سپورتشىلارعا الماتى قالاسىنىڭ سپورت باسقارماسىنىڭ باسشىسى رۇستەم بايسەيىتوۆ پەن «الماتى مارافونىنىڭ» نەگىزىن قالاۋشى جانە قامقورشىلىق كەڭەستىڭ توراعاسى عالىمجان ەسەنوۆ ساتتىلىك تىلەدى. «سپوت سيقىرىنىڭ كۇشتىلىگى سوندا, جىل سايىن شاراعا قاتىسۋشىلاردىڭ سانى ارتىپ كەلەدى. بىلتىر 3 500 ادام قاتىسسا, بيىل 26 ەلدەن كەلگەن 5 مىڭ سپورتشى قاتىسىپ وتىر. جۇگىرۋ تراسساسى AIMS حالىقارالىق مارافون قاۋىمداستىعىنىڭ ەرەجەلەرىنە ساي سەرتيفيكاتتاۋدان ءوتتى. بۇل ونىڭ ساپالى ەكەنىن راستاپ, الەمدىك ستاندارتتارعا ساي ەكەندىگىن بىلدىرەدى. جارتىلاي مارافون – قالانىڭ سپورتتىق ءومىرىنىڭ اجىراماس بولىگى جانە «الماتى مارافونى» ءداستۇرىنىڭ جالعاسۋى», دەيدى عالىمجان ەسەنوۆ.
– ەكى كۇن توڭىرەگىندە مارافون مەن ترياتلوننىڭ تاريحى جازىلدى. كەشە عانا ۆەنا (اۆستريا) مارافونىندا (42.2 كم) الەمگە ايگىلى جۇگىرۋشى ەليۋد كيپچوگە الەمدىك رەكوردتىڭ يەگەرى اتاندى. بۇگىن تاڭەرتەڭ ءبىزدىڭ وليمپيادا چەمپيونىمىز الەكساندر ۆينوكۋروۆ كونا قالاسىندا (گاۆاي) وتكەن ترياتلوننان الەم چەمپيوناتىندا ءوزىنىڭ جاس ساناتىندا جەڭىمپاز اتاندى. بۇل باتىلدىقتىڭ, ەرىك-جىگەردىڭ جانە سپورتتىق جەتىستىكتەردىڭ كەرەمەت ۇلگىسى,- دەيدى الماتى جارتى مارافونىنىڭ ديرەكتورى سالتانات قازىباەۆا.
مارەگە ءبىرىنشى بولىپ 10 شاقىرىم قاشىقتىققا جۇگىرگەن جەڭىمپازدار كەلدى. امانگوس ياسساۋي (32 مينۋت 8 سەكۋند) ەرلەر اراسىندا وزگەلەردى وزسا, ال ەكاتەرينا پارامونوۆا (37 مينۋت 32 سەكۋند) ايەلدەر اراسىندا ءبىرىنشى بولىپ مارەگە جەتتى.
جارتىلاي مارافونشىلار اراسىندا قىزۋ جارىس باستالدى. 21 شاقىرىم قاشىقتىققا جۇگىرۋدەن الماتىلىق ميحايل كراسيلوۆ (1 ساعات 9 مينۋت 15 سەكۋند) جەڭىپاز اتاندى. قىزدار اراسىندا جاننا ماماجانوۆا 1 ساعات 19 مينۋت جانە 8 سەكۋند ۋاقىت كورسەتكىشىمەن ءبىرىنشى بولىپ كەلدى. ەڭ جۇيرىك ەرلەر مەن ايەلدەر ۇشتىگى 1,5 ميلليون تەڭگە كولەمىندە اقشالاي جۇلدە قورىن ءوزارا ءبولىستى. جۇلدەگەرلەر ءار جاس ساناتىندا دا انىقتالدى.
بيىل جارتىلاي مارافون تراسساسىندا مەديتسينالىق كومەكپەن قامتاماسىز ەتۋ جاعى كۇشەيتىلدى.
– تراسسادا جەدەل مەديتسينالىق جاردەم بريگادالارى, ۆەلوسيپەد مىنگەن مەديكتەر, قىزىل جارتى اي قوعامىنىڭ ەرىكتىلەرى جانە قىزىل جارتى اي قوعامىندا جاتتىققان قازاق-رەسەي مەديتسينالىق ۋنيۆەرسيتەتىنىڭ ەرىكتى ستۋدەنتتەرى كەزەكشىلىك ەتتى. تاس جولدا سونىمەن بىرگە Cardios مەديتسينالىق ورتالىعىنىڭ دارىگەرلەرىنىڭ شاتىرلارى ورناتىلدى. ەشكىم اۋىر جاراقاتتانعان جوق, ال ءاربىر كەلۋشىگە شۇعىل تۇردە كومەك كورسەتىلدى, دەدى جارىستىڭ باس دارىگەرى ورازبەك ساحوۆ.
دۇيسەنبى 14 قازان كۇنى توعىزىنشى الماتى مارافونىنا تىركەۋ اشىلادى. جارىس 2020 جىلدىڭ 19 ساۋىرىندە وتەدى. 2019 جىلى مارافونعا الەمنىڭ 53 ەلىنەن كەلگەن سپورتشىلار قاتىستى.
الماتى
