كەلىسسوزدەر بارىسىندا قاسىم-جومارت توقاەۆ الەكساندر لۋكاشەنكونىڭ ەلىمىزگە رەسمي ساپارى قازاقستان مەن بەلارۋس اراسىنداعى ءوزارا ستراتەگيالىق ارىپتەستىك پەن ەكونوميكالىق ءىس-قيمىلداردىڭ دامۋىنا سونى سەرپىن بەرەتىنىن اتاپ ءوتتى.
– الەكساندر گريگورەۆيچ, ءسىزدىڭ ساپارىڭىز ءبىز ءۇشىن اسا ماڭىزدى. ويتكەنى بۇل ءبىزدىڭ مەملەكەتتەرىمىز اراسىنداعى ىنتىماقتاستىق پەن قارىم-قاتىناستاردىڭ شىنايى دوستىق سيپاتقا قۇرىلعانىن دالەلدەيدى. سونىمەن قاتار ەكى ەلدىڭ ىسكەرلىك ارىپتەستىگىنە, ونىڭ ىشىندە, ەكونوميكالىق, گۋمانيتارلىق بايلانىستار مەن حالىقارالىق قارىم-قاتىناستارعا تىڭ سەرپىن بەرەدى, – دەدى قازاقستان پرەزيدەنتى.
مەملەكەت باسشىسى بەلارۋس رەسپۋبليكاسى تاۋەلسىزدىگىنىڭ نەگىزىن قالاعان كورنەكتى مەملەكەت قايراتكەرى الەكساندر لۋكاشەنكوعا قازاقستاندا شىنايى قۇرمەتپەن قارايتىنىن اتاپ ءوتتى.
الەكساندر لۋكاشەنكو قاسىم-جومارت توقاەۆقا قوناقجايلىق كورسەتكەنى ءۇشىن ريزاشىلىعىن ءبىلدىرىپ, ەكى ەل اراسىندا قالىپتاسقان تاريحي دوستىق بايلانىستارعا نازار اۋداردى.
– قازاقستانمەن اراداعى قارىم-قاتىناسىمىز وتە جاقسى ەكەنىن, ەكونوميكامىزدىڭ ءبىرىن-ءبىرى تولىقتىرىپ وتىراتىنىن جانە ەكى ەل ءوزارا جاڭا مۇمكىندىكتەرگە جول اشاتىنىن ايتقىم كەلەدى. ءبىزدىڭ ەلىمىزدە شىعارىلاتىن ونىمدەر قازاقستانعا قاجەت. ال ءبىز قازاقستاندىق ونىمدەردى ساتىپ الۋعا دايىنبىز, – دەدى بەلارۋس پرەزيدەنتى.
