وسى قىلىق تسيركتەگى ءبىر قاسقىر ۇيرەتۋشىنىڭ باسىنان كەشكەن وقيعانى ەسكە ءتۇسىردى. ول ءوزىنىڭ باعدارلاماسى بويىنشا ەكى قاسقىردى تسيرك ارەناسىندا ۇلىتىپ, ودان ءارى شالقاسىنان جاتقىزادى ەكەن. سول كەزدە ارەناعا اتىپ شىققان قوزى ولاردىڭ ۇستىنەن قارعىپ وتەتىن بولعان. بۇل كورەرمەندەرگە وزگەشە قىزىق كورىنىس بولىپ, ابدەن قول سوعادى. ءبىر كۇنى وسى باعدارلاماسىن جاساپ جاتقاندا ۇستىنەن سەكىرە بەرگەن قوزىنى قاسقىر ارس ەتىپ قاۋىپ الادى. بۇيىرىنەن قان ساۋلاعان قوزى ارەنادان تۇرا قاشادى. سويتسە, تسيرك ءارتيسىنىڭ جاڭادان تاعايىندالعان اسسيستەنتى ساندىك ءۇشىن قوزىنىڭ موينىنا شار بايلاپ, اسەمدەپ جىبەرگەن ەكەن. ادامدار ءۇشىن ءسان بولعانىمەن بۇل تاعى ءۇشىن قاۋىپ بولىپ كورىنىپتى. قوزىنى قاۋىپ العانى سول ەكەن.
سول سياقتى قالانىڭ ادامدارعا كوز قۋانىشىن سىيلاپ, شىنىدان جاساتىپ قويعان ايالدامالارى كەيبىر ادامدارعا «قاۋىپ» بولىپ كورىنەتىن سەكىلدى.
شىنى ايالدامانى قايتا-قايتا ۇرىپ, كۇل-تالقان قىلعان 23 جاسار ەسەرسوق جەتى تۇندە ۇستالىپ, بەس تاۋلىككە قامالدى. ن.نازارباەۆ كوشەسىندەگى №110 ءۇيدىڭ جانىنداعى ايالدامانى اكەسىنىڭ قۇنى قالعانداي تەپكىلەپ جاتقان ونى كورشىلەر كورىپ, پوليتسيا شاقىرعان. قازىر ونىڭ ءىسى تەرگەۋدەن ءوتىپ, سوتقا جىبەرىلىپ وتىر. اكىمشىلىك قۇقىق بۇزۋشىلىق كودەكسىنىڭ 434 بابىنا سايكەس ول «ۇساق بۇزاقىلىق» جاسادى دەپ ايىپتالىپ, بەس اەك كولەمىندە ايىپپۇل تولەپ ءارى كەلتىرگەن شىعىندى وتەسە بوساتىلادى.
بۇرىن وسى سياقتى بۇزاقىلىق جاساعانداردىڭ تورتەۋى عانا ۇستالىپ, جازاعا تارتىلعان ەكەن.
پەتروپاۆل
