ال الماتى قالاسىنىڭ نامىسىن م.اۋەزوۆ اتىنداعى №128 مەكتەپتىڭ 5 سىنىپ وقۋشىسى ميراس ماكسيموۆ قورعايتىن بولدى. 120 قاتىسۋشىنىڭ ىشىنەن وزىق كورىنگەن جاس ورەن ەندى اقتىق سايىسقا جولداما الىپ وتىر.
رەسپۋبليكالىق, حالىقارالىق بايقاۋلاردىڭ گران-پري يەگەرى, «عۇمىر-داريا» بايقاۋىنىڭ جۇلدەگەرى, «نۇرلى جاستار», «كۇنشۋاق», «دارا بالا» جوبالارىنىڭ قاتىسۋشىسى ميراس ماكسيموۆ ەلىمىزدىڭ بارلىق ايماقتارىندا 28 ناۋرىزدان باستاپ جۇرگىزىلگەن ەڭ اۋقىمدى جانە تانىمال «بالا داۋىسى» بالالار ءان بايقاۋىنا قاتىسىپ, جۇزدەن جۇيرىك, مىڭنان تۇلپار اتاندى.
«بۇل مەكتەبىمىزدىڭ ماقتانىشى, جارىق جۇلدىزى دەسەك تە بولادى. بۇل بالادان ءۇمىتىمىز وتە زور. قالا بويىنشا «بالا داۋىسى» بايقاۋىنىڭ ءفيناليسى بولىپ وتىر. تۇگەل ۇجىم بولىپ, وقۋشىلارىمىزبەن بىرگە جانكۇيەر رەتىندە ماكسيمدى قولداۋعا بارامىز», – دەدى الماتى قالاسى م. اۋەزوۆ اتىنداعى № 128 مەكتەپ ديرەكتورى جاننات ەسداۋلەتوۆا.
«بالاما تەك ساتتىلىك تىلەيمىن. ارينە, قوبالجۋ ۇستىندەمىز. تەك ميراس قانا ەمەس, ۇستازى دا, مەكتەپ تە, اتا-اناسى دا تولقىپ ءجۇرمىز. ويتكەنى بۇل جەردە جالعىز ميراستىڭ نە وتباسىنىڭ عانا ەمەس, مەكتەبىنىڭ, ۇستازدارىنىڭ, جالپى الماتى قالاسىنىڭ نامىسى تۇر. الماتى – الىپ شاھار. قالا اتىنان شىعاتىن بولعاندىقتان, بىزگە ارتىلاتىن جۇك تە اۋىر», – دەدى م. ماكسيموۆتىڭ اناسى جانات زينەشوۆا.
«ميراسپەن جۇمىس ىستەۋدىڭ ءوزى وتە قىزىق. ول مۋزىكاعا تولىعىمەن بەرىلەدى. ءان ايتقان كەزىندە جاندانىپ كەتەدى. ءوزىنىڭ ەرەشكە يدەيالارى بار, ءاردايىم جاڭاشىلدىققا تالپىنىپ تۇرادى. ميراس وسىدان ەكى جىل بۇرىن ۆوكالعا قاتىسا باستادى, سول كەزدەن بەرى «بالا داۋىسى» بايقاۋىنا بارسام دەپ ارماندايتىن, دايىندالىپ, اسىعا كۇتەتىن. بيىل مىنە, ءساتى ءتۇسىپ, وسىنداي ۇلكەن دەڭگەيدەگى سايىسقا جولداما الىپ وتىر», – دەدى م. ماكسيموۆتىڭ ۆوكالدىق جەتەكشىسى ءاسيا تۇرعانباەۆا.
ەلىمىزدىڭ مادەنيەت جانە سپورت مينيسترلىگىنىڭ, قر تۇڭعىش پرەزيدەنتى-ەلباسى قورىنىڭ قولداۋىمەن وتەتىن ءاليا نازارباەۆانىڭ «جاندانۋ الەمى» قوعامدىق قورىنىڭ اۆتورلىق جوباسى – «بالا داۋىسى» ۇلتتىق بالالار ءان بايقاۋىنىڭ ءتورتىنشى ماۋسىمى 24-26 قازان كۇندەرى الماتى قالاسىندا اياقتالادى. اقتىق سايىستا ەلدىڭ ءار ايماعىنان كەلەتىن تاعى 16 جاس دارىن باقتارىن سىنايدى. ۇلتتىق ونەر ينستيتۋتىندا ءبىلىم الۋ گرانتى مەن ديسنەيلەندكە ساياحاتتى ۇتىپ الاتىن گران-پري يەسىن ءادىل قازىلار القاسى مەن تەلەكورەرمەندەر تاڭدايدى.
الماتى
