ۋنيۆەرسيتەت جانىنان اشىلعان مۇمكىندىگى مول زەرتحانا قازاقستاننىڭ ۇلتتىق اككرەديتتەۋ ورتالىعىندا اككرەديتتەلدى. مۇندا 10 ەلەمەنت بويىنشا توپىراق تالداماسى جاسالادى. اتاپ ايتقاندا, ازوت, فوسفور, كالي, كۇكىرت, گۋمۋس جانە باسقا دا ەلەمەنتتەر بويىنشا تالداۋ جاسالادى. تالداۋ قۇنى ەۋروپالىق, امەريكالىق جانە وتاندىق زەرتحانالارعا قاراعاندا تومەن. زەرتحاناعا قاجەتتى زاماناۋي جابدىقتاردى ساتىپ الۋعا گەرمانيانىڭ گاننوۆەر ۋنيۆەرسيتەتى گرانت بولگەن.
ۋنيۆەرسيتەت رەكتورى اقىلبەك كۇرىشباەۆتىڭ ايتۋىنشا, قازىرگى تاڭدا مۇنداي زەرتحانا ەلىمىزدىڭ اۋىل شارۋاشىلىعى سالاسىنا اسا قاجەت ەكەنى انىق. بۇعان دەيىن ديقانداردىڭ ەگىس القابىنداعى توپىراق قۇرامىن زەرتتەۋگە مۇمكىندىگى بولماعان. سونىڭ سالدارىنان توپىراقتىڭ قۇنارى تومەندەپ, شىعىم كولەمى كۇرت كەمىپ كەتتى. زەرتحانا مۇنداي كەلەڭسىزدىكتىڭ الدىن الۋعا سەپتىگىن تيگىزبەك.
«مۇنداي ەۋروپالىق تالاپتارعا ساي زەرتحانا ەلىمىزدە تۇڭعىش رەت اشىلىپ وتىر. كەلەشەكتە ولاردىڭ سانىن كوبەيتە بەرۋىمىز كەرەك. سەبەبى ونىڭ اۋىل شارۋاشىلىعى تاۋارىن وندىرۋشىلەر ءۇشىن ماڭىزى زور. سونداي-اق ۋنيۆەرسيتەت قابىرعاسىندا ىسكە قوسىلعانى ستۋدەنتتەر, ماگيسترانتتار, دوكتورانتتار ءۇشىن وتە ۇلكەن جەتىستىك», دەدى رەكتور.
توپىراقتى وسىمدىكتىڭ قورەكتىك ەلەمەنتتەرىمەن قامتاماسىز ەتۋ – اۋىلشارۋاشىلىق تاۋار ءوندىرۋشىنىڭ باستى مىندەتى. بىراق ونى انىقتاۋ ءۇشىن زەرتتەۋ جۇمىستارى قاجەت. ال زەرتتەۋ جۇرگىزۋ ۋاقىت پەن قارجىلىق جوسپارلاۋعا بايلانىستى قيىنعا سوعىپ وتىرعانى بەلگىلى. ەندى بۇل ولقىلىقتىڭ ورنى تولادى دەيدى ۋنيۆەرسيتەت باسشىلىعى.
«سوڭعى 15 جىلدا جازدىق بيدايدىڭ ءونىمى اۋستراليادا 30-40 پايىز كوبەيگەن. ال رەسەيدە 34 پايىز كوبەيدى. ال ءبىزدىڭ سولتۇستىك وڭىرلەردە اتالعان كورسەتكىش 14 پايىزعا عانا ۇلعايدى. ونىڭ ءبىر سەبەبى – جەر قۇنارىنىڭ تومەندەۋى. ال توپىراقتىڭ قۇنارىن جوعالتپاۋ ءۇشىن بىزگە توپىراقتى زەرتتەيتىن زاماناۋي زەرتحانالار قاجەت. بۇگىن ءبىزدىڭ وقۋ ورنىمىزدىڭ جانىنان اشىلىپ وتىرعان زەرتحانانىڭ باستى ەرەكشەلىگى – توپىراق قۇرامىن سوڭعى ۇلگىدەگى قۇرىلعىلار ارقىلى زەرتتەۋمەن شەكتەلمەي, نارىقتا جۇمىس ىستەپ جاتقان فەرمەرلەرگە دە قىزمەت كورسەتەمىز. بۇرىن وتاندىق فەرمەرلەر توپىراق تالداماسىن ءبىلۋ ءۇشىن امەريكا مەن ەۋروپانىڭ زەرحانالارىنا جۇگىنەتىن», دەيدى ا.كۇرىشباەۆ.
ا.كۇرىشباەۆتىڭ ايتۋىنشا, سوڭعى 4 جىلدا قازاق اگروتەحنيكالىق ۋنيۆەرسيتەتى شەتەلدەن 2 ملرد تەڭگە ينۆەستيتسيا تارتقان. بۇل قاراجات ءتۇرلى قۇرىلعى ساتىپ الۋعا جانە قىزمەتكەرلەردى شەتەلدە وقىتۋ ءۇشىن الىنعان.
