التىن وردا ماڭىنداعى اينالما جولدىڭ قۇرىلىسى 70 پايىزعا اياقتالدى. جوندەۋ جۇمىستارىنىڭ جۇرگىزىلۋىنە كەدەرگى بولىپ تۇرعان نىسانداردىڭ ءبىرى – جانار-جاعارماي بەكەتى. بەيرەسمي مالىمەتتەرگە سۇيەنسەك, ونىڭ يەسى اكىمدىك تاراپىنان باعالانىپ بەلگىلەنگەن اقشامەن كەلىسپەي, ودان ەكى ەسە كوپ قاراجات سۇراپ وتىر.
وسىلايشا, «قازاۆتوجول» ۇلتتىق كومپانياسى «التىن وردا» ماڭىنداعى كۇردەلى جوندەۋ جۇمىستارى قارقىنىنىڭ باياۋلاپ قالعانىن بىرنەشە سەبەپتەرمەن ءتۇسىندىردى. ونىڭ ءبىرى – جوبالىق-سمەتالىق قۇجاتتاردا كورسەتىلمەگەن قوسىمشا جۇمىستاردىڭ شىعۋى. دەمەك, 2017 جىلى جاسالعان جوبالىق-سمەتالىق قۇجاتقا جول بويىنا سالىنعان مىنا جاڭا نىساندار كىرمەگەن. بۇل ءوز كەزەگىندە حالىقتىڭ ىڭعايلىعى ءۇشىن جاسالاتىن ايالدامالاردىڭ ورنالاسۋىن, قوسىمشا كىرىپ-شىعۋ جولدارىنىڭ باعىت-باعدارىن وزگەرتۋگە سەبەپ بولىپ وتىر. «ايتسە دە, قازىر جۇمىستاردىڭ ءبىرازى جاسالىپ قويدى», دەيدى كومپانيا وكىلدەرى.
قازاۆتوجول» ۇق اق الماتى وبلىستىق فيليالى ديرەكتورىنىڭ ورىنباسارى نۇرحات اقىلتاەۆ كەشە جۋرناليستەرمەن كەزدەسكەن كەزدە اينالما ەستاكادانىڭ بەتونىن قۇيىپ, بيىل بىتىرۋگە تىرىسىپ جاتقانىن ايتتى.
«اپورت» جانە «التىن وردا» بازارى ماڭىنداعى جاياۋ جۇرگىنشىلەر جولىنىڭ ءجۇرۋ بولىگىن دايىنداپ, باسقا مەتاللوكونسترۋكتسيا دايىندايىن زاۋىتتا جاسالىپ جاتىر. بىرەۋى 100 پايىزعا دايىن, ەكىنشىسى 70 پايىز دايىن. جىل سوڭىنا دەيىن ونى دا ءبىتىرۋدى جوسپارلاپ وتىرمىز», دەدى ول.
قالا اكىمدىگى دە مۇنداعى جولدىڭ قۇرىلىسىنا «قازاۆتوجول» كومپانياسى جاۋاپتى دەپ وتىر. ال الماتى قالاسىنىڭ بالانسىنا بەرىلۋ جاعدايى تەك قۇرىلىس جۇمىستارى تولىق اياقتالعاننان كەيىن بەلگىلى بولماق.
«قازىر رايىمبەك داڭعىلى, تاشكەنتسكي تراكت جولى رەسپۋبليكالىق ماڭىزى بار بولعاندىقتان, الماتى قالاسىنىڭ بالانسىنا كىرمەيدى. بۇل «قازاۆتوجول» ۇك اق-نىڭ بالانسىندا بولعاندىقتان, ولار قازىر رەكونسترۋكتسيا جۇرگىزىپ جاتىر. قۇرىلىس جۇمىستارىنىڭ قاشان اياقتالاتىنى بىزگە بەلگىسىز. ويتكەنى تاپسىرىس بەرۋشى سول مەكەمە», دەدى الماتى قالاسى موبيلدىلىك باسقارماسىنىڭ باس مامانى ايدىن تويبازاروۆ.
قۇرىلىس جۇمىستارىنىڭ كەشەۋىلدەۋىنە سەبەپ بولعان تاعى ءبىر جايت – قۇرىلىس ماتەريالدارىنىڭ قىمباتتاۋى. وسىدان ەكى جىل بۇرىن جاسالعان جوبالىق-سمەتالىق قۇجاتتا كورسەتىلگەن بيتۋم باعاسى قازىر 2 ەسەگە شارىقتاعان. بۇل ءوز كەزەگىندە مەردىگەر كومپانيانىڭ قارجىلىق قيىندىقتارعا تاپ بولۋىنا اكەپ سوقتىرعان. دەي تۇرعانمەن, كومپانيا وكىلدەرى تۇرعىنداردىڭ بۇل جاعدايلارعا تۇسىنىستىكپەن قاراۋىن سۇرايدى.
«بۇرىنعى جولدى قازىرگىمەن سالىستىرساق, 4 جولاقتى جول بولعان, قازىر دە سولاي. ءبىز ەشقانداي شەكتەۋ قويعان جوقپىز, جولدى جاپقان جوقپىز. كەرىسىنشە, ءجۇرۋ جولاقتارىن كوبەيتىپ جاتىرمىز», دەدى «قازاۆتوجول» ۇق اق الماتى وبلىستىق فيليالى ديرەكتورىنىڭ ورىنباسارى نۇرحات اقىلتاەۆ.
كومپانيا تاراپىنان قاجەتتى ءىس-شالار جاسالىپ جاتىر. بيىلعى جوسپاردان قالىپ جاتقانىمەن, بارلىق جۇمىستاردى كەلىسىم-شارت جانە جوسپار بويىنشا 2020 جىلدىڭ سوڭىندا اياقتاۋ كوزدەلىپ وتىر.
الماتى
