الماتى بيلىگى قالا كوشەلەرىندە قانداي وزگەرىستەر جاسايتىنىن مالىمدەدى. بۇل تۋرالى بۇگىن الماتى اكىمدىگىندە وتكەن ءباسپاسوز بريفينگ بارىسىندا ايتىلدى.
اتاپ ايتقاندا, جاندوسوۆ كوشەسى كەڭەيىپ, BRT ەكىنشى كەزەگىنە جوبالىق-سمەتالىق قۇجاتتاما ازىرلەنەدى. ساين كوشەسى ۇڭعىلانىپ سوزىلاتىن بولدى.
«BRT ءبىرىنشى كەزەڭىندە جاندوسوۆ كوشەسىنىڭ سۇلەيمەنوۆ پەن ۇلكەن الماتى وزەنىنە دەيىنگى بولىگى قالىپ قويعان بولاتىن. شامامەن 1 شاقىرىم جول ەدى. بۇل ۋچاسكەدە جوسپار بويىنشا جولدىڭ ەنىن كەڭەيتۋ كوزدەلگەن. اتالعان بولىكتە جول قوزعالىسى 6 جولاقتا جۇرگىزىلەدى. ناقتىراق ايتقاندا, كوشەنىڭ وڭ جاعى كەڭەيتىلەدى. سول جەردەگى ۇيلەردىڭ 90%-ى ساتىپ الىندى. بولاشاقتا ولار سۇرىلەدى», - دەدى قالالىق موبيلدىلىك باسقارماسى باسشىسىنىڭ ورىنباسارى ەرنۇر ءابجاحان.
ونىڭ ايتۋىنشا, BRT جەلىسىنىڭ ەكىنشى كەزەڭى تيميريازەۆ-جەلتوقسان كوشەلەرىنىڭ قيىلىسىنان قۇلجا تاس جولىنداعى جەتىسۋ بازارىنا دەيىن 13 شاقىرىمعا سوزىلادى. «ساين كوشەسى رىسقۇلوۆ پەن موڭكە بي كوشەلەرىنىڭ ارالىعىنا دەيىن 3,2 كم سوزىلاتىن بولدى. وسى ماقساتتا جەكەمەنشىك يەلەرىنەن جەر ۋچاسكەلەرىن ساتىپ الۋ كوزدەلگەن. قازىر باعالاۋ جۇمىستارى ءجۇرىپ جاتىر. بۇل جۇمىستار 2020 جىلعا دەيىن اياقتالۋى ءتيىس بولاتىن. الايدا بارلىعى قارجىلاندىرۋعا, جەر ۋچاسكەلەرىن ساتىپ الۋ ۇزاقتىعىنا بايلانىستى», - دەدى ەرنۇر ءابجاحان
