مىنە, سول بالاڭ ارمان الداماپتى. ارمان مەن ازامات اقىرى پوليتسيا اتانىپ, ديحانباەۆتار اۋلەتىنىڭ دارا جولىن جالعادى. بۇگىندە اتا اماناتىن ارقالاعان ءامىرحاننىڭ ۇلى ارمان ديحانباەۆ – اعا تەرگەۋشى, جەدەل ۋاكىل, قارجى پوليتسياسىنىڭ پوليتسەيى, شتاب باسقارماسىنىڭ ورىنباسارى سەكىلدى قىزمەتتەردى اتقارعان بەدەلدى پوليتسەي. ال اۋلەتتىڭ ءتورتىنشى پوليتسەيى ازامات ديحانباەۆ – قازىرگى تاڭدا سارىاعاش اۋداندىق پوليتسيا باسقارماسىنىڭ كوشى-قون قىزمەتىنىڭ ينسپەكتورى. مايور شەندى ازامات – اتاسى توحتانىڭ, اكەسى ءامىرحاننىڭ, اعاسى ارماننىڭ ءىزباسارى.
ول اكەسى ءامىرحاننىڭ «قىلمىسكەر پوليتسيادان قورقۋى ءتيىس, سەبەبى ول ازاماتتاردىڭ قاۋىپسىزدىگىنە جاۋاپتى بىردەن-ءبىر ادام» دەگەن سوزدەرىن ۇنەمى ەسىندە ساقتاپ جۇرەتىنىن ايتادى.
بالا كۇنىندە وزدەرىنە جۇمباق بۇل سالانىڭ ارعى اتالارىنان بەرى ءونىپ-وسكەن وسى اۋلەتكە مۇرا بولىپ كەلە جاتقاندىعىن ماقتان تۇتادى.
اڭگىمەمىزگە شەگىنىس جاساپ باياندار بولساق, ديحانباەۆتار اۋلەتىندە بەس بىردەي ازامات اتا جولىن جالعاستىرىپ كەلەدى. وسى اۋىلدىڭ ۇلكەنى توحتا اقساقال سوناۋ سۇم سوعىس ۋىن سەپكەن جىلداردا ىشكى ىستەر ورگانىنا قابىلدانىپ, وتاننىڭ اماندىعى ءۇشىن ءبىرشاما ىرگەلى ءىس اتقارىپتى. ءومىر دەرەكتەرىنە ۇڭىلسەك, قۇقىق قورعاۋ سالاسىندا ءبىرتالاي قىزمەتتىڭ قۇلاعىن ۇستاپ, جەمىستى ەڭبەك ەتىپتى.
بۇگىنگى تاڭدا توحتا ديحانباەۆ – قۇرمەتتى ەڭبەك دەمالىسىندا. ەڭبەگى ەلەنىپ, بەينەتىنىڭ زەينەتىن كورگەن زەردەلى زەينەتكەر بۇگىندە ۇلىستىڭ ۇلاعاتىن نەمەرەلەرىنە ايتۋدان جالىقپايتىن اقىلى تولىسقان ابىز, ۇل-قىزدارىن بار مەيىرىمىمەن ماپەلەپ وسىرگەن اسقار تاۋ اتا اتانىپ وتىر.
توحتادان تۋعان ۇل دا ساقشىلىق جولدى تاڭداپتى. ەل ءىشىن داۋدان, كوپشىلىكتى ۇرى-قارى, جاۋدان قورعايمىن دەپ سەرت ەتكەن ءامىرحان اتا ديحانباەۆ تا وسى سالادا ۇزاق جىلدار ەڭبەك ەتكەن. بۇگىندە ەسىمى وڭىردە قۇرمەتپەن اتالىپ جۇرگەن ءوز ءىسىنىڭ شەبەرى. ءامىرحان اتامىز 1970 جىلى قاراعاندىداعى ءىىم-ءنىڭ جوعارى مەكتەبىندە ءبىلىمىن شىڭداپ, 1974 جىلى ەڭبەك جولىن سارىاعاش اۋداندىق ىشكى ىستەر بولىمىندە جەدەل ۋاكىل بولىپ باستاپتى. بالا كۇننەن اكەسىنە ەلىكتەپ وسكەن ۇل ونىڭ سالعان جولىن جالعاستىرىپتى. قىزمەت بارىسىندا جۇكتەلگەن تاپسىرمالاردى تياناقتى ورىنداپ, قاۋىپتى قىزمەتىندە قىراعىلىعىمەن تانىلعان. ءامىرحاننىڭ ۋاقىت وتكەن سايىن تاجىريبەسى دە تولىسىپ, قازىعۇرت, سارىاعاش اۋداندىق پوليتسيا بولىمدەرىندە بىلىكتى باسشى اتانىپتى.
ءامىرحان – قازىرگى ۋاقىتتا قۇرمەتتى ەڭبەك دەمالىسىندا. جۇبايى كۇلپارشىن ەكەۋى ارمان, ازامات, اسقار جانە ايگەرىم اتتى قىزدى ماپەلەپ ءوسىرىپ وتىر. جەتەلى ۇل-قىزدارى اتاسى مەن اكەسىنە قاراپ بوي تۇزەپتى.
اۋلەتىمەن وسى سالاعا ماحابباتى بەرىك ءامىرحاننىڭ اعاسى تەمىرحان دا پوليتسيا قىزمەتىندە پولكوۆنيك شەنىن العان, بىرقاتار اۋداندا باسشىلىق قىزمەتتەردە بولعان ازامات. الايدا ارداقتى ازامات دۇنيەدەن ەرتە وزىپتى.
زەردەلەپ قارار بولساڭىز, ديحانباەۆتار اۋلەتىمەن پوليتسەي ماماندىعى ەگىز ۇعىمعا اينالىپ كەتكەندەي. سارىاعاش وڭىرىندە قۇقىق قورعاۋ سالاسىندا ەڭبەك ەتكەن كەز كەلگەن ازاماتتان «ديحانباەۆتاردىڭ ديناستياسى» جايلى سۇرار بولساڭىز, تەك جاقسى, جىلى اڭگىمەلەردىڭ تيەگىن اعىتا بەرەتىندىگى وسىدان بولسا كەرەك.
انىعىندا, ءبىر اۋلەتتەن ءتورت بىردەي پوليتسيا قىزمەتكەرلەرىنىڭ شىعۋى – سيرەك كەزدەسەتىن جاعداي. سەبەبى ادام بالاسىنىڭ ارمان-مۇراتى ءوز وتباسىندا قالىپتاسادى. دانا قازاق «اتاعا قاراپ, ۇل وسەر...» دەپ تەگىننەن-تەگىن ايتپاسا كەرەك. ويتكەنى, وتباسىنداعى بالا اكە-شەشەنىڭ ۇلگى-ونەگەسىن كورىپ وسەدى. بۇل تۇرعىدان العاندا, ديحانباەۆتار باقىتى تاسقان اۋلەت دەۋىمىزگە تولىق نەگىز بار.
ال تۇزدە تىندىرىمدى ەڭبەك ەتكەن ەر ازاماتتىڭ وتباسى, وشاق قاسىندا اقىلدى دا يبالى ايەل تۇراتىندىعى بەلگىلى. بۇل رەتتە ازامات ديحانباەۆتىڭ جان جارى مارجاننىڭ ايتۋىنشا, ايەل ارقاشان ەرىن سىيلاپ, ونىڭ قىزمەتىنە قۇرمەتپەن قاراۋى كەرەك. ءبىر سوزبەن الاڭسىز ەڭبەك ەتۋى ءۇشىن وتباسىنا الاڭ كوڭىل بولماۋى ءتيىس. «اللاعا شۇكىرشىلىك ەتەمىن, وتباسىمىزدا اقىلى مەن كەڭەسىن ۇنەمى بىزگە ايتىپ, تۋرا جولعا سالىپ وتىراتىن اتا-انامىز بار. ءوسىرىپ وتىرعان بالالارىمىزدىڭ قارنىنىڭ توقتىعى, كيىمىنىڭ بۇتىندىگى – ەرىم ازاماتتىڭ ارقاسى», دەيدى پوليتسەيدىڭ جارى.
ءبىر قىزىعى, وسىنداي ەستى ءسوز ايتىپ, ازاماتىن توبەسىنە كوتەرگەن ءتورت ءبۇلدىرشىننىڭ اناسى مارجاننىڭ اكەسى ابدۋللا اعامىز دا ىشكى ىستەر ورگاندارىندا ەلەۋلى ەڭبەك سىڭىرگەن پوليتسەي ەكەن.
شىمكەنت
