پرەزيدەنت ينفراقۇرىلىمعا بولىنگەن قاراجاتتىڭ كوبىن شەنەۋنىكتەر قالتاسىنا باسىپ الاتىنىن جاسىرماي ايتتى. سونىڭ سالدارىنان نە تازا سۋ جوق, نە ءجوندى جول جوق, ال ينفراقۇرىلىم بولسا باياعى جارتاس سول جارتاس كۇيىندە قالعان. ەندى «سۋدىڭ دا سۇراۋى بار» دەگەندەي, مۇنداي, ياعني وزگە دە سالالارداعى كوپتەگەن جۇگەنسىزدىكتەرگە بۇعاۋ سالىناتىندىعىنا سەنىم پايدا بولدى. مەملەكەت باسشىسى بيلىك حالىقتىڭ ۇنىنە ەندى ءجىتى نازار اۋداراتىنىن باسا ايتتى. بۇدان باسقا دا كوكەيگە قونىمدى وزەكتى مىندەتتەر جۇكتەگەن جولداۋدا ادامداردىڭ تۇرمىسى, جۇمىسى, قۇقى مەن الەۋمەتتىك جاعدايىنىڭ باستى تۇيتكىلدەرى اشىلا ءتۇستى.
ماسەلەن, جۇمىس دەمەكشى, قازىرگى كۇنى قۇدايعا شۇكىر ەڭبەك ەتەمىن دەگەن جانعا, ايتەۋىر, ەكى قولعا ءبىر كۇرەك تابىلاتىنى راس. بىراق مىنا الماعايىپ زاماندا ماسەلە جۇمىسقا ورنالاسۋ عانا ەمەس, ماسەلە قىزمەت ىستەۋ بارىسىندا بولىپ تۇر. ويتكەنى جاسىراتىنى جوق, قازىرگى ەسەپ بويىنشا جۇمىس ىستەۋ ءمانى كوپشىلىكتىڭ تەك كۇنكورىسى رەتىندە سانالادى. ال بۇل ورايدا شەنەۋنىكتەر قىزمەتىنىڭ ءمانى مەن ساپاسى ەل تۇرمىسىن ورگە سۇيرەر كۇش رەتىندە ەرەكشەلەنۋى ءتيىس. ولاي دەيتىنىمىز, قازاقستاندا شەنەۋنىكتەر سانى جاپونيا ەلىمەن سالىستىرعاندا 80 ەسە كوپ بولسا دا, ول ەلدەن وزباق تۇگىل, قاتارلاسا دا المايدى ەكەنبىز. 128 ميلليون حالقى بار جاپونيادا بار-جوعى 9 مىڭ مەملەكەتتىك قىزمەتكەر بولسا, 18 ميلليون ادامى بار ءبىزدىڭ ەلدە 100 مىڭعا جۋىق شەنەۋنىك بار كورىنەدى!.. سويتە تۇرا جاپونيا ەكونوميكاسىنىڭ دا, حالقىنىڭ ءال-اۋقاتىنىڭ دا ت.ب. دامۋى وراسان جوعارى. بۇل جاعىنان ولارمەن ۇزەڭگى قاعىستىرار سالامىز دا جوق. سوندىقتان ءبىزدىڭ ەلدى باسەكەلەستىكتە جاپونيامەن تەڭ قويا المايسىز.
كەز كەلگەن ەلدىڭ قۋاتتى بولۋى ءوز بيۋدجەت قاراجاتىن ءتيىمدى پايدالانا بىلۋىنە اسا بايلانىستى. ال بيۋدجەت قاراجاتى ءتيىمسىز پايدالانىلعان جەردە نەمەسە شەنەۋنىكتەردىڭ قالتاسىنا كەتكەن جاعدايدا ەل ەكونوميكاسى دا, حالىق تۇرمىسى دا جاقسارمايدى. بىلىكسىزدىك, ياعني سانى بار, ساپاسى جوقتىق تيىمسىزدىككە اكەلىپ سوقتىرادى. ماسەلەن, رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ توراعاسى ن. گودۋنوۆانىڭ ايتۋىنشا, بىلتىر ساپاسىز بيۋدجەتتىك شەشىمدەردىڭ كەسىرىنەن 138 ميلليارد تەڭگە ءتيىمسىز جۇمسالعان. ياعني, وتكەن جىلى بيۋدجەت شىعىستارىنىڭ ورىندالۋى 99,8 پايىزدى قۇراعان, بىراق بيۋدجەتتىك باعدارلامالاردىڭ جوسپارلانعان كورسەتكىشتەرى تولىعىمەن ورىندالماعان. كورسەتكىشتەر مەن جۇمسالعان اقشا اراسىندا ەش بايلانىس جوق. ال مۇنىڭ سىرى الىستا جاتپاعانى بەلگىلى.
ونىڭ سىرى جوعارىدا اتالعان ساپاسىز اتقارىلاتىن قىزمەتتىڭ تيىمسىزدىگىمەن قاتار, مەملەكەت اقشاسىنا ءزاۋلىم ءۇي, قىمبات اۆتوكولىك, ءتىپتى ەبەن اعاشىنان جاسالعان قۇندى جيھاز ساتىپ الاتىن شەنەۋنىكتەردىڭ از بولماي تۇرعاندىعىندا. قازىنانىڭ قارجىسىنا قول سالعان شەنەۋنىكتەر قايتىپ ەلدىڭ كوسەگەسىن كوگەرتە الماق؟ جەمقورلىققا قارسى ءىس-قيمىل ماسەلەلەرى جونىندە جيىندا پرەزيدەنت قاسىم-جومارت توقاەۆ: «جىل سايىن قازاقستاندا ورتاشا ەسەپپەن 2 مىڭنان استام جەمقورلىققا قاتىستى قىلمىستىق ءىس تىركەلەدى. مىڭنان اسا ادام جاۋاپقا تارتىلادى. بۇل – باتپانداپ كىرىپ, مىسقىلداپ شىعاتىن كەسەل. وسى اۋرۋدى قازىر شۇعىل تۇردە ەمدەمەسەك, ەرتەڭ كەش بولۋى مۇمكىن», دەدى.
ەندى بۇل ماسەلەگە ءدال وسى تۇرعىدان قاراپ, ءتيىستى شەشىمدەر قابىلداعان ءجون ەكەندىگى جولداۋدا جاقسى ايتىلدى. «سونىمەن بىرگە 2020 جىلدان باستاپ ءبىز مەملەكەتتىك قىزمەتشىلەردىڭ سانىن بىرتىندەپ قىسقارتۋعا كىرىسىپ, ۇنەمدەلگەن قاراجاتتى نەعۇرلىم پايدالى قىزمەتكەرلەردى ىنتالاندىرۋعا جۇمسايمىز», دەدى پرەزيدەنت. ەندەشە مەملەكەت باسشىسى قاداپ ايتقانداي, پايدالى قىزمەتكەرلەر سانى ارتىپ جاتسا ەل جاعدايى جاقسارىپ, مەملەكەت قۋاتىنىڭ ارتارىنا دا سەنىم زور.
