بۇل كىتاپ «Egemen Qazaqstan» گازەتىنىڭ 100 جىلدىق مەرەيتويىنا ارنالعان. وندا قازاق ءباسپاسوزىنىڭ قارا شاڭىراعى – باس باسىلىمنىڭ 2000-2008 جىلدار ارالىعىنداعى «لەزدەمەسى» قامتىلىپ, شىعارماشىلىق لابوراتورياسى نازارعا ۇسىنىلعان. ياعني گازەتتىڭ وسى كەزەڭدەگى تاريحي بەلەستەرىنىڭ جىلناماسى مەن دەرەكناماسى ىسپەتتى.
لەزدەمە– جۋرناليستەردىڭ شەبەرلىك شىڭداۋىنىڭ وزىندىك مەكتەبى ەكەندىگى بەلگىلى. سول سەبەپتى دە وندا ورتاق مۇددە تۇرعىسىندا بۇكپەسىز اڭگىمە وربىتىلەدى. گازەتتىڭ مازمۇنى مەن ساپاسى, ءتىلى مەن ستيليستيكاسى, ءتۇرلى جانرداعى ماتەريالداردىڭ جازىلۋى مەن بەرىلۋ تاسىلدەرى, ت.ب. ماسەلەلەر وتكىر پىسىقتالادى. وقىرمانداردىڭ تالاپ-تىلەكتەرى, وتىنىشتەرى مۇقيات ەسكەرىلەدى. قايتكەندە گازەتتى ساپالى شىعارۋ كەرەك؟ تاجىريبە, ىسكەرلىك, ىزدەنىمپازدىق, جۇيەلىلىك, بايقامپازدىق سەكىلدى قاسيەتتەر ءبىر ارناعا توعىستىرىلادى. قىسقاسى, لەزدەمە – «شابىت شاقىرۋ» الاڭىنا ۇقساپ كەتەدى. تاقىرىپ الۋاندىعىنا دەن قويىلادى. تاۋەلسىزدىكتىڭ مۇراتتارىنا ادالدىقتىڭ جارقىن كورىنىسى جوعارى تالاپ دەڭگەيىندە ساراپتالىپ, وقىرماندار تالقىسىنا سالىنادى. گازەت ءۇشىن ۇساق ماسەلە جوق. ءبارى ماڭىزدى, كوكەيكەستى. سوندىقتان دا گازەت كوتەرگەن ماسەلەلەردىڭ ءتىنى بولاتتاي بەرىك بولۋى ءتيىس. مىنە, اتالمىش ەڭبەكتە «لەزدەمەلەردىڭ» وسىنداي سان قيلى قىرلارى اۆتوردىڭ – «ەگەمەننىڭ» بايىرعى قىزمەتكەرىنىڭ كوزىمەن ناقپا-ناق, ەشبىر قوسپاسىز باياندالعان. ء«ادىل ءسوز اششى بولادى, ادىلدىك اكىمدىكتەن دە كۇشتى», دەپ عۇلاما ويشىل ءجۇسىپ بالاساعۇن ايتپاقشى, بۇل كىتاپتاعى اڭگىمەنىڭ نەگىزى شىندىق قاينارىنان سۋارىلعان دەسەك, ارتىق ەمەس. كىتاپ سونىسىمەن قۇندى.
«ەگەمەننىڭ» كەيىنگى بۋىنى! وسى جازبالارىم سەنىڭ كادەڭە تيتىمدەي بولسا دا جاراپ جاتسا, ماقساتىمنىڭ ورىندالعانى دەپ بىلەم!», دەپ اۆتوردىڭ اعىنان جارىلعانىنان ءبىراز جايتتى اڭعارۋعا بولادى. كىتاپ جوعارى وقۋ ورىندارىنىڭ ستۋدەنتتەرىنە, جالپى جۋرناليستەر قاۋىمىنا ارنالعان.
س.نۇربەك
نۇر-سۇلتان
