ول نەگىزگى كەيىپكەرلەرى – دانا قارت, ەر جىگىت, يبالى كەلىنشەك, پەرىشتە ءسابي, جۇيرىك ات, قىران بۇركىت, ماڭعاز تۇيە نەمەسە قارا شاڭىراق, جاس وتاۋ سىندى ۇعىمدار, سونداي-اق سال-سەرىلىك, ساياتشىلىق داستۇرلەرى ارقىلى كوشپەندى ءومىردىڭ تىلسىمعا تولى بولمىسىن بەينەلەيدى. ءاربىر كەيىپكەرگە نە ءاربىر ۇعىمعا دارالىق دارىتقىسى كەلەدى. بۇل ورايدا گرافيكامەن دە, مايلى بوياۋمەن دە جۇمىس ىستەيتىن سۋرەتشى ءداستۇرلى رەاليزمنەن تىس سۋرەت ونەرىندە «تۋىندى ىشىندەگى تۋىندى» ءپرينتسيپىن باسشىلىققا الاتىن پوستمودەرنيزمدى دە جاتسىنبايتىنى كورىنىپ تۇر. ونىڭ وقۋشىلار سارايىندا اشىلعان «اتامەكەن» اتتى كورمەسىنە سوڭعى جىلداردىڭ بەدەرىندە دۇنيەگە كەلگەن تۋىندىلارى قويىلدى.
«اتامەكەن» كورمەسىنىڭ اشىلۋى – زەينەتكەرلىك جاسقا جەتكەن سۋرەتشىنىڭ ەلگە ەسەپ بەرۋى, شىعارماشىلىعىنداعى جاڭالىقتاردى كورسەتۋى. جاڭالىق دەمەكشى, 100-دەن اسا جۇمىستاردىڭ ىشىندە وتكەن عاسىرداعى قازاق ءۇشىن ەڭ اۋىر ساياسي زوبالاڭدار مەن الاپات اشتىق وقيعاسى ورىن العان – 1916, 1932, 1937, 1986 جىلدار ورو تەحنيكاسىمەن سالىنعان. بۇل تەحنيكامەن, ياعني ماتاعا سۋرەت سالۋمەن سۋرەتشى سوڭعى جىلدارى عانا اينالىسا باستاپتى. كورمەدە ءسوز العان وقۋشىلار سارايىنىڭ ديرەكتورى ەربول ىرگەباي سۋرەتشى شىعارماشىلىعىن رۋحاني جاڭعىرۋعا قوسىلىپ جاتقان ۇلكەن ەڭبەك رەتىندە باعالاپ, اسىرەسە ورو تەحنيكاسىمەن بەدەرلەنگەن تاريحي وقيعالاردىڭ جاس ۇرپاققا وي سالاتىن ماعىنالى شىعارمالار ەكەنىنە توقتالدى.
جازۋشى جولتاي-جۇمات ءالماش ۇلى كورمە يەسىنىڭ جاس جىگىتتەر سىندى ىزدەنگىشتىگىنە تانتىلىگىن ايتتى. – ومىربەك الپىسقا كەلسە دە جاس جىگىتتەر سياقتى ىزدەنەدى. بۇگىنگى كورمەسى سونىڭ ايعاعى. ونىڭ وزگەشە مانەرمەن سالعان سۋرەتتەرىنە ريزا بولىپ تۇرمىن. ول قانداي جانردا ەڭبەكتەنسە دە, وزەگىندە ۇلتتىق نەگىز جاتادى. تاقىرىپتى كەڭ اۋقىمدا الادى, – دەدى جازۋشى. ال كورمەگە قوناق رەتىندە قاتىسقان استانا قالاسى جاس سۋرەتشىلەر بىرلەستىگىنىڭ توراعاسى ءومىرالى يسمايلوۆ الداعى جىلى سولتۇستىك كيپردە تۇركى ەلدەرى سۋرەتشىلەرىنىڭ مۇراجايى اشىلاتىنىن, وعان ەلىمىز اتىنان تىلەۋليەۆتىڭ دە كارتينالارى قويىلاتىنىن اتاپ ءوتتى.
ومىربەك تىلەۋليەۆ تەك سۋرەتشى ەمەس. ول سۋرەت ونەرىنە عاشىق جاسوسپىرىمدەردىڭ ۇستازى دا. نۇر-سۇلتان قالاسىنداعى وقۋشىلار سارايىندا ۇستازدىق قىزمەت اتقارىپ جۇرگەن سۋرەتشىنىڭ جەكە كورمەسىنە وقۋشىلاردىڭ جيىلۋى دا تەگىن ەمەس. ونەرلى بالالار كورمەنىڭ اشىلۋىندا ءان شىرقاپ, بي بيلەپ شارانىڭ قىزىقتى وتۋىنە ءبىر كىسىدەي اتسالىستى.
وقۋشىلار سارايىندا تىلەۋليەۆ تۋىندىلارى قويىلعان كورمە كورەرمەندەرىن كۇتەدى.
ايگۇل سەيىل,
«Egemen Qazaqstan»
