الدىمەن, ازەربايجان حالقىنىڭ اياۋلى پەرزەنتى, جالپىۇلتتىق كوشباسشىسى گەيدار اليەۆ تۋرالى «ەلىنە جول اشقان» اتتى عۇمىرنامالىق جيناق تانىستىرىلدى. بۇل جيناق قازاقستاندا جارىق كورىپ, وقىرمانعا بىلتىر ۇسىنىلعان بولاتىن. ۇزاق جىلدار گ.اليەۆپەن تامىرى تەرەڭ دوستىقتا بولعان قازاقستان رەسپۋبليكاسىنىڭ تۇڭعىش پرەزيدەنتى – ەلباسى ن.نازارباەۆتىڭ العىسوزىمەن شىققان باعالى باسىلىمدى ازەربايجاندىقتار ەرەكشە ىقىلاسپەن قابىل الدى.
سونىمەن قاتار باۋىرلاس ەلدىڭ 20 كلاسسيگىنىڭ تاڭداۋلى تۋىندىلارى توپتاستىرىلعان «ازەربايجان ادەبيەتىنىڭ انتولوگياسى» دا ءتۇبى ءبىر تۇركى جۇرتى ءۇشىن ماڭىزدى ەڭبەك سانالادى. انتولوگياداعى بىرقاتار شىعارمالار قازاق تىلىنە تۇڭعىش رەت تارجىمالانعان.
بۇدان بولەك, باكۋدە تانىستىرىلعان كىتاپتاردىڭ ىشىندە ءبولىپ-جارماي قاتار اتالاتىن ەكى اقىننىڭ تۋىندىلارى بار. ءبىرى – ازەربايجان ادەبيەتىنىڭ كلاسسيگى, بيىل تۋعانىنا 650 جىل تولعان يمادەددين ءناسيمي بولسا, ەكىنشىسى – تۇگەل تۇركىنىڭ ءتورى تۇركىستاندى جىرعا قوسقان, قازاق پوەزياسىنىڭ جارىق جۇلدىزى ماعجان جۇماباەۆ. ءناسيميدىڭ ولەڭدەرى «مەن سىيمايمىن عالامعا» دەگەن اتپەن قازاق تىلىنە اۋدارىلىپ شىقسا, ماعجان جىرلارى كەرىسىنشە العاش رەت ازەربايجانشا جارىق كورىپ وتىر.
ازەربايجان ۇلتتىق عىلىم اكادەمياسى جانىنداعى نيزامي اتىنداعى ادەبيەت ينستيتۋتىندا وتكەن كىتاپتاردى تانىستىرۋ راسىمىنە تانىمال عالىمدار, مەملەكەتتىك قىزمەتكەرلەر مەن زيالى قاۋىم وكىلدەرى قاتىستى.
ازەربايجان ۇلتتىق عىلىم اكادەمياسىنىڭ ۆيتسە-پرەزيدەنتى – نيزامي اتىنداعى ادەبيەت ينستيتۋتىنىڭ ديرەكتورى, ازەربايجان ۇلتتىق ءماجىلىسىنىڭ دەپۋتاتى, اكادەميك يسا حابيببەيلي تۇركى حالىقتارى ىنتىماقتاستىعىن ارتتىرۋدا تامىرلاس ەلدەردەگى تۇعىرلى تۇلعالار مەن مەملەكەت قايراتكەرلەرىنىڭ ءومىر جولىن تەرەڭ تانىپ, تاعىلىم الۋدىڭ ماڭىزى زور ەكەنىن اتاپ ءوتتى. سونداي-اق ونىڭ ايتۋىنشا, ورتاق ادەبي مۇرالارىمىزدى وزگە تۋىس ەلدەردىڭ تىلدەرىنە اۋدارىپ ۇسىنۋ بارشامىزدى بىرىكتىرە تۇسەدى. وسى ورايدا, يسا حابيببەيلي تۇركى اكادەمياسىنىڭ «تۇركى الەمى ادەبيەت انتولوگيالارى» سەرياسىن شىعارۋدى قولعا الۋىن جوعارى باعالاپ, ريزاشىلىعىن ءبىلدىردى. «بۇل تۇركى اكادەمياسىنىڭ باۋىرلاس ەلدەردىڭ مول مۇراسىن تۇگەندەپ, بايلانىستارىمىزدى نىعايتا ءتۇسۋ جولىندا قاجىرلى ەڭبەك ەتىپ جاتقانىنىڭ كورسەتكىشى» – دەدى اكادەميك.
