ساپار اياسىندا ر. ۆاسيلەنكو مەن ۇلىبريتانيانىڭ ساۋدا ساياساتى جونىندەگى ءمينيسترى كونور بەرنستىڭ تەڭ توراعالىعىمەن ساۋدا-ەكونوميكالىق, عىلىمي-تەحنيكالىق جانە مادەني ىنتىماقتاستىق جونىندەگى قازاقستان-بريتان ۇكىمەتارالىق كوميسسياسىنىڭ (ۇاك) 6-شى وتىرىسى ءوتتى.
ۇلىبريتانيا ىسكەر توپتارىنىڭ 50 استام وكىلدەرى كىرگەن ۇاك-كە قاتىسۋشىلار وتكەن جىلدا اتقارىلعان جۇمىستىڭ قورىتىندىلارىمەن تانىسىپ, ەكىجاقتى ىنتىماقتاستىقتى دامىتۋدىڭ نەگىزگى باعىتتارىن قاراستىردى. وعان قوسا, مۇناي-گاز, قارجىلىق, تەحنولوگيالىق, تاۋ-كەن جانە ءبىلىم سالالارىنداعى ىنتىماقتاستىق پەرسپەكتيۆالارى تالقىلاندى.
« ۇلىبريتانيا قازاقستان رەسپۋبليكاسىنىڭ ستراتەگيالىق جانە نەگىزگى ساۋدا-ەكونوميكالىق سەرىكتەستەرىنىڭ ءبىرى بولىپ تابىلادى. ۇلىبريتانيامەن ەكىجاقتى ساۋدا اينالىمى جىل سايىن وڭ ديناميكا كورسەتىپ كەلەدى. قازاقستاننىڭ بريتاندىق جانە باسقا دا باتىس نارىقتارى ءۇشىن اشىقتىعى ۇكىمەتىمىزدىڭ شەتەلدىك بيزنەسكە ينۆەستيتسيالار مەن ساۋدا جاساۋ ءۇشىن جاعداي جاساۋ جونىندەگى تۇراقتى كۇش-جىگەرىمەن ايقىندالادى. وسى كۇش-جىگەردىڭ ناتيجەسىندە بۇگىن جاريالانعان دۇنيەجۇزىلىك بانكتىڭ «Doing Business 2020» رەيتينگىنە سايكەس, قازاقستان وتكەن جىلمەن سالىستىرعاندا ءۇش ورىنعا كوتەرىلىپ, 190 ەلدىڭ اراسىندا 25-ءشى ورىن الدى», دەدى ر. ۆاسيلەنكو.
قازاقستاندىق ديپلومات ەلدەرىمىز وسى ديالوگتى «شيكىزاتتى ينۆەستيتسيا مەن وزىق تەحنولوگيالارعا ايىرباستاۋ» فورمۋلاسى بويىنشا, كەيىننەن قوسىمشا قۇنى بار بىرلەسكەن وندىرىستەر قۇرۋعا شىعۋ ارقىلى ودان ءارى نىعايتۋ قاجەت ەكەنىن اتاپ ءوتتى.
ءوز كەزەگىندە ك. بەرنس ۇلىبريتانيا مەن قازاقستان كوپتەگەن سالالاردا, سونىڭ ىشىندە ءبىلىم بەرۋ, مۇناي-گاز, تاۋ-كەن ءوندىرىسى, قارجى, حيميا ونەركاسىبى, ماشينا جاساۋ, مەتاللۋرگيا جانە ازاماتتىق اۆياتسيا سالالارىندا ىنتىماقتاستىقتى دامىتىپ كەلە جاتقانىن ايتتى.
«قازاقستان بۇگىن بريتاندىق كومپانيالار قىزىعۋشىلىق تانىتىپ جاتقان قارقىندى ترانسفورماتسيالانىپ, ءارتاراپتاندىرىلىپ جاتقان ەكونوميكا بولىپ تابىلادى. ءبىزدىڭ ۇكىمەت وسى وركەندەۋشى نارىققا ينۆەستيتسيالاپ, قازاقستاندىق فيرمالارمەن ىنتىماقتاستىق ورناتىپ, وسى ەلدىڭ ەكونوميكاسى ۇسىناتىن شەكسىز مۇمكىندىكتەردى پايدالانۋ ءۇشىن بارلىق قاجەتتى قولداۋدى كورسەتۋگە دايىن», دەپ تولىقتىردى ك. بەرنس.
ۇاك شەڭبەرىندە وتكىزىلگەن مۇناي-گاز, تاۋ-كەن وندىرىستەرى, دەنساۋلىق ساقتاۋ, ءبىلىم بەرۋ جانە قارجىلىق قىزمەتتەر بويىنشا بەس جۇمىس توپتارىنىڭ وتىرىستارى بارىسىندا «استانا» حالىقارالىق قارجى ورتالىعىندا كورپوراتيۆتى باسقارۋدى دامىتۋ, قازاقستاننىڭ ازاماتتىق اۆياتسيا سالاسىن رەتتەۋدىڭ جاڭا مودەلىن قۇرۋ, دەنساۋلىق ساقتاۋ سالاسىنداعى مەملەكەتتىك-جەكەمەنشىك سەرىكتەستىكتى دامىتۋ, ەلىمىزدەگى كاسىپتىك-تەحنيكالىق كوللەدجدەردى ودان ءارى قالىپتاستىرۋ جانە ت.ب. وزەكتى ماسەلەلەر كوتەرىلدى.
اۋىلدىق جەرلەردە سۋ رەسۋرستارىن باسقارۋ, مال شارۋاشىلىعى جانە قالدىقتاردى باسقارۋ ماسەلەلەرى بولەك تالقىعا سالىندى.
ۇكىمەتارالىق كوميسسيانىڭ كەزەكتى وتىرىسىنا جانە ەكىجاقتى كەلىسسوزدەرگە قاتىسۋشىلار ساۋدا-ەكونوميكالىق ىنتىماقتاستىقتىڭ نەگىزگى اسپەكتىلەرى بويىنشا پىكىر الماسىپ, ستراتەگيالىق سەرىكتەستىكتى ودان ءارى كەڭەيتۋگە دايىندىعىن راستادى.
ءىس-شارانىڭ ناتيجەسىندە ەكى تاراپتىڭ بارلىق سالادا ستراتەگيالىق سەرىكتەستىكتى نىعايتۋدى جالعاستىرۋعا نيەتىن راستاعان ساۋدا-ەكونوميكالىق, عىلىمي-تەحنيكالىق جانە مادەني ىنتىماقتاستىق جونىندەگى قازاقستان-بريتان ۇكىمەتارالىق كوميسسياسىنىڭ 6-شى وتىرىسىنىڭ حاتتاماسىنا قول قويىلدى.
وتىرىس اياسىندا «بايتەرەك» ۇبح» اق مەن بريتاندىق ەكسپورتتىق كرەديتتەرگە كەپىلدىك بەرۋ اگەنتتىگى (UK Export Finance) اراسىنداعى بريتاندىق بيزنەستىڭ قاتىسۋىمەن قر-دا ينۆەستيتسيالىق جوبالاردى قارجىلاندىرۋ تۋرالى مەموراندۋم, «Artex Construction» جشس مەن «Independent Power Corporation» («IPC») ەنەرگەتيكالىق كومپانياسى اراسىنداعى باتىس قازاقستاندى ۇزدىكسىز گازدىڭ تازا كوزدەرىمەن جانە جاڭارتىلاتىن ەنەرگيا كوزدەرىمەن قامتاماسىز ەتۋ ءۇشىن اقتاۋ قالاسىندا جاڭا داتا-ورتالىقتى دامىتۋ بويىنشا تسيفرلىق بىرلەسكەن كاسىپورىن قۇرۋ تۋرالى ءوزارا تۇسىنىستىك تۋرالى مەموراندۋم, «Artex Construction» جشس مەن «IPC» اراسىنداعى ەكولوگيالىق تازا ەنەرگيانى ازىرلەۋمەن اينالىساتىن جانە اقتاۋ قالاسىندا قۋاتى 250 مۆت قۇرامداستىرىلعان تسيكلدىك گاز تۋربيناسىن سالۋ جوباسىنا شوعىرلانعان ەنەرگەتيكالىق كومپانيا قۇرۋ تۋرالى كەلىسىم, «قازگەولوگيا» اق مەن بريتاندىق «Astra Mining» كومپانياسى اراسىنداعى قر-دا ءۇش كەن ورنىن بارلاۋ تۋرالى كەلىسىم, قازاقستاندىق «Aurora Mining» كومپانياسى مەن بريتاندىق «RPA Inc» كومپانياسى اراسىنداعى جەر قويناۋىن پايدالانۋ سالاسىندا كونسالتينگتىك قىزمەتتەر كورسەتۋ تۋرالى كەلىسىم سەكىلدى ەكىجاقتى قۇجاتتارعا قول قويىلدى.
