حالىقتىڭ دۇرلىگۋىنە نەگىزگى سەبەپ – مەترو جولاقىسىنىڭ قىمباتتاۋى. ۇكىمەت 6 قازاندا مەترو بيلەتىنىڭ باعاسى 30 چيلي پەسوسىنا (0,042 اقش دوللارى) قىمباتتايتىنىن حابارلاعان بولاتىن. چيليلىكتەر قالا ورتالىقتارىنا جينالىپ, جاڭا تاريفكە قارسىلىعىن ءبىلدىردى. العاشقى جيىندار بەيبىت سيپاتتا بولدى. حالىق وزدەرىمەن الىپ كەلگەن قازاندارىن سارتىلداتىپ, نارازىلىعىن بىلدىرمەك بولدى. الايدا 19 قازاندا جينالعان قاۋىم قۇقىق قورعاۋ ورگاندارىنىڭ قىزمەتكەرلەرىمەن ەرەگىسىپ, قالا مۇلكىنە زاقىم كەلتىرىپ, سانتياگو ورتالىعىنداعى ساۋدا ورتالىعىن ورتەيدى. سودان بەرى بەيبىت ميتينگتىڭ سيپاتى اۋىستى. 19 ادامنىڭ كوز جۇمعانى, 585 كىسىنىڭ جاراقاتتانعانى حابارلاندى. 3 مىڭعا جۋىق ازامات ۋاقىتشا يزولياتورعا قامالعان.
بۇگىندە ءچيليدىڭ ءىرى قالالارىنا برونەتەحنيكا مەن اسكەري توپتار جونەلتىلگەن. ونىمەن قوسا كومەندانتتىق ساعات بەلگىلەنگەن. ءبىر عانا سانتياگو مەتروسىنىڭ ىستەن شىعۋى قالا اكىمشىلىگىن 200 ملن اقش دوللارى كولەمىندە شىعىنعا باتىرىپ وتىر. La Tercerا باسىلىمىنىڭ جازۋىنشا, 136 ستانسانىڭ 77-ءسىن قايتا جوندەۋ كەرەك, 20-سىندا ءورت شىقسا, 9-ى تۇگەلدەي جانىپ كەتكەن. بۇل مالىمەتتى مەتروپوليتەن باسشىسى رۋبەن الۆاردو راستادى.
25 قازاندا ءبىر توپ ازامات ءچيليدىڭ ۇلتتىق كونگرەسىنىڭ عيماراتىنا شابۋىل جاساپ, قاۋىپسىزدىك كوميتەتى ونداعى قىزمەتكەرلەردى ەۆاكۋاتسيالاۋعا ءماجبۇر بولدى. مالىمەتتەرگە سۇيەنسەك, نارازىلار كونگرەسس عيماراتىن باسىپ الماق بولعان.
سانتياگو مەرى كارلا رۋبيلار Twitter-دەگى پاراقشاسىندا الاڭعا جينالۋشىلاردىڭ قاراسى ميلليونعا جەتكەنىن حابارلادى. وعان قوسا «ەلىمىزگە ديالوگ پەن بەيبىت كەلىسىم جەتىسپەيدى», دەپ جازعان. بۇۇ-نىڭ ادام قۇقىقتارى جونىندەگى جوعارعى كوميسسارى ميشەل باچەلەت چيلي بيلىگى مەن حالقىن كەلىسىمگە كەلۋگە شاقىردى. ول مەملەكەتتەگى داعدارىستى قولعا الىپ, ودان شىعاتىن شەشىم تابۋ ءۇشىن ەكى تاراپتىڭ ءبىرىن-ءبىرى تىڭداي الۋى ماڭىزدى ەكەنىن ايتتى.
ەرەۋىلگە شىققاندار جولاقىنىڭ قىمباتتاۋىنا قوسا ەلدەگى جالاقىنىڭ تومەندىگىن, تەگىن مەديتسينا قىزمەتتەرى مەن اقىسىز, ساپالى ءبىلىمنىڭ بولماۋىنا نارازى. چيلي پرەزيدەنتى سەباستيان پينەرا Twitter-دەگى پاراقشاسىنا حالىقتىڭ مۇڭىن ەستىگەنىن جازدى. «بۇگىن ەلىمىزدە ۇلكەن كولەمدەگى بەيبىت باس كوتەرۋ ءوتىپ جاتىر. ولار ءادىل ءارى حالىقتىڭ مۇڭ-مۇقتاجى ەسكەرىلەتىن مەملەكەتتى قالايتىنىن ايتتى. ءبىز دە وعان قوسىلامىز. قۇدايدىڭ كومەگىمەن بارىمىزگە ۇنايتىن چيليگە دە جەتەمىز. بۇل كەزەڭ دە ارتتا قالار» دەلىنگەن جازبادا. سەنبىدە سانتياگوداعى پرەزيدەنت سارايىنداعى كەزدەسۋدە مەملەكەت باسشىسى سەباستيان پينەرا رەسپۋبليكا مينيسترلەرىنەن قىزمەتتەرىن بوساتۋدى سۇرادى. ول بۇل شەشىمىن «جاڭا تالاپتاردى قابىلداۋ» دەپ ءتۇسىندىردى. سونىمەن بىرگە 28 قازاندا مەملەكەت بويىنشا بەلگىلەنگەن توتەنشە جاعداي رەجىمىن دە الىپ تاستايتىن ويى بارىن جەتكىزدى.
رەسمي ستاتيستيكاعا سۇيەنسەك, چيليدە مەديتسينا قىزمەتتەرى راسىمەن قىمبات. ماسەلەن, دارىگەرگە كورىنۋ ءۇشىن چيليلىك 70 اقش دوللارىن تولەۋگە ءماجبۇر. مەملەكەتتىك كلينيكاداعى ستاتسيونارلار 2 000 اقش دوللارىنىڭ اينالاسىندا. ال مەملەكەتتەگى ورتاشا جالاقى كولەمى – 900 اقش دوللارى. چيلي كوپ جىلدار بويى لاتىن امەريكاسىنداعى تۇراقتى مەملەكەتتەردىڭ ءبىرى سانالىپ كەلدى. دەگەنمەن بۇل جولى حالىق بيلىكتەن جالاقى مەن زەينەتاقىنى ءوسىرۋدى, ءدارى-دارمەكتىڭ باعاسىن ارزانداتۋدى, كونستيتۋتسيالىق رەفورما جاساۋدى سۇراپ وتىر. ونىمەن قويماي, سوڭعى كەزدە مەملەكەت باسشىسىنىڭ قىزمەتتەن كەتۋىن تالاپ ەتكەندەر دە تابىلىپ جاتىر. نارازىلار جينالعان كۇنى قابىلدانعان جول اقىسىنىڭ باعاسىن وسىرمەۋ شەشىمى حالىقتى قاناعاتتاندىرمادى. كورىپ وتىرعانىمىزداي, بيلىك حالىقتىڭ تالاپتارىن ورىندايتىن شارالاردى قولعا الىپ وتىر.
