بوكستان ايەلدەر اراسىندا الەم چەمپيوناتى تۇڭعىش رەت 2001 جىلى ۇيىمداستىرىلدى. اقش-تىڭ پەنسيلۆانيا شتاتىنا قاراستى سكرانتون دەپ اتالاتىن شاعىن عانا شاھاردا جالاۋى جەلبىرەگەن جارىستا 12 سالماق دارەجەسى بويىنشا جۇلدەلەر ساراپقا سالىندى. جالپى ەسەپتە رەسەي قۇراماسىنا تەڭ كەلەر ەشكىم تابىلمادى. ولار 4 التىن, 2 كۇمىس جانە 2 قولا مەدالدى ولجالادى. 2 التىنى مەن 2 قولاسى بار شۆەتسيا ەكىنشى ورىندى يەلەنسە, ۆەنگريا (1+4+0), كانادا (1+1+7) جانە اقش (1+0+3) قۇرامالارى ۇزدىك بەستىكتىڭ قاتارىنان كورىندى.
2002 جىلى تۇركيانىڭ ەڭ كورىكتى جەرلەرىنىڭ ءبىرى – انتاليادا وتكەن ايقاستا سولتۇستىك كورەيا (2+2+1) مەن ۋكراينانىڭ (2+1+2) ارۋلارى الىمدى كورىندى. ودان كەيىنگى ورىندارعا رەسەي (1+1+3), بەلارۋس (1+1+0) جانە يتاليا (1+1+0) جايعاستى.
2005 جىلى ماسكەۋدىڭ ىرگەسىندەگى پودولسك قالاسىندا ۇيىمداستىرىلعان جارىستا جەرگىلىكتى بىلعارى قولعاپ شەبەرلەرى شاشالارىنا شاڭ جۇقتىرماي, 7 التىن, 1 كۇمىس جانە 4 قولانى ەنشىلەدى. ودان كەيىنگى ساتىلارعا كانادا (1+1+2), ءۇندىستان (1+0+4), ۆەنگريا (1+0+2) جانە رۋمىنيا (1+0+1) جايعاستى.
2006 جىلى ءۇندىستاننىڭ استاناسى – نيۋ-دەليدەگى دودادا قازاقستاننىڭ بۇرىمدىلارى ءوز تاريحىندا تۇڭعىش رەت جەڭىس تۇعىرىنا كوتەرىلدى. بۇل جۇلدەنىڭ يەسى – نازگۇل بورانباەۆا. كەزىندە كيكبوكستان ءبىراز بەلەستى باعىندىرىپ, حالىقارالىق دارەجەدەگى سپورت شەبەرى اتانعان قازاقتىڭ قايسار قىزى بوكسقا دا تەز-اق بەيىمدەلىپ, 46 كيلو سالماق دارەجەسىندە قولا مەدالدى موينىنا ءىلدى. ال كوماندالىق ەسەپتە مىنا ەلدىڭ وكىلدەرى ەڭ ۇزدىك ناتيجەگە قول جەتكىزدى: رەسەي (3+0+3), سولتۇستىك كورەيا (2+0+1), كانادا (1+0+2) جانە تۇركيا (1+0+1).
2008 جىلى قىتايدىڭ نينبو قالاسىندا جەرلەستەرىمىز جوعارىداعى ناتيجەسىن قايتالاپ, ءبىر قولا مەدالعا يەلىك ەتتى. بۇل جولى 70 كيلو سالماقتاعى ەلەنا كولتسوۆانىڭ باعى جاندى. ءوز جەرىندەگى جارىستا اسپاناستى ەلىنىڭ ارۋلارى (4+2+4) الدارىنا جان سالماسا, ودان كەيىنگى ورىنداردى تۇركيا (2+0+2), كانادا (2+0+1), ءۇندىستان (1+1+2) جانە سولتۇستىك كورەيا (1+0+2) يەلەندى. ءبىر ايتا كەتەرلىگى, سوڭعى ءۇش الەم چەمپيوناتىندا 13 سالماق دارەجەسىنىڭ جۇلدەلەر جيىنتىعى ساراپقا سالىندى.
2010 جىلى باربادوستىڭ بريدجتاۋن قالاسىندا قازاقستاننىڭ تۋى ەكى مارتە كوكتە جەلبىرەدى. 81 كيلو سالماقتاعى مارينا ۆولنوۆا اقتىق سىنعا دەيىن القىنباي جەتىپ, شەشۋشى تۇستا برازيليالىق روزەلي فەيتلودان ۇتىلسا, 46 كيلو سالماقتاعى نازگۇل بورانباەۆا قولا مەدالدى موينىنا ءىلدى. كاريب تەڭىزى جاعالاۋىنداعى ارالدا وتكەن جارىستا مىنا مەملەكەتتەردىڭ بوكسشىلارى ۇزدىك ناتيجە كورسەتتى: رەسەي (2+1+0), قىتاي (1+3+3), سولتۇستىك كورەيا (1+1+0), اقش (1+0+2) جانە ءۇندىستان (1+0+1). سول كەزدەن باستاپ, الەم چەمپيوناتتارىنداعى سالماق دارەجەلەرىنىڭ سانى 10-عا دەيىن كەمىدى.
بريدجتاۋنداعى كورسەتكىشتى وتانداستارىمىز 2012 جىلى تسينحۋانداودا اينا-قاتەسىز قايتالادى. بۇل باسەكەدە اسا اۋىر سالماقتاعى جۇلدىز ماماتقۇلوۆا كۇمىس السا, اسا جەڭىل سالماقتاعى نازىم قىزايباي قولاعا قول سوزدى. وسى تابىسىنىڭ ارقاسىندا قازاقستان قۇراماسى كوماندالىق سايىستا تۇڭعىش رەت ۇزدىك وندىقتىڭ ساناتىنان كورىندى. ال الدىڭعى لەكتەگى قۇرامالار مىنالار: قىتاي (3+1+1), اقش (1+2+2), رەسەي (1+1+7) جانە انگليا (1+1+2).
2014 جىلى چەدجۋدە العاش رەت قازاق ەلىنىڭ ءانۇرانى شىرقالدى. 48 كيلو سالماقتاعى نازىم قىزايباي بارلىق قارسىلاسىن قاپى قالدىرىپ, ءوزىنىڭ مىقتىلىعىن مويىنداتتى. اقتىق سىندا التىن قىزىمىز ۇندىستاندىق سارجۋبالا دەۆيدەن باسىم ءتۇستى. +81 كيلو سالماقتاعى ءلاززات كۇنگەيباەۆا كۇمىس مەدالدى قاناعات تۇتتى. فينالدا ول رەسەيلىك زەمفيرا ماگومەداليەۆاعا جول بەردى. وڭتۇستىك كورەياداعى جارىستىڭ قورىتىندىسى بويىنشا رەسەي (3+1+1), اقش (2+0+1) جانە قىتايدى (1+1+2) العا جىبەرگەن جەرلەستەرىمىز ءتورتىنشى ورىنعا تۇراقتادى.
2016 جىلى قازاقستاننىڭ استاناسىندا وتكەن جارىس بارشا جانكۇيەردىڭ جادىندا. شارشى الاڭدا اسقان شەبەرلىك تانىتقان قازاقتىڭ بۇرىمدىلارى 4 التىن جانە 2 قولا مەدالدى جەڭىپ الىپ, جالپى ەسەپتە ءبىرىنشى ورىنعا كوتەرىلدى. تارقاتىپ ايتساق, نازىم قىزايباي (48 كيلو), دينا جولامان (54 كيلو), ۆالەنتينا حالزوۆا (69 كيلو) جانە ءلاززات كۇنگەيباەۆا (81 كيلو) التىننان القا تاعىنسا, جاينا شەكەربەكوۆا (51 كيلو) مەن ايجان قوجابەكوۆا (57 كيلو) ءۇشىنشى ورىندارعا تابان تىرەدى. قازاقستاننان كەيىنگى ۇزدىك ناتيجەلەر قىتاي (2+2+2), اقش (1+1+3), فرانتسيا (1+0+1) جانە ۇلىبريتانياعا (1+0+1) تيەسىلى.
2018 جىلى نيۋ-دەليدە جاينا شەكەربەكوۆا (51 كيلو) كۇمىس جانە كارينا يبراگيموۆا (60 كيلو) قولا مەدالدى ەنشىلەپ, قازاقستان قۇراماسى گوللانديامەن بىرگە كوماندالىق سايىستا ۇزدىك وندىقتى قورىتىندىلادى. ال ەڭ ۇزدىك ناتيجەلەرگە قىتاي (4+1+0), تايپەي (2+0+0), ءۇندىستان (1+1+2) جانە گەرمانيا (1+0+1) قول جەتكىزدى.
بيىل ۋلان-ۋدەدە وتكەن جارىستا قازاقستاننىڭ ەڭ بەلدى بىلعارى قولعاپ شەبەرلەرىنىڭ بارلىعى دا باق سىنادى. وكىنىشكە قاراي, سولاردىڭ دەنى جارتى جولعا جەتپەي ءسۇرىندى. ماسەلەن, الەمنىڭ ەكى دۇركىن چەمپيونى دەگەن دارداي اتاعى بار نازىم قىزايباي (51 كيلو) تۇساۋكەسەر كەزدەسۋدە جاپونيالىق تسۋكيمي ناميكيگە ەسە جىبەردى. بىلتىر ءدال وسى سپورتشى نيۋ-دەليدەگى دۇنيەجۇزىلىك دودانىڭ جارتىلاي فينالىندا ءبىزدىڭ جاينا شەكەربەكوۆادان ۇتىلعان ەدى.
وسىدان ءۇش جىل بۇرىن قازاق ەلىنىڭ استاناسىندا جالاۋى جەلبىرەگەن الەمدىك دودادا قولا مەدالدى موينىنا ىلگەن ايجان قوجابەكوۆا (57 كيلو) العاشقى اينالىمنان اسا المادى. ول گوللانديا سپورتشىسىنا جول بەردى. ءدال سول جارىستا التىن تۇعىرعا كوتەرىلگەن دينا جولامان شيرەك فينالدا اقش بوكسشىسى نيكايا كرەپستەن ۇتىلدى. ريو وليمپياداسىنىڭ قولا جۇلدەگەرى, ازيانىڭ ەكى دۇركىن چەمپيونى داريعا شاكىموۆا (69 كيلو) پانامەريكا ويىندارىنىڭ جەڭىمپازى, امەريكالىق وشا دجونستان جەڭىلدى. ءبىر سوزبەن ايتساق, بۋرياتيادا جارىس جولىنا شىققان 10 بوكسشىمىزدىڭ سەگىزى قالىڭ توپتىڭ اراسىندا قالىپ قويدى.
بيىلعى بايراقتى باسەكەدە جۇلدە الۋ باقىتى تەك ميلانا سافرونوۆا مەن دينا يسلامبەكوۆاعا عانا بۇيىردى. 64 كيلو سالماقتاعى سافرونوۆانىڭ تاجىريبەسى وتە زور. 28 جاستاعى بوكسشى وسىدان بىرەر اي بۇرىن بانگكوكتا ۇيىمداستىرىلعان ازيا بىرىنشىلىگىندە قولا مەدالدى يەلەنىپ, وعان دەيىن بىرقاتار حالىقارالىق تۋرنيرلەردە اتوي سالدى. باستاپقى باسەكەلەرىنىڭ بارلىعىن جەڭىسپەن اياقتاعان ميلانا جارتىلاي فينالدا يتاليالىق انجەلە كارينيدىڭ وسال تۇسىن تابا المادى.
+81 كيلو سالماق دارەجەسىندە ايقاسقان دينا يسلامبەكوۆانىڭ ەلىمىزدىڭ ايەلدەر قۇراماسىنا قوسىلعانىنا اسا كوپ ۋاقىت بولا قويعان جوق. سوعان قاراماستان ول ءوزىنىڭ ورەلى ونەرىمەن كوزگە ءتۇسىپ, تورتكۇل دۇنيەنىڭ مىقتىلارى باس قوسقان باسەكەدە كۇش سىناسۋ قۇرمەتىنە بولەندى. بۇل رەتتە 19 جاستاعى قازاق قىزى ەل سەنىمىن اقتادى. دينا ۋلان-ۋدەدەگى دودانى قولا مەدالمەن قورىتىندىلادى.
