جوبا شەڭبەرىندە 18-29 جاس ارالىعىنداعى وزىندىك وي-ارمانى, مىعىم ماقساتى بار جاستار كاسىپكەرلىككە وقىتىلىپ, ولارعا 505 مىڭ تەڭگە قايتارىمسىز گرانت بەرىلەدى. جۇمىسسىز نەمەسە ءوزىن-ءوزى جۇمىسپەن قامتۋشى جاستارعا باسىمدىق بەرىلەدى. باعدارلاماعا قاتىسۋ ءۇشىن جاستار كەز كەلگەن باعىتتا پايدالى جوبا ۇسىنۋى كەرەك.
جوعارىدا ايتىپ وتكەنىمىزدەي, «جاس كاسىپكەر» جوباسى ارقىلى وقىعاندارعا ۇسىنىلاتىن گرانت قايتارىمسىز. بەرىلگەن قارجىعا الىنعان قاجەتتى دۇنيەلەردىڭ بارلىعى جاستاردىڭ وزىندە قالادى جانە كەيىن جەكە كاسىبىن باستاۋعا نەگىز بولادى.
اسىلحان سالىق – وسى جوباعا قاتىسۋشىلاردىڭ ءبىرى. سىرىم اۋدانى, كوزدىقارا اۋىلىنىڭ 19 جاستاعى تۇرعىنى «جاس كەزىمدە بەينەت بەر, قارتايعاندا زەينەت بەر» دەگەندى ۇستانىپ, قازىردەن باستاپ كاسىپپەن اينالىسۋدى ءجون كوردى. اسىلحان تۋرالى اقپارات جانە قوعامدىق كەلىسىم مينيسترلىگىنىڭ قولداۋىمەن جۇرگىزىلىپ جاتقان ەڭبەكقور جاستار اقپاراتتىق شاراسىندا دا ايتىلدى.
– «ەڭبەك» مەملەكەتتىك باعدارلاماسى تۋرالى العاش تەلەديداردان كورىپ, قىزىعۋشىلىق تانىتىپ, ءوز ءىسىمدى اشۋعا اۋداندىق جۇمىسپەن قامتۋ ورتالىعىنا باردىم. بيىل ماۋسىم ايىندا ورتالىقتىڭ جولداماسىمەن «جاس كاسىپكەر» جوباسى بويىنشا كاسىپكەرلىكتىڭ قىر-سىرىن ۇيرەنىپ, سەرتيفيكات الىپ, باعدارلاما ارقىلى جەكە شارۋاشىلىعىمدى دامىتۋ ءۇشىن 505 مىڭ تەڭگە قايتارىمسىز گرانت الدىم. وتە ىڭعايلى. وسى قارجىعا 15 توقتى, 6 ەشكى ساتىپ الدىم. سونىمەن قاتار مەملەكەت تاراپىنان اتاۋلى الەۋمەتتىك كومەك الىپ وتىرمىن.
وسى باعدارلاماعا قاتىسقانىم ءۇشىن شەكسىز ريزامىن. سونىڭ ارقاسىندا جەكە شارۋاشىلىعىمدى دامىتىپ, تابىسقا قول جەتكىزۋگە مۇمكىندىك الدىم. – دەيدى اسىلحان ەربولقىزى.
سالامات يمانعاليەۆ
باتىس قازاقستان وبلىسى,
سىرىم اۋدانى
