بىردەن ايتا كەتەيىك, قازاقستاندا ايەلدەر دزيۋدوسىنىڭ دامۋ قارقىنى تىم باياۋ. وتكەنگە زەر سالساق, بۇرىمدىلارىمىز وليمپيا ويىندارى تاريحىندا نەبارى ءبىر مارتە جانە الەم چەمپيوناتتارىندا ەكى رەت قانا جەڭىس تۇعىرىنا كوتەرىلدى. بۇل جۇلدەلەردىڭ بارلىعى دا جالعىز وتگونتسەتسەگ گالبادراحقا تيەسىلى. 2015 جىلى قازاق ەلىنە موڭعوليادان قونىس اۋدارىپ كەلگەن قىز اينالدىرعان ءتورت جىل ارالىعىندا قوماقتى تابىستارعا قول جەتكىزدى. اتاپ ايتساق, ريو وليمپياداسى (2016 جىل) جانە بۋداپەشت (2017 جىل) پەن باكۋدەگى (2018 جىل) دۇنيەجۇزىلىك دودالاردا قولا مەدالدى ولجالادى. ودان بولەك, ازيا چەمپيونى (2016 جىل) اتانىپ, سول جارىستىڭ كۇمىس جۇلدەسىن (2017 جىل) موينىنا ءىلدى. دۇنيەجۇزىلىك ۋنيۆەرسيادا (2017 جىل) مەن ازيا ويىندارىندا (2018 جىل) ءۇشىنشى ساتىعا تابان تىرەدى. وسىلايشا موڭعول قىزىنىڭ ارقاسىندا ەلىمىزدىڭ ايەلدەر كۇرەسى ءبىراز ەڭسە تىكتەپ قالعان ەدى.
ەڭ وكىنىشتىسى, وزگە جەرلەستەرىمىزدىڭ وتگونتسەتسەگ گالبادراحتىڭ جەڭىستى جولىن جالعاستىرۋعا كۇش-جىگەرى جەتپەي ءجۇر. قازىرگى كەزدە الەمدىك رەيتينگتە «توپ-10» دزيۋدوشىنىڭ قاتارىنا قازاقستاننان تەك 27 جاستاعى گالبادراحتىڭ عانا ەنۋى جوعارىدا ايتىلعان ءسوزىمىزدىڭ ايقىن دالەلى. 48 كيلو سالماق دارەجەسىندە بەلدەسىپ جۇرگەن بالۋاندار اراسىندا ول جەتىنشى ورىندا تۇر. قورجىنىندا 4255 ۇپاي بار. ەگەر الداعى ەكى-ءۇش جارىستا تابىستى ونەر كورسەتەتىن بولسا, وندا وتگونتسەتسەگتىڭ بۇگىنگى ناتيجەسىن ودان ءارى جاقسارتىپ, تىپتەن ۇزدىك ۇشتىكتىڭ قاتارىنان كورىنۋگە دە تاماشا مۇمكىندىگى بار.
ال قازاقستان ۇلتتىق قۇراما كومانداسى ساپىنداعى وزگە قىزداردىڭ اياقالىسى جايىندا اڭگىمە قوزعالسا, جانارىمىزبەن جەر شۇقيتىنداي جاعدايدامىز. ماسەلەن, وتگونتسەتسەگ گالبادراحتان كەيىنگى ءتاۋىر ناتيجە سەۆارا نىشانباەۆاعا تيەسىلى. 57 كيلو سالماقتا كۇش سىناساتىن وتانداسىمىز الەمدىك رەيتينگتە 35-ورىندى يەلەنۋدە. بۇل, ارينە كوڭىل كونشىتەرلىكتەي كورسەتكىش ەمەس. تىزىمگە ودان ءارى ۇڭىلسەك, زارينا رايفوۆانىڭ (75 كيلو) – 38, گۇلجان يسانوۆانىڭ (+78 كيلو) – 42 جانە كاميلا بەرلىقاشتىڭ 45-ورىندا تۇرعانىن بايقايمىز. ودان كەيىنگى بالۋانداردىڭ ەسىمدەرىن اتاۋدىڭ دا قاجەتى جوق-اۋ. ولاردىڭ كورسەتكىشتەرى تىپتەن تومەن.
ءيا, ءداپ وسى وگىز اياڭ ءجۇرىس, باياۋ قارقىنمەن الىسقا بارمايتىنىمىز انىق. كەلەسى جىلى توكيو وليمپياداسىندا قازاق ەلىنىڭ نامىسىن جالعىز عانا گالبادراح قورعاۋى مۇمكىن. ەگەر وزگە قىزدارىمىز جولدامادان قاعىلىپ, تورتجىلدىقتىڭ باستى دوداسىنان شەت قالسا, تاڭداناتىن تۇگى جوق. سەبەبى بۇگىنگى تاڭدا قازاقستانداعى ايەلدەر دزيۋدوسىنىڭ دەڭگەيى وسىنداي.
ايەلدەر دزيۋدوسىنىڭ دامۋ قارقىنى جايىندا ايتساق, قازىرگى كەزدە فرانتسيا قۇراما كومانداسىنىڭ ءتورت بىردەي مۇشەسى الەمدىك رەيتينگتە جەكە-دارا كوش باستاپ تۇر. ولار – اماندين بيۋشار (52 كيلو), كلاريسس اگبەنەنۋ (63 كيلو), ماري-يۆ گايە (70 كيلو) جانە مادەلينا مالونگا (78 كيلو). وسى مىقتىلاردىڭ اراسىنداعى ەڭ اتاقتىسى – 25 قازاندا 27 جاسقا تولعالى وتىرعان اگبەنەنۋ. ول – ريو وليمپياداسىنىڭ قولا جۇلدەگەرى, الەمنىڭ ءتورت دۇركىن چەمپيونى. گايە مەن مالونگا بيىلعى دۇنيەجۇزىلىك دودادا دارا شىقتى. بيۋشار دا «قارا جاياۋ» ەمەس. ونىڭ الەم بىرىنشىلىگىندە ەكى رەت جۇلدەگەرلەر ساناتىنا قوسىلىپ, قارت قۇرلىقتىڭ تەڭدەسسىزى اتانعانىن جانكۇيەرلەر جاقسى بىلەدى.
اسا جەڭىل سالماقتاعى داريا ءبيلوديدتىڭ تەڭدەسسىز ونەرى مەن وراسان زور تابىسىنا تاڭدانباۋ دا, تامسانباۋ دا مۇمكىن ەمەس. بىلتىر باكۋدە باس جۇلدەنى ولجالاعان بويجەتكەننىڭ ەسىمى ەڭ جاس الەم چەمپيونى رەتىندە دزيۋدو كۇرەسى تاريحىنا التىن ارىپتەرمەن جازىلدى. ۋكراينا بالۋانى بۇل بەلەستى نەبارى 17 جاسىندا باعىندىردى. بيىل بيلوديد سول ناتيجەسىن توكيودا قايتالادى. قارسى كەلگەندەردى الىپ تا, شالىپ تا جىعىپ, التىن تۇعىردان قول بۇلعادى. ودان بولەك, ول ەۋروپا چەمپيوناتى مەن ەۋروپا ويىندارىندا الدىنا جان سالمادى. قازىرگى كەزدە داريا ءوز سالماعىندا دارا تۇر.
57 كيلو سالماق دارەجەسىندە 29 قازاندا 24 جاسقا تولعالى وتىرعان كانادالىق كريستا دەگۋچيدىڭ قارقىنى كۇشتى. ۇيەڭكى جاپىراقتار ەلىنىڭ وكىلى بىلتىرعى الەم چەمپيوناتىنداعى قولا مەدالىن بيىل التىنعا الماستىردى. توكيوداعى تارتىستا ءوز قارسىلاستارىنىڭ بارلىعىن كۇمانسىز ۇتتى. ال اسا اۋىر سالماقتا يداليس ورتيسكە تەڭ كەلەر ەشكىم جوق. 30 جاستاعى كۋبانىڭ ماقتانىشى وليمپيادا (1 التىن+1 كۇمىس+1 قولا) مەن پانامەريكا ويىندارىندا (3 التىن) ءۇش رەتتەن جانە الەم چەمپيوناتىندا جەتى مارتە (2 التىن+2كۇمىس+3 قولا) جەڭىس تۇعىرىنا كوتەرىلدى. سونداي-اق ورتيس 2007-2019 جىلدار ارالىعىندا قاتارىنان 14 جىل بويى پانامەريكا بىرىنشىلىگىندە قارسىلاس شاق كەلتىرگەن جوق.
الەمدىك رەيتينگتە «توپ-10» دزيۋدوشىنىڭ قاتارىندا كۇنشىعىس ەلى وكىلدەرىنىڭ قاراسى مول. جاپونيانىڭ 15 سپورتشىسى ۇزدىكتەر ساناتىندا. ەكىنشى ورىندا – فرانتسيا قۇراماسى. ولاردىڭ بەس بالۋانى سول بەلەستەن كورىنۋدە. ءۇشىنشى – التىنشى ورىنداردى برازيليا, گەرمانيا, گوللانديا جانە كوسوۆو كوماندالارى ءوزارا بولىسۋدە. سول ەلدەردىڭ ارقايسىسىنىڭ ءتورت-ءتورت بالۋانى الدىڭعى لەكتە. ءيا, العاش اتالعان ءۇش مەملەكەتتىڭ وسىنداي كورسەتكىشكە قول جەتكىزۋى زاڭدى. ويتكەنى ولاردا مىقتى باپكەرلىك مەكتەپ تە, جەڭىسپەن ورىلگەن باي ءداستۇر دە بار. ال نەبارى 2 ميلليونعا جەتەر-جەتپەس حالقى بار, تاۋەلسىزدىك العانىنا 11 جىلدان ەندى عانا اسقان شاعىن عانا كوسوۆو دزيۋدوشىلارىنىڭ بۇگىنگى تاڭداعى تابىسىنا تاڭدانباۋ مۇمكىن ەمەس.
سونداي-اق كانادا, ۇلىبريتانيا, سلوۆەنيانىڭ – ءۇش, ۋكراينا, موڭعوليا, رەسەي, يسپانيا, ءيزرايلدىڭ – ەكى, ارگەنتينا, قازاقستان, سەربيا, بەلگيا, شۆەيتساريا, ماجارستان, اۋستريا, اۋستراليا, شۆەتسيا, پۋەرتو-ريكو, كۋبا, چەرنوگوريا, ازەربايجان, بەلارۋس جانە وڭتۇستىك كورەيانىڭ ءبىر بالۋانىن ۇزدىك وندىقتىڭ قاتارىنان كەزىكتىرۋگە بولادى.
