مۇندا بۇعان دەيىن «اقتوبە –ادالدىق الاڭى» جوبالىق كەڭسەسى مەن «ادال ۇرپاق» اتتى مەكتەپ كلۋبتارى قۇرىلىپ, سىبايلاس جەمقورلىق كورىنىستەرىنە قارسى ءىس-قيمىل تانىتا باستادى. بۇل باعىتتا تاياۋدا وبلىستا تاعى ءبىر ىرگەلى قادام جاسالىپ, وڭىردەگى كوللەدجدەر مەن جوعارى وقۋ ورىندارىنىڭ جانىندا پاراساتتىلىق مەكتەپتەرى اشىلدى.
وسى ارقىلى جاس ۇرپاقتىڭ بويىنا حالقىمىزدىڭ ەجەلگى سالت-داستۇرلەرىنە ساي رۋحاني تاربيە نەگىزدەرىن ورنىقتىرۋ كوزدەلگەن. ءبىر سوزبەن ايتقاندا وڭىردە قۇرىلعان پاراساتتىلىق مەكتەپتەرى جاستار مەن ستۋدەنتتەرگە ادالدىق, پاراساتتىلىق جانە سىبايلاس جەمقورلىق كورىنىستەرىنە توزبەۋشىلىك قاسيەتتەرىن ءسىڭىرۋدى مۇرات تۇتادى.
سونىمەن بىرگە ولاردى تۋعان جەر مەن تۇتاستاي مەملەكەتكە ادال قىزمەت ەتۋگە باۋلۋ ءىسى دە قوسا قاراستىرىلعان. قالاي دەگەندە دە مۇندا باستى نازار سىبايلاس جەمقورلىق دەرتىنىڭ الدىن الا بىلۋگە اۋدارىلعان.
