«حاكاتون – باعدارلامالىق قامسىزداندىرۋدى جاساقتاۋدىڭ ءارتۇرلى سالالارىنان جينالعان مامانداردىڭ قانداي دا ءبىر پروبلەمانى شەشۋ ماقساتىمەن بىرىگىپ جۇمىس ىستەۋىن بىلدىرەدى. ءبىزدىڭ بۇل جولعى باستى مىندەتىمىز – مۇمكىندىگى شەكتەۋلى جانداردىڭ الدىندا تۋىندايتىن ماسەلەلەردى شەشۋدىڭ زاماناۋي جولدارىن تابۋ. مۇنداي جيىن قىزىلجار وڭىرىندە ءبىرىنشى رەت قولعا الىنىپ وتىر», دەيدى نۇر-سۇلتان قالاسىنان ارنايى كەلگەن «ITeachMe» جوباسىنىڭ اۆتورى زاحيرا بەگاليەۆا.
«ITeachMe» جوباسى وسىدان 10 اي بۇرىن قولعا الىنىپ, العاشقى حاكاتون ورال قالاسىندا ءوتىپتى. سودان بەرى قاتىسۋعا ىنتا بىلدىرۋشىلەر قاتارىنىڭ ارتقانى بايقالادى.
الماتىلىق سەرگەي شەۆچەنكو – «IteachMe» جوباسى اياسىندا وتكەن العاشقى حاكاتوننىڭ جەڭىمپازى. تاپقىر جىگىت مۇمكىندىگى شەكتەۋلى جاندارعا ارنالعان ونلاين جانە وففلاين كۋرستارىن ۇسىنىپ, گرانت ۇتىپ العان. تالاپتى جاستىڭ باستاماسى ۇلكەن قولداۋعا يە.
– «IteachMe» جوباسىنىڭ ءبىر باعىتى مۇگەدەك جانداردىڭ تۇرمىسىن جاقسارتۋدى دىتتەيدى. پەتروپاۆلدىق ءسالىمحان ءسابيتوۆ مۇمكىندىگى شەكتەۋلى جاندارعا ارناپ اۆتومەكتەپ اشىپتى. قازىرگى ۋاقىتتا جوبا ءساتتى جۇزەگە اسىرىلىپ جاتىر. ول بۇگىن حاكاتونعا وزىق جوبالارعا قولداۋ ءبىلدىرۋ ءۇشىن كەلىپتى. «راۆنايا دوروگا» اۆتومەكتەبى» جشس-ءى ديرەكتورىنىڭ سوزىنە قاراعاندا, اۆتومەكتەپتە 17 تۇلەك وقيدى. ولاردىڭ 2-ءۋى كولىك جۇرگىزۋدى مەڭگەرىپتى.
«IteachMe» جوباسى اياسىنداعى حاكاتوننىڭ جەڭىمپازدارى كەلەسى جىلى قاڭتار ايىندا بۋرابايدا وتەتىن بايقاۋعا قاتىسادى. وندا IT-سالادا جۇمىس ىستەپ جۇرگەن كاسىبي مامانداردان تاجىريبە جيناقتاپ, ازىرلەگەن جوبالارىن قورعايتىن بولادى. وزىق باستامالارعا 1 ملن. تەڭگە كولەمىندە گرانت بەرىلەدى.
سولتۇستىك قازاقستان وبلىسى
