«ۇشقىننان» ۇشقىن شاشقان, كەيىن جالىندى سوزدەرى جالىن اتقان, اتاۋى الدەنەشە رەت وزگەرگەنىمەن, ەل ءسوزىن سويلەۋدەن, جاقسىلىققا جارشى, يگىلىككە ۇيىتقى بولۋدان جاڭىلماي كەلە جاتقان باسىلىمدى ءسۇيىپ وقيتىندار وتە كوپ. وزدەرىنىڭ سۇيىكتى گازەتتەرىنىڭ مەرەيتويىن دا مەرەيلەنە اتاپ وتۋدە.
– اعا باسىلىمدى قىرىق جىلعا جۋىق جان سەرىگىم ەتىپ كەلە جاتىرمىن, دەيدى جاقسى اۋدانىنىڭ تۇرعىنى الپىس بايشاعىروۆ اقساقال,– سىرلاسىم دا, مۇڭداسىم دا سول. اتا گازەتتىڭ ايتارى از ەمەس. وزىڭە نە كەرەك بولسا, سونىڭ ءبارىن تاباسىڭ. ەلىمىزدىڭ وتكەن تاريحى تۋرالى الاشتىڭ ارداقتى ازاماتتارىنىڭ كەشەگى وتكەنى بار, بۇگىنگىسى بار, ءبارى جازىلۋدا. ەل قامىن جەگەن, كوپتىڭ جايىن ويلاعان كوشەلى ءسوز ايتاتىن دا وسى باسىلىم. مەن وزىمە وي سالعان, كوڭىلىمنەن شىققان ماتەريالداردى جيناپ قويامىن. قازىر بىرنەشە پاپكا بولدى. اقساقالدار ەل تاريحىن ايتقان كەزدە ءوز پىكىرىمدى وسى گازەتكە شىققان دەرەكتەرمەن تولىقتىرىپ وتىرامىن. تالاس تۋا قالسا, دالەلىم دە وسى گازەتتە جازىلعان ماتەريالداردىڭ ىشىندە.
ششۋچە قالاسىندا ەل گازەتىنىڭ تويى تاعىلىمدى اتالىپ ءوتتى. گازەت تاريحىن قامتيتىن «ەگەمەن تاريحى – ەل تاريحى» تاقىرىبىندا كورمە قويىلىپتى. وندا گازەت رەداكتسياسىندا قىزمەت ەتكەن قالامگەرلەردىڭ جيناقتارى دا بار. الدىمەن ەل گازەتى تۋرالى بەينەفيلم كورسەتىلدى. وقىرماندار گازەت تۋرالى مول ماعلۇمات العاننان كەيىن وسى باسىلىمدا 25 جىل قىزمەت ەتكەن قارىمدى جۋرناليست باقبەرگەن امالبەك گازەت تاريحى, وندا الاشتىڭ جاقسىسى مەن جايساڭى قىزمەت ەتكەنى تۋرالى كەڭىنەن تاراتىپ ايتىپ بەردى. وقىرمان كوڭىلىندە قالعان قاداۋ-قاداۋ ويلى ماتەريالدار دا تىلگە تيەك ەتىلدى. ەل ەڭسەسىن تىكتەۋ, تاۋەلسىزدىگىمىزدى باياندى ەتۋ جولىنداعى باسىلىمنىڭ قايراتكەرلىك قىزمەتى قاعىس قالعان جوق. گازەتتىڭ اقمولا وبلىسىنداعى مەنشىكتى ءتىلشىسى رەتىندە ءبىز دە باسىلىمنىڭ بۇگىنگى تىنىسى, ەل يگىلىگىنە ءسىڭىرىپ جاتقان قىزمەتى تۋرالى ەكشەي ايتىپ بەردىك. وقىرماندار دا ويلى گازەتتىڭ وڭدى شارۋاسىنا جوعارى باعا بەردى.
ءدال وسىنداي كەزدەسۋ ءبىرجان سال اۋدانىندا دا ۇيىمداستىرىلدى. اۋدان اكىمدىگىنىڭ ءماجىلىس زالىندا وتكەن كەزدەسۋدى اۋدان اكىمى ەرمەك نۇعىمانوۆ اشىپ, ەل گازەتى تۋرالى تەرەڭىنەن سىر تولعاپ, اعىنان جارىلدى.
– اۋداننىڭ بۇرىنعى ەڭبەكشىلدەر اتاۋىنان ارىلىپ, ءبىرجان سال اتىنىڭ بەرىلۋىنە دە «Egemen Qazaqstan» گازەتىنىڭ ىقپالى زور بولدى, دەدى اۋدان اكىمى. ەگەر وقىساڭىزدار, باسىلىمنىڭ بەتتەرىنەن الاش جۇرتىنىڭ وتكەن تاريحىن, بۇگىنگى بەينەسىن انىق اڭعارار ەدىڭىز. گازەت ءوز الدىنا ءبىر مەكتەپ, ءومىر مەكتەبى. ماڭگىلىك ەلدىڭ جاسامپاز بەينەسىن قالىپتاستىرۋ, سول بيىككە قالاي جەتۋگە بولاتىندىعىن قولمەن قويعانداي ەتىپ كورسەتىپ جاتىر. ەل ىشىندەگى تۇيتكىلدى دە جاسىرماي ايتىپ, ودان شىعار جولدى دا كورسەتۋدە. بىرلىكتى ۇندەپ, بەرەكەنى نۇسقاۋدا. ىنتىماقتىڭ ىرىس اكەلەتىندىگىن ايتىپ جالپاق جۇرتقا جار سالۋدا. سوندىقتان الداعى ۋاقىتتا «Egemen Qazaqstan» گازەتى بوساعاسىنان اتتاپ, تورىنە وزبايتىندار بولسا, جازدىرىپ الۋلارىڭىز كەرەك.
ەڭسەسى بيىك, مازمۇنى عاجاپ, ماعىناسى ادام ايتقىسىز ەل گازەتىنىڭ ءتول مەرەكەسى قاسيەتتى كوكشە وڭىرىندە تويلانىپ جاتىر. ءدال وسىنداي كەزدەسۋلەر وبلىستىڭ بارلىق اۋداندارىندا وتكىزىلمەك.
اقمولا وبلىسى
