بۇل مالىمدەمەنى ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ پرەمەر-ءمينيستردىڭ ورىنباسارى بەردىبەك ساپارباەۆتىڭ جۇمىس ساپارى اياسىندا كەلگەن «شاپاعات» مۇگەدەكتەرگە ارنالعان وڭالتۋ ورتالىعىنا جانە شىمكەنتتەگى مۇگەدەكتەرگە قىزمەت كورسەتۋ ورتالىعىنا بارعاندا ايتتى. ەلىمىزدىڭ وڭتۇستىك مەگاپوليسىندە قازاقستان رەسپۋبليكاسى ەڭبەكمينىنىڭ باسشىسى, سونداي-اق «پەتروقازاقستان ويل پروداكتس» جشس ەڭبەك ۇجىمىمەن كەزدەستى جانە «الەم ءبىلىم ورتالىعى» جشس جۇمىسىمەن تانىستى. كەزدەسۋلەر بارىسىندا ءبىرجان نۇرىمبەتوۆ قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ قازاقستان حالقىنا جولداۋىنىڭ نەگىزگى باعىتتارىن ءتۇسىندىردى.
شىمكەنت قالاسىنا كەلىپ, ەڭبەك ءمينيسترىنىڭ باسشىسى «شاپاعات» مۇگەدەكتەردى وڭالتۋ ورتالىعى» كمم-ءنىڭ اشىلۋ سالتاناتىنا قاتىستى. ول ۇيىمدا مۇگەدەكتەرگە جانە 18 جاستان اسقان پسيحونەۆرولوگيالىق اۋرۋلارى بار جانە ءبىرىنشى جانە ەكىنشى توپتاعى مۇگەدەكتەرگە جارتىلاي ستاتسيونار جاعدايىندا ارنايى الەۋمەتتىك قىزمەتتەر كورسەتەدى. ورتالىقتىڭ قىزمەتكەرلەرىمەن جانە مۇگەدەكتەرمەن سويلەسۋ بارىسىندا ءبىرجان نۇرىمبەتوۆ قازىرگى ۋاقىتتا قازاقستاندا 690 مىڭ مۇگەدەكتىگى بار ادامدار تۇرادى دەپ اتاپ ءوتتى.
«مۇگەدەكتىگى بار ادامداردىڭ قۇقىقتارىن قامتاماسىز ەتۋ جانە ءومىر ءسۇرۋ ساپاسىن جاقسارتۋ جونىندەگى جۇمىس ەڭبەك جانە حالىقتى الەۋمەتتىك قورعاۋ مينيسترلىگىنىڭ ماڭىزدى باسىمدىعى بولىپ تابىلادى. 2019 جىلدىڭ 9 ايىندا مۇگەدەكتىگى بويىنشا مەملەكەتتىك الەۋمەتتىك جاردەماقى تولەۋگە 198,1 ملرد تەڭگە باعىتتالدى. اعىمداعى جىلدىڭ 1 قازانىدا الۋشىلار سانى 521 مىڭ 153 ادامدى قۇرايدى, جاردەماقىنىڭ ورتاشا مولشەرى – 42 496 تەڭگە. وسى جىلدىڭ 1 شىلدەسىنەن باستاپ مۇگەدەكتىگى بار بالالاردى جانە بالا جاسىنان ءبىرىنشى توپتاعى 18 جاستان اسقان ادامداردى كۇتۋ بويىنشا مەملەكەتتىك جاردەماقىلاردىڭ مولشەرى ارتتىرىلدى. ونىڭ مولشەرى 41 578 تەڭگەنى قۇرايدى. بۇگىنگى كۇنى جاردەماقىنىڭ ءبىرىنشى ءتۇرىن 27 ملرد.تەڭگە سوماسىندا 84,7 مىڭ ادام, ەكىنشى – 4,3 ملرد تەڭگە سوماسىندا 13,5 مىڭ ادام الدى», – دەدى مينيستر.
ءبىرجان نۇرىمبەتوۆ, سونداي-اق مۇگەدەكتىگى بار ادامداردى الەۋمەتتىك قامسىزداندىرۋ جۇيەسىنىڭ ءبىر باعىتى جارتىلاي ستاتسيونار جانە ۇيدە كۇتىم جاساۋ جاعدايىندا ارناۋلى الەۋمەتتىك قىزمەت كورسەتۋ بولىپ تابىلاتىنىن اتاپ ءوتتى. 2019 جىلى بۇل ماقساتقا رەسپۋبليكالىق بيۋدجەتتەن 1,2 ملرد تەڭگە كوزدەلگەن. بۇگىنگى كۇنى مۇنداي قىزمەتتەر 4 مىڭنان استام ازاماتقا كورسەتىلدى.
«الەۋمەتتىك تولەمدەرمەن جانە ارنايى الەۋمەتتىك قىزمەتتەردى كورسەتۋمەن قاتار مۇگەدەكتەردىڭ ەرەكشە قاجەتتىلىكتەرىنە دە كوپ كوڭىل بولىنەدى. ءبىزدىڭ مينيسترلىك ورگانيزم فۋنكتسياسىنىڭ ورنىن تولتىرۋ ماقساتىندا مۇگەدەكتىگى بار ادامدارعا بەرىلەتىن تەحنيكالىق قۇرالدار مەن ارنايى قوزعالىس قۇرالدارىنىڭ تىزبەسىن وزەكتەندىردى. سوڭعى ءۇش جىلدىڭ ىشىندە ول 32-دەن 55 ونىمگە دەيىن كەڭەيتىلدى», - دەپ تولىقتىردى ەڭبەك ءمينيسترىنىڭ باسشىسى.
«پەتروقازاقستان ويل پروداكتس» جشس مۇناي وڭدەۋ زاۋىتىنىڭ ەڭبەك ۇجىمىمەن كەزدەسۋدە ءبىرجان نۇرىمبەتوۆ جۇمىس ورىندارىن, ەڭبەك زاڭناماسىن ساقتاۋعا, وندىرىستىك جاراقاتتانۋدىڭ الدىن الۋعا جانە ۇجىمدىق ەڭبەك داۋلارىنىڭ الدىن الۋعا باسا نازار اۋداردى.
قىسقا مەرزىمدى كاسىپتىك وقىتۋ بويىنشا ءبىلىم بەرۋ قىزمەتتەر كورسەتەتىن «الەم ءبىلىم ورتالىعى» جشس وقۋ ورتالىعىندا مينيستر مەملەكەت باسشىسىنىڭ جولداۋىندا الەۋمەتتىك اسپەكتىلەرگە – وتباسىلىق بيزنەس قۇرۋ, ەڭ الدىمەن كوپبالالى جانە تابىسى از وتباسىلار ءۇشىن بيزنەستى قولداۋدىڭ جاڭا نىساندارىن بەلسەندى ەنگىزۋ قاجەتتىلىگى ناقتى بەلگىلەنگەنىن اتاپ ءوتتى.
«مۇنداي وقۋ ورتالىقتارىنىڭ جۇمىسى وتە ماڭىزدى! ءبىزدىڭ ازاماتتار ءۇشىن جاڭا كاسىبي داعدىلاردى العان كەزدە جۇمىسقا ورنالاسۋ مۇمكىندىكتەرى عانا ەمەس, سونىمەن قاتار جەكە ءىسىن اشۋ دا كەڭەيتىلەدى. ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ «ەڭبەك» مەملەكەتتىك باعدارلاماسى شەڭبەرىندە كاسىپكەرلىك نەگىزدەرىنە وقىتۋ, كرەديتتەر مەن گرانتتار بەرۋ تەتىكتەرى كوزدەلگەن. ياعني, جاڭا ماماندىق الىپ, قازاقستاندىقتار ءوزىنىڭ شاعىن بيزنەسىن ۇيىمداستىرىپ, باسقا ازاماتتارعا جۇمىس ۇسىنا الادى», - دەدى ءبىرجان نۇرىمبەتوۆ.
شىمكەنت قالاسىنداعى جۇمىس ساپارىنىڭ سوڭىندا ەڭبەك مينيسترلىگىنىڭ باسشىسى ەڭبەك, الەۋمەتتىك قورعاۋ جانە كوشى-قون كوميتەتى دەپارتامەنتىنىڭ مۇگەدەكتەرگە قىزمەت كورسەتۋ ورتالىعىنىڭ جۇمىسىمەن تانىستى, وندا مۇگەدەكتىك توبىن جانە ەڭبەك ەتۋ قابىلەتىنەن ايرىلۋ دەڭگەيىن, ورگانيزم فۋنكتسيالارىنىڭ بۇزىلۋ دارەجەسىنە جانە تىرشىلىك-تىنىسىنىڭ شەكتەلۋىنە بايلانىستى مەرزىمىن انىقتاۋ قىزمەتتەرىن ۇسىنادى.
