قازاقستان • 10 قازان، 2019

جارتى ميلليارد قاراجات مەملەكەتكە وندىرىلگەن

30 رەتكورسەتىلدى

سولتۇستىك قازاقستان وبلىستىق سىبايلاس جەمقورلىققا قارسى كۇرەس دەپارتامەنتىنىڭ باسشىسى ەرنار بايانعازيننىڭ مالىمدەۋىنە قاراعاندا، وسى قىزمەتتىڭ توعىز ايداعى ءىس-ارەكەتىنىڭ ارقاسىندا مەملەكەتتىڭ كىرىسىنە 600 ملن تەڭگەدەن ارتىق قارجى ءوندىرىلىپ الىنعان. بۇل تۋرالى شەنەۋنىك ايماقتىق كوممۋنيكاتسيالار قىزمەتىندەگى بريفينگتە جاريا ەتتى.

ءوزىنىڭ سوزىندە ە.بايانعازين دەپارتامەنتتىڭ قىزمەتى جازالاۋ باعىتىنا ەمەس، قىلمىستىڭ الدىن الۋعا باعدار العانىن اتاپ ءوتتى. سونىڭ وزىندە ۇستىمىزدەگى جىلى 105 قىلمىس تىركەلگەن. «بارلىعى 211 قىلمىستى ءىس بويىنشا تەرگەۋ جۇرگىزىلدى، ونىڭ ىشىندە 142 ءىس سوتتىڭ قاراۋىنا جىبەرىلدى. تەرگەۋى اياقتالعان قىلمىستى ىستەر بويىنشا 616،4 ملن تەڭگەنىڭ زالالى انىقتالىپ، ونىڭ 608،7 ملن تەڭگەسى قالپىنا كەلتىرىلدى. سونىمەن بىرگە 58،8 ملن تەڭگەنىڭ مۇلكى تۇتقىندالىپ وتىر»، - دەدى ەرنار بايانعازين.

سىبايلاس جەمقورلىققا قول بىلعاعانداردىڭ اراسىندا 9 ادام مەملەكەتتىك ورگانداردىڭ باسشىسى بولعان. ونىڭ تورتەۋى وبلىستىق، بەسەۋى اۋداندىق دەڭگەيدەگى باستىقتار بولىپ شىققان. بارلىق سوتتالعانداردىڭ سانى - 27 ادام.

بريفينگتىڭ بارىسىندا باق وكىلدەرى «پارا بەرمە!» دەگەن چەللەندجدى قولدايتىندارىن جاريالادى. قازىر ونى قازاقستاننىڭ بارلىق اۋماقتارى قولداپ وتىر. الايدا ەرنار بايانعازين ادامنىڭ سانا سەزىمى ءوسىپ، پارا الۋ مەن بەرۋدەن تىيىلۋعا كوزدەرىن جەتكىزبەسە، ەشقانداي ناسيحاتشىل ۇرانداردان ناتيجە شىقپايتىنىن ايتتى.

«ماسەلەنى تەك پارا بەرۋ ارقىلى شەشۋدىڭ ءوزى – قوعامنىڭ كەرى كەتۋىنە اكەلەتىنىن ءاربىر ادام ۇعىنۋى كەرەك. سوندا عانا ءبىز بۇل ىندەتتەن ارىلامىز» دەدى ەرنار بايانعازين.

 

سولتۇستىك قازاقستان وبلىسى 

سوڭعى جاڭالىقتار

ۇقساس جاڭالىقتار