باسقارماعا تۇسكەن جەدەل اقپارات بۇرىن سوتتالعان تۇرعىننىڭ ەسىرتكى ساتۋمەن اينالىساتىنىن استىرتىن جەتكىزگەن. وسى حابارمەن كەلگەن پوليتسيا قىزمەتكەرلەرى ءۇيدى ءتىنتۋ بارىسىندا «سپەيس» اتتى سينتەتيكالىق پسيحوتروپتى زاتتىڭ ءبىر رەتتىك 600 دوزاسىن تاۋىپ, تاركىلەدى. بۇل حيميالىق ەسىرتكىنىڭ ۇلكەن كولەمى دەپ سانالادى. ۇستالعان ادام ونى قالتاشىقتارعا ءبولىپ, ساتۋعا دايىنداپ قويعانى دا بەلگىلى بولىپ وتىر.
بۇل تۋرالى جۋرناليستەرگە وبلىستىق پوليتسيا دەپارتامەنتىنىڭ ەسىرتكىگە قارسى كۇرەس باسقارماسىنىڭ باستىعى, پولكوۆنيك جاندوس باسىباەۆ حابارلادى. سونىمەن بىرگە ول ۇستالعان ادامنىڭ ۇيىنەن ەتيل ءسپيرتىنىڭ فلاكوندارى, اق ءتۇستى بەلگىسىز ۇنتاقتار, قالتاشىقتارداعى دارىحانالىق شوپتەر جانە ت.ب. تابىلعانىن ايتتى. كۇدىكتى وسىلاردىڭ ءبارىن ارالاستىرىپ, پسيحوتروپتىق زاتتار دايىنداعان. قازىر وسى زاتتاردىڭ ءبارى ساراپتاماعا جىبەرىلگەن.
ۇستالعان كۇدىكتىنىڭ ۇستىنەن قىلمىستىق كودەكستىڭ 297-بابىنىڭ ەكىنشى تارماعى بويىنشا قىلمىستى ءىس قوزعالىپ, ۋاقىتشا ۇستاۋ وقشاۋلاعىشىنا وتىرعىزىلدى.
وسى جىلدىڭ 9 ايىندا سولتۇستىك قازاقستان وبلىسى بويىنشا ەسىرتكىگە قاتىستى قۇقىق بۇزۋ بويىنشا 151 بۇزۋشىلىق تىركەلگەن. سونىڭ ىشىندە 96 قىلمىس, 55 اۋىر جانە اسا اۋىر قىلمىس دەپ باعالانعان. 34 فاكتى بويىنشا ەسىرتكى ساتۋشىلىق قىلمىسى تىركەلگەن. ەسىرتكىگە قارسى كۇرەس قىزمەتكەرلەرى بارلىعى 393 كيلو ەسىرتكىلىك زاتتار تاركىلەسە, سونىڭ 114 گرامى گەروين, 93 گرامى كوكاين جانە 1 كيلوگرامنان ارتىعى سينتەتيكالىق ەسىرتكىلەر بولعان. قىلمىستى ىسكە تارتىلعان ادامدار سانى 94-كە جەتكەن.
سولتۇستىك قازاقستان وبلىسى
