كيكىلجىڭگە قاتىسقان ستۋدەنتتەردىڭ ءبارى دە پەتروپاۆلعا «سەرپىن – 2050» باعدارلاماسىمەن كەلىپ, گرانتپەن وقىپ جاتقاندار. سول باعدارلامامەن كەلىپ وقىپ جاتقاندار قازىر ء بىرىنشى كۋرستا 166, ەكىنشى كۋرستا 358, ءۇشىنشى كۋرستا 245, ال ءتورتىنشى كۋرستا 204 ستۋدەنت وقىپ جاتىر. ءبارى دە باعدارلاماعا سايكەس جاتاقحانامەن قامتىلعان, ستيپەنديا الىپ تۇرادى. ستۋدەنتتەر ەلىمىزدىڭ وڭتۇستىك جانە باتىس وبلىستارىنان كەلگەن جاستار.
ءبىز تۇركىستان وبلىسىنان كەلگەن ەلامان قونىسبەكوۆ, قىزىلوردادان كەلگەن ءازىمباي اسىلبەك, تالدىقورعاننان كەلگەن ءابدالى مەيىربەكپەن اڭگىمەلەستىك. ولاردىڭ ايتۋىنا قاراعاندا كيكىلجىڭ تۇككە تۇرمايتىن اسحاناداعى كەزەككە تۇرۋعا تالاسۋدان شىققان. ءۇزىلىس ۋاقىتى از, قارنى اشقان ستۋدەنتتەردىڭ ءبارى تەزىرەك تاماق الۋعا كيمەلەمەيتىن بە ەدى. سونداي كەزدە ءۇشىنشى كۋرستا وقيتىن جانە ەكىنشى كۋرستا وقيتىن ءبىر-ەكى ستۋدەنت تالاسىپ قالادى.
ءۇشىنشى كۋرستىقتار وزدەرىنىڭ ەرەسەكتىگىن كورسەتىپ, كۇش كورسەتە سويلەپ, ەسىلدىڭ جاعاسىنا جاسى كىشىلەردى «ماسەلەنى تالقىلاۋعا» شاقىرعان. ال ەسىل وزەنى بۇلاردىڭ وقۋ ورنىنا جاقىن, بيىك دوڭنەن تۇسە قالسا ارجاعىندا جارقىراپ جاتىر. كەزدەسەتىن جەرگە بەس-التى ءۇشىنشى كۋرستىقتار كەلسە ەكىنشى كۋرستىقتار جاتاقحاناداعى 60-70 بالانى ءبىر-اق اپارعان. ەكىنشى كۋرستىقتاردىڭ وزدەرى عانا تۇتاستاي ءبىر جاتاقحانادا تۇراتىندىقتان «اتتان» دەگەنگە ءبارى اتىپ شىققان سياقتى. الايدا بالالاردىڭ ءبارى كەزدەسۋگە توبەلەستەن گورى, قىزىقتاۋعا بارعان سياقتى. ويتكەنى, پوليتسيا دا, ۋنيۆەرسيتەت باسشىلىعى دا, ستۋدەنتتەردىڭ وزدەرى دە ەشقايسىنىڭ قولىندا قارۋ بولماعانىن ايتادى.
كەزدەسپەك بولعان جەر وزەن جاعاسىنداعى «ۆوستوچنىي بەرەگ» ءدامحاناسىنىڭ جانىندا. قاپتاعان قازاق بالالارىنىڭ ۇرىس-كەرىس جاساپ, جينالىپ جاتقانىن كورىپ, كافە قىزمەتكەرلەرى دەرەۋ پوليتسيا شاقىرعان. ءسويتىپ, ول جەرگە پوليتسيا باتالونىنىڭ 11 ءاۆتوپاترۋلى جىبەرىلەدى. مۇنى كورگەن بالالار تىم-تىراقاي قاشادى. وسى كورىنىس بەينەكامەراعا ءتۇسىپ, جەلىلەرگە سالىنعان.
پوليتسيا دەپارتامەنتى ءباسپاسوز قىزمەتىنىڭ حابارىنا قاراعاندا 46 ستۋدەنت ۇستالىپ, پودگورنىي ۋچاسكەلىك پوليتسيا پۋنكتىنە جانە پەتروپاۆل قالالىق پب جەتكىزىلگەن. ء «بىر ستۋدەنتكە ەمدەلۋدى قاجەت ەتپەيتىن مەديتسينالىق كومەك كورسەتىلدى. تاعى ءبىر جابىرلەنۋشىنىڭ بەتى كوگەرگەن. اتالعان فاكتى قك 293-ءشى «بۇزاقىلىق» بابى بويىنشا سوتقا دەيىنگى تەرگەپ-تەكسەرۋلەردىڭ بىرىڭعاي تىزىلىمىنە ەنگىزىلدى. قازىرگى ۋاقىتتا بولعان وقيعانىڭ بارلىق ءمان-جايىن انىقتاۋعا باعىتتالعان جەدەل-تەرگەۋ ءىس-شارالارى جۇرگىزىلۋدە», دەلىنگەن حابارلامادا.
ۋنيۆەرسيتەتتىڭ تاربيە جانە الەۋمەتتىك ىستەر جونىندەگى پرورەكتورى نۇرلان بايىمبەتوۆتىڭ ايتۋىنا قاراعاندا ۇستالعان ەكىنشى كۋرستىڭ ستۋدەنتتەرى جاتاقحانادان شىعارىلادى, ال كيكىلجىڭدى باستاعان ءۇشىنشى كۋرستىڭ التى ستۋدەنتىن وقۋدان شىعارۋ جونىندە ۇسىنىس جاسالعان. ۋنيۆەرسيتەت باسشىلىعى تاراپىنان تارتىپتىك كەڭەس ءتيىستى تاربيە جۇمىستارىن جۇرگىزگەن. جاتاقحانادان شىعارىلاتىن ستۋدەنتتەرگە پاتەر تاۋىپ الۋ ءۇشىن ون كۇن مەرزىم بەرىلگەن.
مىنە, بار وقيعا وسى. الايدا ونى سان-ساققا جۇگىرتىپ, وتقا ماي قۇيۋشىلار كوبەيىپ جاتىر. اتىڭ وشكىر «دەدوۆششينا» دەگەندى ەسكە الىپ, «سونىڭ ناتيجەسى, ستۋدەنتتەردىڭ ءبىر-بىرىنەن اقشا تالاپ ەتۋىنىڭ كەسىرى, ءتىپتى اشتىقتان نانعا تالاسقان» دەگەن سياقتى اقىلعا سىيمايتىن كورىپكەلدىك ايتۋشىلار كوپ. «دەدوۆششينا» دەگەن بولسا الدىمەن ءبىرىنشى كۋرستىڭ ستۋدەنتتەرى جاپا شەگەر ەدى عوي. ال نانعا تالاسقان دەگەن ءتىپتى نانىمسىز. ويتكەنى, ستۋدەنتتەردىڭ ءبارى 21 مىڭ تەڭگەدەن ستيپەنديا الىپ تۇرادى, ونىڭ ۇستىنە ۇيلەرىنەن دە كومەك كەلىپ تۇراتىن كورىنەدى. جاقسى وقيتىندار 24 مىڭ تەڭگە ستيپەنديا الادى. بىزبەن سويلەسكەن ستۋدەنتتەر «اشتىق دەگەندى اۋىزعا دا الۋعا بولمايدى, ءبارىمىز وڭتۇستىكتىڭ بالالارىمىز, اقشالارىمىزدى قوسىپ, كەزەكپەن تاماق ىستەپ وتىرامىز», دەدى.
«قۇلاننىڭ قاسىنۋىنا مىلتىقتىڭ باسۋى» دەگەندەي ءدال وسى وقيعادان كەيىن رەكتور سەرىك ومىرباەۆ تا قىزمەتتەن كەتكەن ەدى. ەكى وقيعانىڭ ءبىرى-بىرىنە ەش بايلانىسى بولماسا دا اسىرە بولجالشىلدار رەكتوردى وسى كيكىلجىڭنىڭ كەسىرىنەن كەتتى دەپ سوعۋدا. ال رەكتوردىڭ جۇمىستان كەتۋ تۋرالى ارىزى بۇل وقيعادان ون ەكى كۇن بۇرىن بەرىلگەن ەكەن...
قورىتا ايتساق, «سوزدە قاڭقۋ جامان, اۋرۋدا شانشۋ جامان» دەگەندەي الىپقاشپا اڭگىمەگە ءمان بەرۋدىڭ كەرەگى جوق, بارلىق بولعان وقيعا وسى. الايدا ستۋدەنتتەر اراسىنداعى تاربيە مەن ءتارتىپ جۇمىستارىن جانداندىرا ءتۇسۋ قاجەت سەكىلدى. «سەرپىن» باعدارلاماسىنا دا وسىناۋ بولماشى كيكىلجىڭ سىزات تۇسىرە قويماس دەگەن سەنىمدەمىز. ونىڭ ءبىزدىڭ حالقىمىز ءۇشىن پايداسى زور.
