىڭ نازارىن, ازاماتتارعا «رۋحاني جاڭعىرۋ» جانە « ۇلى دالانىڭ جەتى قىرى» باعدارلامالارى تۋرالى ءبىرشاما اقپارات بەرۋدى ماقسات ەتكەن. ەكسپوناتتارمەن تانىسۋدىڭ ءوزى تاريحتىڭ قىزىقتى سيۋجەتتەرى, كۆەست, ۆيكتورينالار, ماستەر-كلاستار, ەكسكۋرسيالار ارقىلى ءوتىپ, جاستاردى جالىقتىرمايتىن, كەرىسىنشە قىزىعۋشىلىعىن تۋدىراتىن ءىس-شارالار ارقىلى جۇرگىزىلەدى.
«ابىلاي حان رەزيدەنتسياسى» مۋزەي كەشەنىندە شەرۋ الدىمەن ەكسكۋرسيامەن باستالىپ, ودان ءارى قالاداعى س.مۇقانوۆ اتىنداعى مۋزىكالىق دراما تەاترى ونەرپازدارىنىڭ قويىلىمىمەن جالعاستى. «ابىلاي حاننىڭ رەسەي ەلشىسىمەن كەزدەسۋى» اتتى بۇل قويىلىم حاننىڭ ءومىرى مەن قايراتكەرلىك, ديپلوماتتىق قىرلارىنان سىر شەرتتى. قازاق دالاسىنا ەنتەلەپ ەنىپ كەلە جاتقان پاتشانىڭ ەكسپانسياسىن توقتاتۋدى ويلاعان حاننىڭ ءادىس-ايلاسى, امال-تاسىلدەرى ءبىرشاما كورىنىس تاپتى. ال «عاسىرلاردان جەتكەن تاريح» كۆەست ويىنى بويىنشا جينالعان جاستار ابىلاي حانعا تىكەلەي «سۇراقتار قويۋ» مۇمكىندىگىنە يە بولدى. م.قوزىباەۆ اتىنداعى مەملەكەتتىك ۋنيۆەرسيتەتتىڭ ستۋدەنتتەرى بۇل ويىندا اسىرەسە ۇلكەن بەلسەندىلىك كورسەتتى. «سەرپىن» باعدارلاماسىمەن وقىپ جاتقان جاستار اراسىنان رايىمبەك باباش, نۇرداۋلەت تاستان جانە ت.ب. حانعا «تىكەلەي سۇراقتار» قويىپ, وزدەرىن تولعاندىرعان ماسەلەلەرگە جاۋاپ الدى. ويىنداردىڭ ءبارى مۋزەي ەكسپوناتتارىن قولدانۋ, دۋلىعانى باسقا كيىپ, قىلىشتى بەلگە ىلۋىمەن قىزىقتى بولدى. سونىمەن بىرگە ويىندارعا بەلسەندى قاتىسۋشىلارعا سىيلىقتار بەرىلدى. ودان ءارى كەش «كاراوكا» كافەسىندە جالعاسىپ, جاستاردىڭ بۇگىنگى تالعامىنا جاۋاپ بەردى. مۋزەي كەشى 21.00-دە باستالىپ, تاڭعى 03. 00-گە دەيىن جالعاستى.
مۋزەي ديرەكتورىنىڭ ورىنباسارى اسەمگۇل قىدىبەكوۆا حالىقتىڭ كوپ جينالعانىنا, اسىرەسە جاستاردىڭ ۇلكەن قىزىعۋشىلىق تانىتقانىنا ريزا بولعانىن جەتكىزدى. «شارانىڭ وسىنشا اۋقىمدى, قىزعىلىقتى بولعانىنا ءوزىمىز دە تاڭعالدىق. اۋەلى ونىڭ ءساتتى بولاتىنىنا كۇدىكپەن قاراعان ەدىك, بىراق ءبارى دە وتە كوڭىلدى شىقتى. جاستاردىڭ قازاقتىڭ تاريحىنا دەگەن قىزىعۋشىلىعى ءبىزدى ءتانتى ەتتى», دەدى ول.
ءسويتىپ «ايلى ءتۇننىڭ اياسىندا» دەگەن جالپى اتاۋ العان مادەني شارا ساتتىلىكپەن اياقتالدى.
پەتروپاۆل
