كەزدەسۋ بارىسىندا قازاقستاندىقتار ەلىمىزدى ودان ءارى تسيفرلاندىرۋ, حالىققا مەملەكەتتىك قىزمەت كورسەتۋ جانە شالعاي اۋىل تۇرعىندارىن جوعارى جىلدامدىقتى ينتەرنەتپەن قامتاماسىز ەتۋگە قاتىستى ءتۇرلى ماسەلەلەردى كوتەردى.
مينيستر قابىلداۋ كەزىندە قويىلعان سۇراقتاردىڭ باسىم بولىگىنە جاۋاپ بەردى. ال قالعان بولىگىن قاراستىرۋ ءۇشىن گەودەزيا جانە كارتوگرافيا كوميتەتى مەن «ازاماتتارعا ارنالعان ۇكىمەت» كەاق باسشىلىعىنا ءتيىستى ماتەريالداردى ازىرلەۋدى تاپسىردى.
سونىمەن قاتار, اقتوبە قالاسى تۇرعىندارىنىڭ بەينە-كونفەرەنتس بايلانىسى ارقىلى جولداعان ماسەلەلەرى بويىنشا اسقار جۇماعاليەۆ الداعى ۋاقىتتا اقتوبە وبلىسىنا جۇمىس ساپارى كەزىندە وزىمەن جەكە كەزدەسىپ, ەگجەي-تەگجەيلى قاراستىرۋدى ۇسىندى.
«Nur Otan پارتياسىنىڭ قوعامدىق قابىلداۋىندا ازاماتتارمەن كەزدەسۋ وتە قاجەت. حالىق الدىندا ەسەپ بەرۋ, جۇمىسىمىزدى اشىق ءارى ايقىن كورسەتۋ – Nur Otan پارتياسىنىڭ توراعاسى, ەلباسى - نۇرسۇلتان نازارباەۆ پەن پرەزيدەنت قاسىم-جومارت توقاەۆتىڭ ءبىزدىڭ الدىمىزعا قويعان مىندەتتەرىنىڭ ءبىرى. سوندىقتان بۇل - حالىقپەن اراداعى ءوزارا بايلانىستىڭ ءتيىمدى جولدارىنىڭ ءبىرى. بۇگىنگى كەزدەسۋدە كوتەرىلگەن بارلىق ماسەلەلەر مىندەتتى تۇردە مۇقيات قارالىپ, ولارعا تولىق جاۋاپ بەرەمىز», دەدى قوعامدىق قابىلداۋ بارىسىندا اسقار جۇماعاليەۆ.
