بىرلەسكەن توپتىڭ قۇرامىنا «اتامەكەن» ۇكپ ورتالىق اپپاراتىنىڭ وكىلدەرى, ماڭعىستاۋ وبلىسى كاسىپكەرلەر پالاتاسىنىڭ قىزمەتكەرلەرى جانە جاڭاوزەن قالاسى اكىمدىگى نەگىزگى بولىمدەرىنىڭ, «كاسپي» اكك جانە قارجى ۇيىمدارىنىڭ باسشىلارى ەندى. بىرلەسكەن جۇمىس توبى تەحنوپارك, اۋىل شارۋاشىلىعى ايماعىن دامىتۋ, ءوندىرىستى وقشاۋلاۋ, بيزنەسكە جانە ميكرو قارجىلاندىرۋ قۇرالدارى اياسىن كەڭەيتۋ مىندەتتەرىن نازارعا الماق. سونداي-اق وبلىس جانە رەسپۋبليكا دەڭگەيىندە جاڭاوزەن قالاسىنىڭ ەكونوميكاسىن دامىتۋ ءۇشىن كەدەرگىلەردى جويۋعا جۇيەلى شارالار جاساقتالىپ, ۇسىنىلادى.
جاڭا جوبا اياسىندا كاسىپكەرلەرمەن دوڭگەلەك ۇستەل, جىلجىمالى كەڭەس, كەزدەسۋلەر وتكىزۋ باستالدى. جاڭاوزەندىك ىسكەرلەر قالا مەن جاقىن ورنالاسقان ەلدى مەكەندەردە مال دارىگەرىنىڭ جەتىسپەيتىنىن, مال سىرقاتىن ەمدەۋ قاراپايىم شارۋاعا قيىنعا سوعاتىنىن العا تارتتى.
– بۇل ماسەلە كوپتەگەن وڭىردە بار. مۇنى شەشۋ ءۇشىن ءتيىستى زاڭعا وزگەرتۋلەر مەن تولىقتىرۋلار ەنگىزىلىپ جاتىر. قازىر قۇجات سەناتتا قارالۋدا. ءبىلىم العان ۆەتەرينار ماماندارعا اۋىل شارۋاشىلىعى سالاسىندا ءۇش جىل ەڭبەك ەتۋى مىندەتتەلەتىن بولادى. وسىندا ايتىلعان پروبلەمالاردى رەسپۋبليكالىق دەڭگەيدە تالقىلايمىز, – دەدى «اتامەكەن» ۇكپ اۋىلشارۋاشىلىق كەشەنى جانە ازىق-ت ۇلىك ونەركاسىبى دەپارتامەنتى ديرەكتورىنىڭ ورىنباسارى ەركەن ناۋرىزبەكوۆ.
باسقوسۋدا «اتامەكەن» ۇكپ قۇرىلىس دەپارتامەنتى ديرەكتورىنىڭ ورىنباسارى اڭسار سەيسەكەەۆ, قوعامدىق مونيتورينگ جانە اكىمشىلىك كەدەرگىلەرمەن جۇمىس دەپارتامەنتىنىڭ ساراپشىسى داۋرەن ساتقامباەۆ تا كاسىپكەرلەردى تولعاندىرعان سۇراقتارعا جاۋاپ بەردى. جەرگىلىكتى كاسىپكەرلەر اۋىز سۋ, گاز, مال ازىعى, ءۇي جانۋارلارى سىرقاتىمەن كۇرەس جاعدايىن تالقىلاپ, ونىڭ شەشۋ جولدارىن بىرلەسە ىزدەدى.
– 7 قازاندا باستالعان «كاسىپ ءتۇبى – ءناسىپ» جوباسى 2016 جىلدىڭ سوڭىندا «اتامەكەن» كاسىپكەرلەر پالاتاسىمەن جۇزەگە اسقان «جاڭاوزەنگە – جاڭا كاسىپ» جوباسىنىڭ جالعاسى دەۋگە بولادى. ءبىز مەملەكەتتىك قولداۋ باعدارلامالارى, ماركەتولوگ قىزمەتى, زاڭ قىزمەتتەرى, اۋىل شارۋاشىلىعى سالاسى, مەملەكەتتىك جانە جەكەمەنشىك (ەلەكتروندى) ساتىپ الۋلار, كاسىپكەرلىكتى دامىتۋعا قاتىستى ۇسىنىستار, بيزنەستى قارجىلاندىرۋ تەتىكتەرى سىندى بىرنەشە باعىتتا جۇمىس ىستەيمىز. بىلىكتى ماماندار كاسىپكەرلەرگە كەڭەس بەرەدى. قورىتىندىسىندا ناقتى ءىس-شارالار مەن ۇسىنىستار قابىلدانادى. كاسىپكەرلەر مەن بيزنەس-باستاماسى بار تۇلعالاردى توپ جۇمىسىنا بەلسەندى قاتىسۋعا شاقىرامىز. جۇمىسىمىز جىلدىڭ سوڭىنا دەيىن جالعاسادى جانە ءبىز ءوز الدىنا جاڭاوزەن قالاسىنداعى بيزنەستىڭ دامۋىنا ىقپال ەتەتىن ناقتى ماقساتتى كورسەتكىشتەردى قويامىز, – دەپ ءتۇسىندىردى «اتامەكەن» ۇكپ باسقارۋشى ديرەكتورى – جاپپاي كاسىپكەرلىك جانە ميكرو قارجىلاندىرۋ دەپارتامەنتىنىڭ ديرەكتورى باۋىرجان ورازعاليەۆ.
قازىرگى تاڭدا جۇمىس توبى جاڭاوزەن قالاسى ماڭىنداعى تەڭگە اۋىلى مەن «راحات» شاعىن اۋدانى تۇرعىندارىمەن كەزدەستى. وندا كاسىپكەرلەرگە «كاسىپ ءتۇبى – ءناسىپ» جوباسى ءتۇسىندىرىلىپ, «اگرارلىق نەسيە كورپوراتسياسى» اق, «اۋىل شارۋاشىلىعىن قارجىلاي قولداۋ قورى» اق, «كاسپي» الەۋمەتتىك-كاسىپكەرلىك كورپوراتسياسى» اق ماماندارى كەڭەس بەرىپ, شەشىمىن تاپپاعان ماسەلەلەر مەن سۇراقتارعا جاۋاپ بەردى.
ماڭعىستاۋ وبلىسى
